jeudi 24 mai 2012

دليل الزوالي و الزكيم في فهم الترقيم

1-
خويا لو كنت زوالي في ثقافتك الإقتصادية موش مشكل و موش عيب ، لو كان ثقافتك جملة كروية بحتة موش مشكل زادة، المشكلة كي تتجعبن وتوخر وتقدم وتقول نعرف .. مثلاً بعض السادة هذم إلي جاوبو و قالو نعرفو. خاطر وقتها تولي المشكلة إلي فما شكون يسمعك وممكن يصدقك وماو ما يخفاش عليك البهامة معدية أكثر مل القريب. عادة كانك تسمع النهار هذا إلي مؤشر التصنيف الائتماني ولا كما في رواية أخرى الترقيم السيادي متع تونس طاح، وتسمع فما ناس تقلك هذي كارثة ، وناس أخرى تقلك لا بالعكس لباس

إضغط على الصورة تلقى حوار كامل


كانك تحب تفهم و بالفلاغي الفصيح، فإن هذه التدوينة كتبت إليك ... بمساهمة اكتفيا ضد النفاخ.

2-
عادة يا أخ العرب ومدامك عندك الرغبة -وهذي حاجة باهية ومن الخصال إلي تحسد عليها، خاصةً كي تبدا مع حس نقدي - وقبل ما ندخلو في التفاصيل يكون من الأفضل فهم السيستام .. يا سيدي بن سيدي كما منين يجي واحد يخطب ساعات عايلة لعروسة تمشي تسئل على سمعتو وتعمل بحثها، كيف كيف منين يجي واحد بش يسلف فلوس لعبد ماو يسئل عليه ، مخلص ، ثقة، قلاب...

كيف كيف في العالم فما شركات
كما ستاندرد اند بورز وموديز يعملو التصنيف هاذمة تنجم تقول كما العمدة يعرفو الناس الكل ... مثلاً إنتي مواطن تسكن في الخارج ، منين تروح تلقى ولد حومتك طلبك في سلفة .. يخي تمشي تسئل خوك عليه على سمعتو.... يا سيدي كيف كيف إنتي إلي بش يسلف وخوك هو شركة التصنيف وولد حومتك هو الدولة المقترضة في الحالة متاعنا.

3- تبقى الفرق بين الحالتين، هو إنو شركات التصنيف مش ممكن تجاوبك إجابات من نوع " تي باهيشي هذاك عشيري ديمة نلعب معه في الرامي" ولا "هذاك يعرف ربي يصلي ديمة في الجامع " أما تجاوبك بناء على دراستها للوضع الإقتصادي البحت، معناها تجاوبك مثلاً هذاك يخلص 400 دينار في الشهر صعيب بش يرجعلك ثلاثين مليون في عامين؟ وإلا يقلك هذاك يخلص راس الشهر مليون ونص تو يرجعلك الخمسين دينار متاعك. هذاك علاش الشركات هذي عملو تصنيف فيه برشة خانات للدول


صورة من ويكيبيديا



احنا في حالتنا تونس كنا في ببب- توا في بب معناها طحنا بدرجتين والأخطر إنو ولينا في خانة السبيكولاتيف أو ما يعبر عنه في بعض الترجمات انها قابلة للمضاربة والأخطر إنو طحنا على المدى القريب زادة إلى قبل أخر خانة.

4- يقول القايل، إي وتوا شنوا معناها هذا الكل ؟ يا سيدي معناها ولات سمعتنا موش باهية والإقتصاد متاعنا حسب رايهم موش أكيد إنو مخلص . دونك يولي العبد يخاف إنو يسلفك وإذا بش يسلفك يولي يعمل تأمين على الدين دونك يزيد في الفائض وزيد هو يخاطر دونك لازمو يربح أكثر .. هذاك علاش يشوط في الفائض.
يخي لحكاية ما تمس كان القروض ؟ إي سؤال وجيه أما كتلخيص لشنوة ينجم يصير ، شوف البنوك إلي عنا هي بيدها تتسلف دونك منين بش تكثر عليها الفوائد حتى هي بش تكثر في الفائض على القروض إلي تعطيهم مما يؤدي إلى عرقلة للإستثمار بما إنو إلي بش يستثمر بش يخو قروض بشحم يهود..
وزادة المستثمرين يمشو عادةً للبلايص الأكثر إستقراراً ، توا واحد بش يحل حانوت الكترو مناجي وتلفونات وانفورماتيك يمشي يحلها في حومة سمعتها خايبة ولا في حومة رايضة وأمنة ؟ تبقى زادة الفوائد العالية قد تؤدي إلى مزيد من الضغط على إحتياطي العملة الصعبة مما يؤدي إلى سقوط قمة الدينار وتولي وقتها تضخم إرتفاع أسعار ... المهم ربي يستر

5- إي وتوا هذومة كلامهم قرأن ؟ هاو قالو إلي المعارضة تحرك فيهم ؟ يا ولدي إسمع هذومة شركات أمهم ما تعرفهاش طيحو أمريكا وفرنسا مل تريبل أ بالرغم من إحتجاجتهم ... وزيد قريب يخرج التصنيف الجديد لموديز وفيتش وتو نشوفو إلي لحكاية علم شبه صحيح


6- أيا ملا اش عملنا وجاء مليح ؟

أول حاجة نعملوها هي إلي نعترفو إلي هي حاجة محيرة ونوليو نسمعو مل مختصين كما إلياس الجويني إلي إلسي في متاعو أطول من أطول نص قراوه بعض أدمنات الفيسبوك، بعدها نحاولو نطمنو الأسواق بعملية تعديل وزاري وتغيير بعض المشاريع من مشاريع لا مردودية لها (مشاريع إلي تتحط في السيمان وإلي ما تخدم كان بصفة وقتية مثلاً) ، تقشف نسبي ، ونشالله الله المستعان ونشالله يكون درس إلي الحكم موش هيدقة تتشد بالشرعية السجنية أو النضالية




* الزوالي استخدمت بمعنى الزوالي في الثقافة الإقتصادية


lundi 7 mai 2012

سؤال أو ربما تسائل


بجاه ربي يا ثوريي الترويكا إلي قلبتو الدنيا منين قال السبسي مفماش قناصة شدتش حكومتكم الموقرة قناص؟
بجاه ربي يا ثوريي الترويكا إلي قلبتو الدنيا على البوليس السياسي مش حاشمين على رواحكم و المرزوقي والجبالي يقولوا بكل وقاحة عنا معلومات استخباراتية- سياسية-؟
ما هو شعوركم وأنتم الذين كنتم تطالبون بإقالة الصيد وقيادتكم تشارك في حكومة هو عضو فيها ؟



ما هو شعوركم وأنتم من كنتم تطالبون بجلب بن علي حين ترون أن حكومتمكم الموقرة لا تعتبره أمراً هاما يستحق الضغط على مزرعة ال سعود ؟
أ لا تذكرون مواقفكم من الإقتراض ؟ أين " مبدئيتكم " إليوم و حكومتكم عدلت الميزانية لمزيد من الإقتراض والودائع ؟



في النهاية ، اصدقائي أحباء الترويكا هل تشعرون انكم دغف أم طحانة؟