مرزوقي يزي فك !

في تونس ، نتوارثو أجيال وراء أجيال حاجات يصعب تفسيرها تجسد هويتنا الحضارية وعمقنا وعمق تاريخنا ، الحاجات هذي كل جيل يزيدها حاجة وتكبر وتطور منها البرنوس والكسكسي و السراول والقرأن و...........النكت على اللبية،

ديجا منعرفش علاش احنا التوانسة تعلمنا انكتو على الليبية ... الحق زادة هما من ناحيتهم ما قصروش وفرولنا المادة بصبرهم 40 سنة على القذافي ربي يرحمو وبابداعاتهم .... إي نعم نفس التوانسة إلي تجبدلهم العروبة متاعهم يستلبسو و"يعرو عليك" مبادئهم العروبية ... تي هو ممكن هذاك علاش.. ماو قلك كثر من العسل يمصات وكل شيء فات حده إنقلب إلى ضده. عادة أكهو من كثر العروبة فهمتلا ما يخرجك ويدخلك في الحلة ويخليك تنكت على شعب شقيق عملاً بوصية الماسونية الرابعة عشر (كان جدت عليك لحكاية هذي برا عدي خويا لعزيز عندك البسيكو أمية عفانا وعفاكم الله )


المهم القاعدة صحيحة ديجا ، من كثر التقوى متاعنا ، التي إنقلبت إلى ضدها للأسف ، خالفنا ايات قرأنية صريحة وصرنا قوم يسخر من قوم - الليبية - (اللهم غفرانك ) وحتى يكتمل المشهد الميتافيزيقي كان لا بد من إنو يطيح فينا ربي والحمد لله - إلي هو نفسه ربي- تعالى لم يمهل وأول فرصة جات جابلنا واحد قذافي أقرع.. عبيط.... ومرزوقي ( وفضايحو عامل منها سامي بن عبدالله *-إلي كلامه مش قرأن بالمناسبة - سلسلة هرور موفي لجماعة "رجل شريف"هنا هنا وهنا وهنا وهنا ووو ....)

سيادة رئيس الجمسرحية، إستغل منصبه، - ويبدو إنه كان إتفاق بين الطرفين- بش يحضر حملته الإنتخابية القادمة لذلك حقق في أيام معدودة أرقام قياسية عالمية، خطابات وتصريحات ولقاءات تلفزية وبرامج مع توانسة واجانب أكثر من عدد الكنترولات إلي ضيعهم عصام جمعة - إلي حسب المعهد الدولي للإحصاء هو أكبر رقم يقع رصده في مستوى الكرة الأرضية ويشتبه في أنه الإنفيني - وزيدهم اجراءت وتصرفات شعبوية تشوي المواطن أكثر من كل دقيقة ما لعبهاش الجزيري مع لومار

تنجمو تلاحظو إستعمال المعجم الكروي أما ماكم تعرفو الحديث في السياسة كان بجوه والناس الكل تحكي كرة، إلي في القهوة ، وإلي يغني ولي يمثل تي حتى بسيس ونبيل معلول وسمير السليمي و معز إدريس .... توا الناس الكل تحكي في السياسة ومسيبة الكرة ... عادة أنا قلت بيني وبين روحي، خلي نستغل العامل هذا والفراغ الموجود ونرجع المدونة رياضية وننشر فيها ارائي الرياضية، ماني ليبرالي رأسمالي إقطاعي نستغل قاعدة العرض والطلب ونملا الفراغ.. ومش غريب في القريب العاجل تلقاوني طارح خليقتي في أول فيديو بلوجينج رياضي على الساحة (يخي يوسف المخنان خير مني هو ؟!)

المهم مادمت توا في مرحلة التغير هاني قاعد بالشوية بالشوية والله -أنف الذكر- المستعان،

عادة قلنا إلي قذافينا قعد يسيب علينا في تمخويرات فكرية ما أنزل الله بها من سلطان، الحق هو طرف شعبوية وخدمة مصالح ضيقة وضهور إعلامي ينجم يهون أما كي تبدا الإمكانيات العقلية على قدها وقتها المشكل، بجاه ربي واحد يفسرلي شنوا معناها قررت التفويت في بعض القصور الرئاسية ؟! توا هو لا يزي رئيس لاعب فيها ديمقراطي من شيرا لا يزي يدخل كيف باي في زمانه في أملاك الشعب كأنها ورثة السيد الوالد ،ووزارة أملاك الدولة كأنها برنامج العيادة التلفزية ما تصلح لشي !! لا يزي من شيرة عامل فيها رويق يساري هاو ما نخلصوش الديون هاو ضد الخوصصة وهو الإجراء إلي إتخذو يتمثل في تفويت في أملاك الدولة ... على كل حال المغزى واضح - بما إنه عملياً القصور ليست حل بل نسبة مداخيل بيعها من ميزانية الدولة أقل من عشر نسبة دستورنا في الإنتخابات بكثير - وهو الظهور بمظهر الرئيس الشعبي الناس ملاح أب الشعب إلي يبيع "قصوره" خدمةً للشعب عند العامة الزواولة في أمخاخها وهو في الواقع يبيعهم أوهاماً وسماً في العسل


والمشكلة الثانية في إقتران القدرات العقلية المحدودة والسلطة هي حتمية لبينة تونس و قذافيتها ... عبر نشر البهامة بفعل العدوى الفكرية الوصولية الوجودية والمتواجدة المنتحلة صفة الكينونة ( دزولي حبيت نعمل جمل صعبة بش نظهر مثقف يخي شي ما يخرجش عليا الشي وبصراحة ما فهمتهاش كيفكم ) بالفلاقي الراجل رئيس وعندو التلافز تنشر أفكاره ويعيطولو دكتور - الحاجة الوحيدة إلي مطمنتني هي إلي الهاشمي الحامدي وتوفيق عكاشة وطارق الكحلاوي يعيطولهم دكاترة زادة - الشي هذا ينجم يأثر على المتلقي الضعيف والهش خاصة كيف تبدا بأساليب خطابية تسمعو اش يحب يسمع وتزيد تأكدلو حقيقته "الغير حقيقية" (حاس روحي بديت نتحسن في الجمل الصعبة )

كما شطحتو الأخيرة متع راس لعام (إلي مالو إلا راس عام في التقويم القريقوري بالمناسبة ) المهم مواضيع كما هذه لا تهم المواطن أيها السيد الرئيس، وما نستفادو منها شي مثلها مثل برنوسك (أكثر حاجة ستفدتها منها هي تدوينة الأخ السلدوبي يوسف علحيط ).. ملخر سيد الرئيس تصريحاتك عملت مشاكل للشعب التونسي مع الجزائر وفرنسا وسورية وغيرهم ... سيد الرئيس تلهى عين المستشارين يمين ويسار ومارس شعبويتك في الفارغ ميسالش والبس برنوس أما حتى سترينغ (على ذوق الجبالي) وعين الدكاترة الطحانة المستقلين المحايدين المدافعين عن الحكومة والتجمعيين مستشارين ميسالش ومن فضلك ما تتدخلش في خبز الزوالي ببهامتك العابرة للقارات راو معادش يستحمل


وحاول يكون على قد القسم وحافظ على استقلالية البلاد قلو إندماج قالو ...

قبل الختام اسئلة هامشية للأصدقاء من المؤتمر و لشباب حزبكم، سيدي ذو الجراية الثلاثين مليونية : ما هو شعوركم وأنتم من كنتم تطالبون بجلب بن علي والطرابلسية وصخر وأنتم ترون رئيسكم يستقبل أمير قطر الله يسخر منه ؟ ما هو شعوركم وأنتم الذين كنتم تطالبون بإقالة الصيد وقيادتكم تشارك في حكومة هو عضو فيها ؟ ما هو شعوركم والعجيمي يترقى ؟ ما هو شعوركم وأنتم الذين عفط لكم الزكراوي حين كنتم تتظاهرون ضد الجي 8 ووزير ماليتكم يطلب من أمريكا الإيفاء بوعودها؟ ما هو شعوركم وأنتم الذين طالبتم واعتصمتم في كل مكان وساندتم كل تحرك احتجاجي ورئيسكم يدعو إلى هدنة إجتماعية ويهاجم المنظمة الشغيلة ويطمئن منظمة الأعراف ؟ ما هو شعوركم ورئيس حزبكم يكذب على صحفي لبناني زوراً وبهتاناً ؟ ما هو شعوركم حين تشاهدون ترشيح وزراء غير الذين صوت لهم مكتب حزبكم بل بتعيينات فوقية ؟ هل أنتم راضون ؟ إذا كنتم كذلك فحظاً سعيداً في عبادة الأصنام

وعليكم السلام ورحمة الله وبركاته عليكم السلام ورحمة الله وبركاته عليكم السلام ورحمة الله وبركاته

يوم التدوينة المدنية: الخطر موجود رغم سذاجتكم

بمناسبة يوم التدوينة المدنية، هاني قررت باش نشارك ونوري الناس إلي الخطر موجود على بلادنا. نعرف فما عباد مثلاً كيف تحكيلها على التطرف يقولك شبيك خايف اى ولدي ما فما شي، الإسلام باهي! إي شكون قلك الإسلام خايب ولا بيه ولا عليه؟ فما ناس عندها تفاسير متطرفة ومعادية للحريات، وهذا ما يعنيش تشويه للإسلام أما السكوت عنه هو عين السذاجة. توا حزب التحرير موجود ولا؟ مهوش خطر على الحرية؟
فما شكون في بالو كيف نقولو لازمنا التوانسة الكل نكونو ضد التطرف يمشي في بالو نهاجمو في الإسلام؟ ولهنا قمة العوج، توا احنا ألمان بش نهاجمو الإسلام؟ على كل حال إلي بكل سذاجة ماشي في بالو مفماش خطر على تونس، هاني باش نفسرلو إلي فما ناس فهمها للإسلام يسمح بأنو إذا فما سلطان حسب رأيهم فاسد فيجب الجهاد ضده والذي لا يجاهد فهو راضٍ بحكمه وهو فاسد بالتالي ويحل دمه ونساءه وابنائه، وهذا هي في العموم ما اصطلح على تسميته فتاوي لندن، إلي سمحت للحركة التي تسمي نفسها إسلامية في الجزائر بالهجوم على قرى معزولة وذبح من فيها وبالمناسبة الجزائر جارتنا والحركة هذي انضمت للقاعدة ومعادش خدمتها كان الجزائر أما خذات سكتور المغرب العربي كامل. معناها كان فما شكون خطرلو إلي يحكم في تونس فاسد متستغربش نهار تولي كافر وما فيبالكش
هذا الجانب المخطر وهاو رابط صفحة تنشر فيديوات القاعدة وتهتم بالوضع التونسي وفيها 17 ألف عضو (اللهم أنعمت فزد). و فما جانب أقل خطورة من الإعتداء الجسدي لكنو خطير بعد ثورة الحرية، كيما لعباد إلي تحب تسكر القهاوي والمطاعم في رمضان بالقوة، ولا الناس إلي سكرت المواخير بالقوة الجسدية لا القانونية ( والله أعلم قداش من ماخور غير مراقب تحل) وكيفكيف الناس إلي تحب تفرض أي أجندة بالسيف كما إلي يحب بنات الناس ينحو الحجاب، كما إلي يحب ينحي الشراب الكلهم فرد ساك يقضيو على مدنية الدولة بصفتها إطار تنظيمي لكل الناس و تسمحلهم باش يعيشو بحرية مقيدة بالقانون إلي لازمو يراعي الناس الكل، مش طرف بركة حتى وإن كانو أغلبية .

إلي بالرسمي مش حاسس فما خطر على تونس وقاعد لاهي يفركس على اش قال واحد ملحد، ويقول فما خطر على الإسلام فهو سامحوني في الكلمة ضايع فيها وما يعرفش إلي الإسلام متجذر في الشعب وإلي ما فماش حتى خطر عليه إلا من المنتسبين إليه مثل التكفريين أو حزب التحرير الذي لا يؤمن بالحرية وإلي منعرفش علاش يقع الحديث عن وجوده كأمر عادي.. وهاي غناية فرحانين ونشالله كل ثورة واحنا فرحانين، أما إلي حبيت نوريهولكوم في الفيديو هو المحجبات إلي داخل هيئة تنظيم إجتماع حزب العمال الشيوعي بقفصة إلي يعتبر أقصى اليسار، معناها إلي مازال خايف على الإسلام من الأحزاب المدنية مذابيه يمشي يرتاح خيرلو وياخذ راحة يحسب فيها عدد المسلمين في تونس باش يعرف إلي الإسلام جبل ما يهزو ريح ف هالبلاد، أما الأحزاب الإسلامية تحب تنصب روحها حامية حمى الدين باش تكسب أصوات وتنفذ فهم معين واحد ووحيد للدين الحنيف... وبكلام وسذاجة كيف المنتشرة هليامات برشة ناس تعاون فيها وتسيب في التطرف متاعها كما بسيكو م ، إلي يقول بكل وقاحة "كان جا بيدي نعطيهم بالكلاشنكوف كما هذاك إلي عمل ماكينغ أوف" الناتج عن الخلط المتفشي بين الإسلام والإرهاب في عقله كما برشة عقول أخرى، تحب تتجاهل تفجيرات مراكش اليوم، وقتل متضامن إيطالي أيامات التالي في غزة.

ختاماً إلي مازال في بالو مفماش خطر على الدولة المدنية لازمو يحاول يفيق ويشوف شنوا صاير توا ويخمم بشمول أكثر، ويبعد على كل سذاجة في التحليل ومراهقة تنجم تخليه يجهل المعنى العميق للحرية، وتخليه معادش يفرق بين التهجم والنقد، و تخليه ما ينجمش يستوعب حق الأخرين في الوجود والتعبير الحر والنابع عن قناعاتهم،

المفيد، احنا نحبو أي مواطن تونسي عندو الحق في الوجود والعيش والحرية، نحبو المتدين عندو الحق يمارس شعائرو إلي ما تضر حد بكل حرية، واحد ملحد عندو الحق يكون ملحد ويعبر عن الحادو دون خوف من باقي المجتمع الذي سيحترمه كما يحترم المتدين.

هذي هي تدوينتي المدنية ونتمنى كل عبد يفهم معنى الحرية إلي ثارت على خاطرو الناس، وإلي تكلمو فيه وقادوه شباب تقدميون ومازلت أذكر فيديو كلمة أحد شباب الوطد أمام محكمة سوسة بعد أيام من إنطلاق الثورة. ذاك الشاب لا أعتقد إنه خاطر بمستقبله من أجل أن تغتصب منه حريته تحت أي مسمى كان.

رد على تدوينة : نقد النهضة

هذي بش تكون لي سابقة بش نكتب تدوينة كرد على تدوينة أخرى ممكن متشجع خاطر المدون المعني بالأمر صديق إفتراضي ليا و نتوقع إنو باب النقاش معاه مفتوح أكثر من برشة دوغمائين (أهوكة ضربتلو اللغة بش ما يدخلش فيا) ، وزادة لأني حسيت إنو لازم تقديم الصورة للعموم و نظراً لطول الطرح خيرت مش بش يكون تعليق بل تدوينةلهنا بش نحكي على هذه التدوينة للمدون بنفسجيت حر كاليميرو ، أملاً في انو يفهمني ويتناقش معايا
حسب ملاحظتي الأولية : كتب الخبر في سياق يطغى عليه إتجاه واحد ومنظور واحد، معناها -مش كيما قال ولا يظهر من كلامو إن نقد النهضة مافيهيش جانب صحيح ما عن حتى علاقة بمفهوم هجمة- نقد النهضة فيه الغث والسمين وأهم حاجة المغالطات من الجانبين، فما أغلاط وفما تمسكين زادة من النهضة و احنا نتعرضو لحملة و احنا يا حليلنا نسخفو و احناحقوقنا مهضومة و نعانو من الإسلاموفوبيا!! توا بلكشي عايش في اللامريك بش تقلي إسلاموفوبيا ؟ تونس أغلبية ساحقة مسلمة وتقلي إسلاموفوبيا؟ توا أنا نعرف حتى السكارجي ماخذ فكرة بهية علي يصلو والملتزمين هاو هذاك ناس طيبة يصلي ويعرف ربي. تي مرة في تكويرة الراجل يحب توش قتلو ما مستنيش الكرة، جاني صاحبي فرد ايكيب وقلي الراجل يصلي مش بش يكذب عليك!!! وإنت تقلي إسلاموفوبيا؟ تعرف شنوا معناها يخي ولا تتهيبل؟ معناها إنت مسلم دنك تخوف، إذا فما خوف من التطرف ما يتسماش اسلاموفوبيا وإلي يمن إلي فما إسلاموفوبيا في تونس يا إما بهيم حشاكم ويا إما لغاية في نفس يعقوب كما لحبيب إلي عامل الصفحة هذي

باهي توا نرجعو للرد على التدوينة، فما إشاعات وإشاعات مضادة، حسب ما قلت إنت إشاعة حكاية الأستاذة والنقاب، أناحسب ماعرفت لحكاية هذي خرجوها برشة ناس متعاطفين مع النقاب على الأقل اصدقائي منهم خرجوها كيما خرجو
هاك الطفلة في صفاقس إلي باعترافها تقبحت على الأستاذ خاطر ما قبلهاش بالنقاب وجابت خوها عطاه طريحة، والجماعة تتبكى والله ما حقوش الأستاذ، نورمال ياكل طريحة وتتقبح عليه تلميذة!، قال شنوا حرية ! والله نتمنى من هذو الجماعة كانهم جماعة حرية, ينادو بالحرية حتى للعرايا معناها كيف يجيك أستاذ قلم ما يقلقكش، ولا وقتها الحرية تولي عندها ضوابط؟ وكيفكيف على المثلية الجنسية.... إلخ إذا إنت تعتبر انها حرية شخصية، ووقتها نفهمك إلي إنت وصلت لدرجة في منظور الحرية متاعك فاتتني وفاتت مخيالبسيط أما ضربان اللغة مش لازم منو.

سامحوني طولت في التعريج، جيست حبيت نقول إلي الدعاية والدعاية المضادة موجودة.

باهي بالنسبة للحرية الدينية مسمعتش أنا فما شكون مش بش يضمنها؟ واللهي توا حتى هذا كلام!
بالنسبة لإستعمال المساجد صار, والناس الكل لازمها تحكي فيه وسامحني حطان النقطة هذي في سياق التدوينة اسمها مغالطة كبيرة، كأنها مش نقد هادف وعندو معنى، أنا نحكي مثلاً على بلادي جربة صارت مشاكل على الحكاية هذي متع تغير الأيمة، معناها النهضة قاعدة تتدخل ومش من حقها،وبالنسبة لإستعمال المساجد (خاصةً بالطريقة إلي حكى بها صديقنا كالميرو ، كأنو يقول يا مصلين كان مش بش تصوتو نهضة راهو الجامع بش يسكر ويردوه بار! قلو ضمان الحرية الدينية

يخي فما شكون
مشبش يضمنها؟ تي الوطد قالك عنا رفقاء حجاج بيت ربي وإنت تقلي ضمان درة شنوا! حتى هذا كلام! حملة التسييس في المساجد مع الوعي المحدود والجانب التقديسي تخلي العملية مربحة ونفهم علاش النهضة تنحي إمام من البي دي بي بش تحط إمام نهضوي كما صار في صفاقس. الوقاحة والإستهتار بالمعتقدات المذهبية وصل بيهم بش ينحو إمام اباضي في اجيم جربة (نأكد إنو كان صباب كبير) وتعويضه بإمام مالكي ولا سلفي ولا شنوا المهم عرفوه مش اباضي من تكبيرة الإحرام ، قال شنوا الكلنا مسلمين وكيفكيف، قالولهم أهوكة فما جامع المالكية قلك الناس الكل تصلي معانا، كان هكا وما وصلوش للسلطة وما يحترموش الأقليات ، ملا كان جات بيدهم كيفاش؟




وهكا بش نتعدى لحكاية إيران، لهنا نحب نقول التاريخ لا يرحم إلي ما يتعلمش منو، معناها كيف نقول منحبش مثلاً ثورة مذهبية ولا دينية معناها كيف تاخذ مسافة من النهضة وما تكونش منساق أعمى وراء قيادتها حتى ولو بش تصوتلهم، هذا ما يعنيش انك تلوث في صورتها، أما لزمنا نتعلمو من تجارب الدول الأخرى وكيفية إنهاء ثورة، ماهيش بالسهولة إلي نتوقعوها كيف نشوفو اش صار بعد ثورة روسيا وثورة إيران، معناها التعلم من التاريخ مهوش هجوم غير مبرر ضد النهضة بل إنارة لكي لا نسقط في أخطاء سقط فيها غيرنا، والمقصود هنا اليقظة من أي إنحرافات عن مسار ثورة الحرية لا من النهضة فقط بل من جميع الأطراف؛ النهضة والشيوعيون وبقايا

الدكتاتورية والدكتاتوريين الجدد، وما يمكنني ملاحظته هو إنتشار ضاهرة مسكنة النهضة والنهضة فوق النقد الشيء إلي يسهل دكتاتورية جديدة خاصةً مع بروز هذا
الكام الهائل من البرهان بسيس المنتشرين هنا وهناك.

باهي بالنسبة لكتب راشد الغنوشي وبالرغم من إنو تكويني علمي بالأساس، إلى إن معرفتي بكتابة فرويد تخليني نهستر بالضحك من الفقرة المذكورة، خاصةً وإنو المرأة ومهما كان السياق، لا تتمحور حياتها حول وضيفتها الجنسية بل إن المرأة والرجل وحسب علم النفس، تتداخل أفعالهم وميولهمو التطور النفسي والتكيف الجنسي الاجتماعي يرتبطان بالسن وبتطور الفرد جسدياً واجتماعياً بصورة وثيقة، أما لا علينا ممكن أنا ضيع فيها وكتاباتو كمفكر لا تعنيني قدر مواقفو كسياسي،

لا علينا نمشو توا للمغالطة الكبرى والمحرمة وإلي من كثر ما سمعتها ولت تسببلي توتر في أعصابي
كيف نقول أنا مسلم وما تمثلنيش النهضة والنهضة لا تمثل الإسلام بجاه ربي وينو الإقصاء؟ توا مؤخراً أي واحد ينقد النهضة يجيه كيل من السباب المجاني، هاو تلميذ بن علي ويدعو للإقصاء! براس أمك كيف انتي ما تمثلنيش وينو الإقصاء؟ توا هبال هذاية ولا تهيبيل؟ (سامحني أما النقطة هذي بالذات من كثر ما سمعتها خايف كان يحكيهالي خالي (النهضوي) ندغرو بسكينة و نباسي في جرتها*)
هذا رويق حزب فوق النقد ونظرية الهولوكست كما إلي حكى عليها يوسف لهنا، ما يلزموش يتسخر، كأنو احنا ناقصين تقديس وتكفير

خلي نزيدو إقصاء، تي هما

قال شنوا إلي ما يحبش النهضة

كافر وكما قبل إلي يدعو للعلمانية كافر، وهما لعباد إلي تكفر ماهيش في ثقافة الطالبي ولا

جعيط

...إلخ خلي نزيدلهم حجة الإقصاء ملحيط، يخي يا أخي نرى انك متصلحليش وما تصلحش لتونس إقصاء هذا؟

باهي بالنسبة للي صار في قليبية توا نمشي معاك إنو فيه استفزاز (غير مرغوب فيه حالياً لحساسية الضرف لكنه ضاهرة صحية لنشاط المجتمع المدني ويصير في كل الدول الديمقراطية وين تلقى تظاهرات مناوئة) ، أما ماكانش التجاوب معاه بالطريقة الوديعة إلي تحكي بها فما كاميرا تخطفت، وفما تكفير وسبان من الجهتين أما جيست حاجة التشبيه بمنع البي دي بي والتجديد مجانب للصحة، كيف تلقى عباد تحب تدخلباش تناقش ماهيش كيف عباد تمنع تجمع، وبالمناسبة صفحة الحقائق الخفية إلي نشرت هذه التدوينة، كانت تبارك

هجمات عنيفة على البي دي بي والتجديد

لكن هذا منتظر من مثل هذه الصفحات المنافقة بالرغم اني سمعت إنو صديقنا المدون محمد تيتو متع المتنوشة معاهم، أما يا خويا مش معقول هذا الإنفصام


بالنسبة لمجموعة الفدلكة (إلي مانيش داخل في حتى وحدة فيهم إلى متع الطماطم خاطر بالرسمي نحب الطماطم أكثر من راشد الغنوشي و ضهرلي أنا حر في ميولاتي، يوليش زادة كره الطماطم وعشق الشيخ راشد واجب ديني أو أخلاقي؟) أما بش نعطو صورة كاملة، المجموعات هذي ما تعني كان المتطرفين وفي سياق رد على الصفحات والمبيدات القامعة لحق التعبير والأراء مثل هذي، إلي تطالب فيا بالهجرة نحو لامبيدوسا

بالنسبة لإحتقار المرأة، مثلاً حسب منفهم من كلامك نتعرفو عليه من خلال تصرفات عائلة الغنوشي وهذا إنجمو نعرفو من خلالو إلي النهضة بش تسمح بتعدد الزوجات بما إنو الشيخ راشد متزوج زوز نساء

بخلاف كلامهم على حقوق المرأة عند الطلاق.. إلى غير ذلك، معناها المنطق متاعك نفهم منو إذا ولد راشد الغنوشي معلم في الكورة، تونس بش تهز الكوب دي موند إذا شد الذيخ راشد، هل متشابهات الشعبوية ما عندها حتى معنى كان عند أصحاب العقول البسيطة

بالنسبة للعباد المتطرفين وإلي يسيئو لقضيتهم قبل النهضة نقلك إي نعم موجودين وحكيت عليهم قبل مثال لهنا ولهنا أما هذا ما يعنيش إنو يبرر الكم متع المغالطات المنتشرة.
ملخر بالنسبة ليا كنت نستنى في برامج قبل ما نعطي صوتي أما بتصرفات النهضة مانيش باش نعطيها صوتي مش دخولاً في النوايا أما كي نسمع أفكار من قبيل المنع التدريجي للخمور نعتبرو إعتداء على الحرية وما صارش في أوج الحضارة الإسلامية وللي ما يعرفش نورمالمون يتذكر شوية أبو نواس إلي يتغنى بالخمر والخمارات.
النهضة ما تستحقش الحديث عليها هذا الكل خاطر في كلمتين تنجم توصل إلى فشلهم السياسي ورغبتهم الوصولية، كيف تسمع أفكار خلاقة مبدعة كيف هذي تقول يرحم الأم إلي جابت:

(المكتوب غادي:

من النقاط الهامة التي طرحها الدكتور عبد اللطيف المكي هو تردي قطاع الخدمات في بلادنا و قال أنه نشهد يوميا إزدحام كثيف في قطاع النقل و المستشفيات(تأجيل المواعيد علاج المرض بأسبوع وأشهر في بعض الأحيان) وعديد الخدمات فيحين أن لدينا عديد العاطلين عن العمل من أصحاب الشهادات العليا و غير حاملي الشهادات و قد طرح أن من واجبنا أن نقوم بإنجاز مستشفيات جامعية أخرى و مشاريع نقل أخرى وتحسين البنية التحتية وتطويرها بما يفتح باب التشغيل أمام غير حاملي الشهادات وبما يفتح أيضا فرص هامة لإنتداب إطارات من حاملي شهادات العليا وبذلك نكون قد حسنا مستوى الخدمات المقدمة للمواطن و فتح باب تشغيل هام
admin 2

Par : شباب حركة النهضة الاسلامية على الفيس بوك)

ولا تسألهم على تهربهم من إمكانية عقد ميثاق جمهوري (مهوش كما قيل انها مبادرة المواطنة بل يقع عقده داخل الهيئة وتنجم تلقاها بكل وضوح لهنا وتهرب واضح، توا يخي أنا باش نعمل إلتزام أخلاقي نشور الشعب؟ ولا الأحزاب الأخرى؟ شاورت الشعب باش تعمل القانون الأساسي؟ يخي الشعب باش يصوت للمبادئ متاعك ولا هات يصوتلك وأنا نعملو اش يحب،كأنك تقول لحزب بيئي
(فش قام تكون بيئي ستنا موافقة الشعب

ولا السطو على المنصب الجهوية كما المجلس البلدي إلي عينو فيه خالي في
إجتماع حزبي داخلي لتكريم مساجينهم
!!!

ولا يجيبلك في اجتماعاتو بسيكو م بش يسيب إرهابو الفكري تحت تفاعل الجمهور : "

"كان جات عندي القدرة نعطيهم بالكلاشينكوف كما صحيبنا أذاكا الي عمل مايكينغ أوف"

الحاجة الوحيدة إلي نراها ممكن تخلي النهضة تربح هي نظرية الحكم بحق إلهي بما إنو سي اللوز يقول إن الله قد باراك مشروعهم وزكاه (الفيديو بدايةً من الدقيقة 9 و-15 ثانية) ومن السذاجة تاعو قال والدليل هذا النصر العظيم، على حسابو ربي يبارك مشروع إسرائيل والدليل الانتصارات (الحقيقية مش الوهمية ) متاعها المتاتلية على أمة خلت أمثالو يصبحو خطباء فيهم

أية افرق الحضبة من غادي

فديت من حالتي من بلادي من جلدتي.

فديت

فديت من هالأشكال

فديت من هالزمرة المتثاقفة

فديت من هالبهايم هنا وغادي

فديت ملتنبر

فديت من إنعدام الحلول وتسكير البيبان و no we can't

فديت من هالخونجية والمتخونجين والإسلاميين و"المسلمين " وأشباه أشباه "المسلمين"

فديت من إلي معندهم صنعة كان يسبوا الخونجية والمتخونجين والإسلاميين و"المسلمين " وأشباه أشباه "المسلمين"

فديت ملي مسيبين لبلاد تتباع ولاهين في تفريكة علكورة ولا على نسمة ولا على بولحية يخطب في موريتانيا

فديت من قصر النظر وغض البصر وجيل مترباش.. على سلاح الضعفاء :التكريد بلحجر

فديت من ناس تلم لفلوس للجمعية وتوانسة فالصومال بش تموت..

فديت ملي يديبلاسي لطرف الدنيا وميشوفش خواتو ميتة بالشر على حدود الدزاير...

فديت ملي حاسب روحو مثقف وموهوب ووليدها وحر وهو في مخو dogme عايش به مهلوس به

فديت من روحي

فديت من التنبير

فديت ملي مايعمل شي كان يسب (كيفي توا) أي حاجة كومانتير أي حاجة يسب، أي حاجة يتمقعر، عندو الحقيقة كان هو

فديت ملي يسب فالكورة يسب فالدين يسب فالعباد يسب فالميديا يسب فاللي يغنوا يسب فاللي يشطحو يسب فالعالم وحدو لا شريك له معصوم عن الخطأ (مايعمل في شي )

فديت ملي مخاخهم فروخ ومسكرين أكثر ملخوانجية وكي تقول السلام يقولك ملا متخلف رجعي تسخف مرضت بعادات التخلف

فديت ملي تقوللها السلام متردش عليك..

فديت منهم والبلاد دخل في حيط

فديت من بهامتي وتشاؤمي إلي فولت به

فديت ملي في مخو 3/4 في موضوع العذرية كفرة وإهانة وملي في مخو لابسان جيب طريقة إحتجاج

فديت ملفيمينيست و انتي فيمينيست

فديت من حقوق البيئة والحيوان والمرا والطفل والشباب والعجز

فديت ملخضر والزرق والحمر والبنفسجيٍ _بطبيعة- وخاصةً المتلونين

فديت ملي لعباد تاكل مل زبلة وعندو صحة رقعة يقولك تونس بخير

فديت ملجهويات والشتائم والتصطيك

فديت ملقوميين والأسلاميين واليسارين والمعتدلين إن وجدوا

فديت ملي يقولك وسطي معناها منافق وملي يقولك الوسط (كيف الناس) هو الحل...

فديت ملي يدخل لطرح كورة حربي ورزق يتبع وهو يتفرج كل...

فديت من حالتي من بلادي من جلدتي

فديت من هلجمعية المتثاقفة

فديت من ذوي الأراء العادمة والفدلكة الماسطة والخيال المحدود والنظر الضيق

bref تنفيسة على حالتي فديييييت

مؤامرة خطيرة

ويكيلكس مؤامرة!

قطر تنظم كأس العالم مؤامرة للتطبيع!

ناس نسمة مؤامرة!

شلايك مسممة مؤامرة!

معمل ياجور في الحومة مؤامرة!

نشري كوكا مؤامرة!

تلعب كورة تشد صحيح كونتر جمعية مؤامرة!

تقول كلمتك عندك خلفية ومؤامرة!

تي فك على مذهبي أنامتأمر واعملي عملة
!

شمسنا نحيبوها يجيش نهار ونبيعوها

خاطر فما برشة عباد تسخيل المدونين من واجبهم إيجاد الحولل وإصلاح الأوضاع... كأنو المدون ذو جاه، ولا عندو سلطة ، ولي يقدر يعمل

أما أنا قلت ميسيليش خلي نحاول نشوف حاجة تنجم تنفع لبلاد ،
أنا بحكم دراستي (هندسة) لاحظت إلي لقورة لاهين برشة بالطاقات المتجددة وخاصةً الشمسية وفما مشاريع عملاقة كما

DESERTEC http://www.desertec.org/

ولاغيرها بصدى الإنجاز أو

conception

أما احنا في تونس مازلنا بعاد

المشكلة في الطاقات المتجددة إنو انتاجيتها طايحة مقارنةً بالكلفة، كيفاش? معناها بش تدخل ف الربح لازمك تصبر برشة، الحاجة هذي متسعدش رؤوس الأموال الكبيرة هذاك علاش أغلب النشاطات لكبيرة ممولة من الدول وإلا فيها حوافز كبيرة من الدول للخواص وإلا في نطاق مجموعات محلية (ألمانيا)...

في تونس احنا ونظراً لمحدودية موارد الدولة - والنظرة المحدودة للمسيرين ونظرية رؤساء الجمعيات: نحب نربح تو حتى ولو كوب د موند مبعد- صعيب إنو يصير تطور كبير من غير استثمارات خارجية وقروض ... ومع ذلك إنجموا نبيعو نور شمسنا (طاقة كهربائية ونصدروها خاصةً وإنو التكنولجيا تطور وواللت أرخص وأكثر إنتاجية أضعاف قبل،
أنا، ومنمثل كان روحي، نقترح تشجيعاً ل"مجهودات" ال

-STEG

!! نقترح نحطو معلوم فالفاتورة الموقرة بعنوان مقتطع لمشاريع الطاقات المتجددة -الشمسية في تونس - لكن بالطبيعة المواطن مش ناقص تزيد على ما بيه تريشو. لذلك تكون في بلاصة معاليم التلفزة إلي معندها حتى معنى في عهد البارابول
بحكم منمثل كان روحي نحب نعرف تجاوبكم مع الموضوع هذاك علاش عملت

SONDAGE

باش نشوف التجاوب مع الفكرة الرمزية

-خاطر معاليم التلفزة متعملش برشة حاجات قد ماتعمل ضغط عل حكومة باش تواريلنا اش تعمل بهم لفلوس ووقتها تو تتحل العينين -
كان فما شكون

INTERRESÉ

يقلي نبعثلو ليان وحتى كان لزم كيفاش تركب معمل

PANNEAUX SOLAIRES

و زادة

SCHÉMA

متع سنترال

BASÉE

علبلار

-مش من راسي LIENS-

معلومة أخرى قد تكون مفيدة لمن يريد

PANNEAUX SOLAIR

ينجم عبد يركبوا في دارو ويبقى مربوط ب

-STEG

ومرة ياخو من عندها ومرة يبعثلهة فاتورة واحنا في بلد الشمس الدائمة ديمة نبعثولها -الفكرة هذي للي مفضل فلوس ولي يحب إستثمار بعيد المدى خاطر كلفة التركيب مش رخيصة برشة وفيها تشجيعات

Ø Une subvention du Fonds National de la Maîtrise de l’Energie (FNME) représentant 30% du coût de l’investissement, plafonnée à 3 000 dinars par kW ;

Ø Une surprime de 10% du coût de l’investissement accordée par le Ministère Italien de l’Environnement et du Territoire (MIET) ;

Ø Une participation en nature de la STEG qui consiste à la fourniture à titre gratuit d’un onduleur ;

Ø Un crédit d’une durée de 5 ans qui sera remboursé sur la facture STEG sans intérêts grâce à la bonification accordée par le MIET.

-

يتبع ملف الطاقة الشمسية

plus, liens si vous voulez

http://www.webmanagercenter.com/management/article-96298-75-du-plan-solaire-tunisien-sera-realise-par-le-secteur-prive
http://www.eco-solaire-zarzis-djerba.com/
http://www.soften.com.tn/index.php?option=com_content&task=section&id=2&Itemid=2
http://www.made-in-tunisia.net/data/et_recherche.php?id_ps=205164&mode_recherche_et=ps
http://www.made-in-tunisia.net/data/et_recherche.php?id_ps=202662&mode_recherche_et=ps
http://www.made-in-tunisia.net/vitrine/3_catalogue.php?id_ps=257393&tc1=lKuWm6qa

http://www.csner-tn.com/fr/lien1.php?ID=2

كلاندو VS المدونون الوطنيون

أنا نرحب بحرية الرأي وخاصةً بوجود التجمعيين فالفضاء الافتراضي (على الاقل نوليوو نفهموهوم)

أما فما ممارسات مافهمتهمش كيما

هاذي

هذاك علاش حبيت نقول إذا تعمل في تعاليق من باب

أعرف إلي مدونة إيكسترابلج تتبنى شعار مدونة غدوة نحرق

1
باب الرد والحوار يبقى مفتوح والرجاء المرة الجاية تكتب كلام مفهوم مش نقتا على خاطر ماهياش مصبوبة عندي
2

العفو على العنوان إلي على طريقة الجرايد بودورو معندوش ربط كبير بالموضوع لكن على كل حال يبين أوجه الاختلاف في اشكالية القفة

هل يعلم عمار بوجود البروكسي ؟

هل يعلم عمار بوجود البروكسي ؟

الاجابة البديهية لسؤال بديهي من هذا النوع هي نعم

إذاً علاش؟

باش يعفس فينا؟

باش يشوه سمعة بلادنا؟

ولا باش يوري للعالم الكل إنو يعمل اش يحب وماعندك متعملو تحدي معناها ؟

مرة أخرى عمار يتحدى الجميع بحجب مدونة أفكار ليلية و بالمناسبة نعلن تضامني مع طارق الكحلاوي

ومن شيرة لخرى نقول لعمار احجب كيف ما تحب معادش يقلقني ربي يخليلي لبروكسي وبرى احجب لغدوة كان تحب حتى الموقع هذا يستحق الحجب كان تحب تحجب مسالش

http://www.carthage.tn/ar/index.php

ونوعدك بش متكسرش راسك برشة بش نعطيك ليستة متع مواقع تستحق الحجب

وهو دفعة أولى

*غوغل نظراً لكثرة استخدامه من قبل التونسيين كما انه من يقف وراء اليوتوب أخطر موقع في أسلحة الدمار الشامل شهرت عند البعض انترنت. وهذه بعض خيوط المؤامره التي تمس من أمن البلد واستقراره

*فايسبوك تويتر وكل المواقع الاجتماعية لانها توفر فرصة الاجتماع بدون ترخيصو في هذا إنتهاك لقوانين البلاد

*بلوغر لينهوا منبر إعلامي غير مرخص وخاصة أن لحاجة لنا حالياً لذلك في ضل وجود T7 وحنبعل والحدث وكل أننس التي تقوم بواجبها والأجدى المضي في درب اللحاق بالدول المتطورة...

من غير مزية عميراتو

تدوينة بيضاء من أجل حرّية التعبير و التدوين

ايمانا بالقضية وتفاعلاً مع تدوينة براستوس

DSL Bloggeurs patriotes - فهمي رزين

أول ما حليت تن بلوغس وشفت هذا

فهمت حاجة أخرى سامحني مازلت مبتشي على القفة بمفهوم الكلاندو سامحني مرة أخرى

فكر يا أخي: على هامش المبارة والتدوين

فكر يا أخي
أنعش أفكارك
لا تتبع القطيع
لا تتبع الاعلام
فكر بنفسك
أنتج نسقك الخاص
تفاعل مع الأخرين
عبر عن نفسك وكن أنت لا أحد غيرك
فجر أفكارك
ابحث عن الحقيقة
وانشئ الرأي العام

إلى من قال إن الشعب بلغ من الوعي ما ...

علاش مازلت تواصل فالرقابة

علاش مازلت شد الصحيح في الوصاية المفروضة

علاش إذا الشعب واعي كيف ماقلت تحمي فيه ملإشاعات المغرضة

إذا هو واعي ينجم نرملمنت يفرق بين الصحيح والغالط

سامحني (ميجدش عليك نطلب فالسماح) أما راك غلطت على الأقل مرة فالفازتين هاذوا كان مش فالإثنين

منين قلت حكاية الوعي ومنين أعوانك حبسوا فاطمة
arabicca

Merci عمار

في التدوينة هذي وفي نطاق رفع التحديات من قفاف و بنادر نحب نشكر عمار بسمي وبسم كل المدونين (عندي الحق كيف مل رمع يناشد

(بسمو وبسم العملة وعائلاتهم والمنطقة ككل

شكرا عمار لتوحيد صفوف المدونين في 4/ 11

شكراً عمار لفسح المجال للمدونين الجدد للبروز (في نطاق تشجيع الشباب) عبر غلق المدونات الناجحة

(شكراً عمار للفتة الكريمة لموقع الجزيرة (تشجيع الانتاج الوطني

شكراً عمار وإلى الأمام في بلد التصنسير الدائم
عاش عمار إبن تونس البار

كان عمار فاصبحت لدينا عمامير (جمع عمار

كان عمار فاصبحت لدينا عمامير (جمع عمار

كان عمار

كان عمار و كنا صغار

نعم كنا صغار نؤمن بالإتحاد قوة وتفاهات يلقيها علينا الكبار

كنا نسبه بإستمرار

غير مبالين بالاخطار

بل ونبالي لكن الأدرينالين يجعلنا مع الأقمار

في سمو و عظمة الاخيار

***

ذهب عمار

ذهب عمار وصرنا كبار

نعم صرنا كبار نعرف كل الأسرار

لا نبالي بتفاهات الإتحاد و حدوتات الصغار

صرنا نتناقش بإستمرار

لكن لا وجود لاخطا ر

لذلك لا نبالي فاطلقنا العنان للأفكار

أفكار ليست كالأفكار

***

خلناه ذهب عمار

خلناه ذهب عمارو بقينا كبار

نعم بقينا كبار نعرف كل الأسرار

عرفنا طريق الاستنيار ... الاستحمار واللاستقرار

صرنا نتساب بإستمرار

فلا رقابة ولا حصار

سباب وشتم وإحتقار

بلا عمار :لقد طردناه عمار

***

طردنا عمار

طردنا عمار بمستوى تدوين يجلب العار

نعم يجلب العار للاخرين طبعا أولئك الأصفار

كال **كلام بذئ ينتهي بال*ار** فار مثلاً

تجمع الاستخضار

ضد تجمع الاستصفار

كان تجمع البنفسج والاحمرار

فصار تجمعين وعمامير أين أنت يا عمار

اشتاق إلى عمار الذي اعتقدنا طرده فأوجدنا عمامير لا تحجب لكن تسب لا تبني بل تهد اشتاق إلى مقص عمار عود إلى الديار فالصغار لم يبلغوا من الوعي ما يؤهلهم إلخ ...

تنويه؛

نحترم الوصفين وراء المدونات العمارية لكن ضد الفكرة لا الأشخاص

هذه التدوينةلا تمت للشعر بصلة لكنها

parodie

لبعض محاولاتي الشعرية الفاشلة