علمينا ياتونس معنى الرجولة

عمري ما كنت نمن بالوحدة العربية ، إندماج مغاربي ممكن، أما وحدة عربية عمري ومنعرفش علاش ممكن إندماج إقتصادي ولا ثقافي كما توا نسبياً، عمري مكنت تعجبني العنتريات والخطب العصماء ومنعرفش علاش ، أما ساعات كي تقرا حاجات كما هكا

'علمينا ياتونس معنى الرجولة, فقد طال زمان النعاج, علمينا أن في العرب مازالت رجال, علمينا أن في العرب مازالت حياة. أزيلي اللصوص عن كاهليك حتى نتعلم منك ونعرف أن سور المرعى الذي نعيش داخله له جانب آخر يطل على الحرية والحياة,استمري ياتونس بالثورة'

وتتحرك فيك حاجات متنجمش توصفها و ماتعرفش علاش ؛ تفهم إلي فما برشة حاجات تجمعنا مع شعوب مقهورة وإلي معملوهش شباب

اليونان ممكن تعملوا إنت للناس،

ممكن تكون فيتنام العصر (الهند الصينية بمصطلح زمن الإستعمار )،

تفرح وماتعرفش علاش

وتحس بمسؤلية وماتعرفش علاش ،

تعرف إلي ما صارتش حاجة كبيرة وإلي الثنية طويلة، أما قلبك يدق وماتعرفش علاش ويطلعلك الأدرنالين وماتعرفش علاش ،

تحس بروحك طفل صغير يحلم،

كيما ماتعرفش علاش طفل صغير ديمة يمن إلي ينجم، ديما مايحب كان يربح، زادة ماتعرفش علاش إلي no we can't حاجة غرسوها فينا و كبرت فينا وخلتنا نعيشو بها مع مجموع عقدنا،

أما المرة هذي ماتعرفش علاش تحب تمشي بأحلامك للخر في سنة الشباب ، في ضل رفع التحديات ،ومسك الشباب بزمام المبادرة في كنف حماية مكتسبات البلاد وصيانتها ماتعرفش علاش هالكلام ينجم يولي عندو معنى ؛ ولغة لحديد والنار واللوح تنجم تولي لغة الروح،

ماتعرفش علاش تحب ترجع طفل صغير كيف جا واحد- لكبير فينا والكوارجي فينا- حب يحدد تشكيلة الحومة فالماتش ضد الحومة لخرى مشيت تجري -بالرغم إلي ختارك- وتعيط فليسقط فلان ولتحيا حومتنا ماتعرفش علاش وقتها أمنت إلي تنجم تربح منغيرو ،

وماتعرفش علاش توا كيما وقتها يحبو يقولك حومتك مافيها كان هو كوارجي،

وماتعرفش علاش كي تكبر تتعقد لومور ،

والتكويرة ماتعرفش علاش يولي فيها عباد تتسلل ومتعرفش علاش من سكور 10-8 تولي تكمل 2-1 وتقول ماتش دلول ، أما باقي ماتعرفش علاش تحب تمشي لقدام وتحب تمركي

وتحب نهار ملنهرات تعلم لعباد معنى الرجولة -بالمعنى الإصطلاحي للكلمة في الخطبة انفة الذكر - معناها نسا تونس ورجالها وما بينهما ينجم يكون حدث في التاريخ وماتعرفش علاش مازال عندك أمل صغير

مازال فيك هذاك الطفل الصغير إلي عمرو مسمع بإذا لم تحترق أنا وأنت فمن سيضيء الطريق

أما مايعرفش علاش خاطر ببلاصتو فالتشكيلة ومايعرفش علاش هو وشوية صحابو مايعرفوش علاش خممو انهم ينجمو يربحو منغر الكوارجي فيهم إلي به ويخسروا في العادة، ما نعرفش علاش لتوة كيفاش حتى نجمنا نخمموا هكاكة،

امشي لقدام منغير متعرف علاش

إلي يحرك فيك هو إنت في العمق ، هي البراءة هي الطفولة ومش لازم تعرف علاش

لا دخان بلا نار

أفضل شي إيجابي الأن هو انو يثبت الشباب التونسي أن قراره بيده ولا ينتظر أحداً ، لا احزاب كاريكاتورية ولا احزاب تركب الأحداث ولا أشباه مناضلين تجار القضايا... كلنا ضد الفساد والرشوة والمحسوبية إذا كانت شعارات التشغيل مربوطة بالطرابلسية والماطري ومبروك فليعلم دعاة الحوادث الفردية ومناشدي عدم التهويل ومدعي أن لا مجال لربط الأحداث ، ليعلموا جميعاً أن لا دخان بلا نار

فديت من حالتي من بلادي من جلدتي.

فديت

فديت من هالأشكال

فديت من هالزمرة المتثاقفة

فديت من هالبهايم هنا وغادي

فديت ملتنبر

فديت من إنعدام الحلول وتسكير البيبان و no we can't

فديت من هالخونجية والمتخونجين والإسلاميين و"المسلمين " وأشباه أشباه "المسلمين"

فديت من إلي معندهم صنعة كان يسبوا الخونجية والمتخونجين والإسلاميين و"المسلمين " وأشباه أشباه "المسلمين"

فديت ملي مسيبين لبلاد تتباع ولاهين في تفريكة علكورة ولا على نسمة ولا على بولحية يخطب في موريتانيا

فديت من قصر النظر وغض البصر وجيل مترباش.. على سلاح الضعفاء :التكريد بلحجر

فديت من ناس تلم لفلوس للجمعية وتوانسة فالصومال بش تموت..

فديت ملي يديبلاسي لطرف الدنيا وميشوفش خواتو ميتة بالشر على حدود الدزاير...

فديت ملي حاسب روحو مثقف وموهوب ووليدها وحر وهو في مخو dogme عايش به مهلوس به

فديت من روحي

فديت من التنبير

فديت ملي مايعمل شي كان يسب (كيفي توا) أي حاجة كومانتير أي حاجة يسب، أي حاجة يتمقعر، عندو الحقيقة كان هو

فديت ملي يسب فالكورة يسب فالدين يسب فالعباد يسب فالميديا يسب فاللي يغنوا يسب فاللي يشطحو يسب فالعالم وحدو لا شريك له معصوم عن الخطأ (مايعمل في شي )

فديت ملي مخاخهم فروخ ومسكرين أكثر ملخوانجية وكي تقول السلام يقولك ملا متخلف رجعي تسخف مرضت بعادات التخلف

فديت ملي تقوللها السلام متردش عليك..

فديت منهم والبلاد دخل في حيط

فديت من بهامتي وتشاؤمي إلي فولت به

فديت ملي في مخو 3/4 في موضوع العذرية كفرة وإهانة وملي في مخو لابسان جيب طريقة إحتجاج

فديت ملفيمينيست و انتي فيمينيست

فديت من حقوق البيئة والحيوان والمرا والطفل والشباب والعجز

فديت ملخضر والزرق والحمر والبنفسجيٍ _بطبيعة- وخاصةً المتلونين

فديت ملي لعباد تاكل مل زبلة وعندو صحة رقعة يقولك تونس بخير

فديت ملجهويات والشتائم والتصطيك

فديت ملقوميين والأسلاميين واليسارين والمعتدلين إن وجدوا

فديت ملي يقولك وسطي معناها منافق وملي يقولك الوسط (كيف الناس) هو الحل...

فديت ملي يدخل لطرح كورة حربي ورزق يتبع وهو يتفرج كل...

فديت من حالتي من بلادي من جلدتي

فديت من هلجمعية المتثاقفة

فديت من ذوي الأراء العادمة والفدلكة الماسطة والخيال المحدود والنظر الضيق

bref تنفيسة على حالتي فديييييت

بسيكو م...سوسن معالج ...

1- منعرفش منين بش نبدا المرة هاذي، برشة كلام نحب نفرغ في هلتدوينة، العبد معادش يفهم في شي، لعباد هبلت ولا تتهيبل، توا شنوا هذا إلي صاير عل فيسبوك! لعباد ماصدقت لربي جابولها وين تعبر طاحت تنبر.. تي شنوا معناها جموع مع حامي حمى الدين، مصلح الوضع العربي والإسلامي،المهدي الذي طال انتظاره: نجم الراب و أيقونة الشباب التونسي المتأصل الواعي: بسيكو م..

و جموع مع حاملة لواء الحداثة، نموذج الحرية والتحرر، الناطقة بسم الشعب والمدافعة عن قيام الحرية والمساواة ، السد المنيع لحماية تونس من التطرف والطائفية الزاحفة لنا بقوة نجمة التمثيل في تونس وأيقونة الشباب التونسي المواكب لعصره : سوسن معالج ...

2- بون منعرفش كيفاش باش نوصل أما نورمالمون وحدة وحدة نوصل .. توا الشعب التونسي كيفاش ينجم يرى في بسيكو م ولا سوسن معالج شخصية تستحق حملة ولا قضية هما ولازمها موقف شجاع ولا تستحق تحط تصويرتو على بروفيلك... تي بجاه ربي شنوا باش يتغير؟ باهي تقلي يعبر، يتخذ موقف، ولا باش يوصلها للمحاكم ..تي لهنا مربط لبهيمة مفماش حاجات أخرى أهم؟ وخاصةً شنوا هل فينومان إلي تتخذ موقف وشنوا يخي موقف مايجي كان مع على طول ولا ضد على طول ؟ شي يذكرني بحكايات بوش يا معانا يا ضدنا... أنا ضد لزوز دبر فيا! (ذكرني بواحد كتب أرتكل قلك متنجم تكون كان تصلي مع الخوانجي -ميصلي كان لخونجي- ولا تسكر مع اليساري- ميسكر كان اليساري واليساري لازمو يسكر- ولا منافق يصلي ومع هذا و يسكر مع لاخر!!!!) و تي شنوا هلسبان المتبادل شنوا هل مستوى! شنوا أفهم الحرية عندكم ؟ تحب بسيكو م حر وإنت تقمع ف أصوات أخرى وتسبها وممكن تقتلها. تحب حرية سوسن معالج وتعيب كيفاش سبوها أما إنت تسب نورمال؟ شنوا هلمخ إلي تخمم به تي أنا بهيم وبهمت...

3--نبدو بالبادئ وكما يقولو البادئ أظلم (ألدين إلي يدافع عليه حتى هو يمن بيها ) سي بسيكو م الرابور إلي عمل غناية مخلش شكون مسبوش وإلي عمل مغالطات تاريخية بالجملة الرجل هذا خذا نجاح كبير (منجمش ننكرو) ولهن لمصيبة لولة:كيفاش ؟ برشة عباد تمشي مع خطاب كما هذا ؟ أنا أول مهبطت لاغناية هبلت كي لقيت برشة حاطين عجبتهم !! هذا الكل جهل بالتاريخ، إنكار للحقائق، توا نورمال نلقى برشة بنات تعجبهم؟ معينهمش في مجلة الأحوال الشخصية ؟!! وسعت بالي وعملت طلة على بروفيلات شوية عباد ، تي schizophrénie كبيرة عباد تصور بروفيلاتهم تقول افيش فيلم بورنو وحاطين عجبتهم!! بنات خلي وأسكت عاد!! عباد تحب صفحات شاكيرا وبسيكو م مفبالهمش كان يسيبوه يحكم معادش لا واكا واكا لا والو !! قلت الشعب داخل في حيط وكل عام وتونس بخير ... تي هو بيدو كما أغلب معجبينو عندو منها إنفصام الشخصية تي يرابي علدين!!! هاو أنا ننخرط في موجات الإفتاء وكمساهمة مني في توسيع دائرة المحرمات نقولوا إلي غناك حرام، وفكرك السلفي لا يجيز إلا ضرب الدفوف ملا إرجع لمولاك وإستغفر عن ذنبك !... هذا بخلاف قذف المحصنات وسباب (ولا تنابزوا بالالقاب) عميل، خائن، فاسق..دعاة تبرج فسق إنحلال ...مريضة نعومي كامبل حايرة في أوهامها ... الرجل زادة احقاقاً للحق حكى بشوية كلام منطقي -نسبياً- على بعض الظواهر السينمائية خاصةً والكروية زادة فكرت المغلوطة حول القومية (حركة توحيدية بعثية) لو بدلها بمفهوم الدول والإمم (الأمة التونسية عند بورقيبة) نوافق فيها شوية.. من ناحية التحليل

4- المشكلة والمصيبة لكبيرة إنو الرجل هذا عندو أكثر من 60000 معجب فايسبوكي فالعلن وما خفي كان أعظم! تي شنوا بربي؟ وينهم السكرجية متع لبلاد انقطعوا؟ -تي لا، حقا حتى هما في صفحة بسيكو م! وراس الغالية فما منهم!) تي لا علينا شبيه الشعب هكا شبيه مينجمش يخمم وحدو، شبيه معندوش وعي، شبيه ميخممش لبعيد؟ شبيه ديمة لزم وصاية على أفكار ؟ شبيه كي يسمع بالدين يجفل؟ شبيه يحب لعباد الكل إلي تحكي بسم ألدين ؟ شبيه إلي يسمعوا يطبقوا كي التقو ؟ شبيه شبيه شبيه.. تي لبلاد دخل في حيط على هلدزة زعمة هذا الكل منين ؟ مش غلطة هذاك الرجل إلي ج نهار وقللنا إن الشعب بلغ من الوعيو النضج ما يؤهله الأن يحكم نفسه بنفسه... تي هو طلع ...-كما غناية راب أخرى -brrrr... يغلط فينا! يفلم وبالعكس يزيد يهمش فالشعب بش منين يقول الفرنسا كان نسيبها لبلاد ديمقراطية تولي جارتك إيران يبدا عندو الحق..... تي شبنا هكا؟ نحب نبدلو هالشعب هذا كرهوني في روحي. عباد اندفاعية بإمتياز مراهقة على الدوام يرى الحل في أمير المؤمنين الفيلسوف : بسيكو م ... ملا إفلاس سياسي وفكري وثقافي قال وعي لا مانبلسيون الصحيحة هي إلي عملها بن علي للشعب ولك إنت بش خرجك تخمم هكاكة...

5- باهي توا نتعدو لسوسن معالج, لمرا تخدم على روحها صحيح، عندها أفكار تتنافى مع غالبية الشعب (نرى تونس هكا: تونس مازال أغلبها-مش الكل-

ميقبلش مرا تسكر قدام لعباد بالرغم إلي منين حضرت فحفلات وإلا مهرجان الفيلم ولا ... اكتشفت إلي فناني تونس اغلبهم يسكرو من غير عقد ونفاقهم يظهر في أعمالهم وكلامهم في التلفزة وين تلقى حشمة ونفاق وخوف ملشعب )، محرحرة عندها جرأة عادية ولازمة بالنسبة ليا، ، أما للا سوسن معالج ماهيش رمز ماهياش صاحبة موقف مالها كان ممثلة تناشد منين يعيطولها مالها كان وحدة تهرج برشة مرات مالها كان مرا تخلوض كيما بسيكو م تقول كلمة في بلاصتها و-10 لا, ساعة تخو وتعطي أما تضحك وتفدلك ولباس!

6- المشكلة لكبيرة وين؟ المشكلة يا سيدي بن سيد إنو لعباد هاذم ولو قيادة عظمى، أي راسي شنوا هالشعب؟ شنوا هل فكر شنوا هلتنوير؟ أنا نقول شنوا هالحالة الكلبة! توا واحد يقول مبدلش تصويرة خاطر الفاهم بوكدس إلي مشدود يبدل تصويرتو خاطر مصادرة حق الرأي البسيكو م !! بالرغم إلي لازمو يزيد يقر ويعرف إنو غلط ويصلح اخطأوا التاريخية (مازال كان سلطان عبدالحميد بش يولي بطل!!) ولا أحرف مازال كان سوسن معالج بش تولي رمز !! وندافعو عليها تي من شنوا؟ مش لازم في عوض ثقافة الصدام ثقافة التصحيح تقول الصحيح توعي؟ مش خير خاصةً المتضامنين مع سوسن معالج يجي منو بيان فيه إشارة للبث الطائفي (معجم الدولة في تقنين الاعتداء علحرية) تي طائفي ولا والو ماهو حرية تلبس اش تحب لمرا والمشكلة يتكلم بسم تحرير المرأة!!؟ مش خير حرية المساجين السياسيين في بلاصة مصادرة الحرية، توا سي خميس الخياطي ولا سوسن معالج إلي نحبو ندافعو عليها بسم الحرية خلي حرية لغيرك زادة !! ملة عوج! أحرف يجيش منو مثقف وقاري ويقلي الحداثة الحداثة الحداثة على بعض ونة حسو منعرفش علاش يحكي! نعرف الحداثة فالفلسفة وحدة من بهامات ديكارت -مش شوية - وفي التاريخ فترة تاريخية مشات على روحها وماعندنا فيها حتى مكتسبات !! ليطمئن قلبك !! أما ديكارتياً مالها كان تبهم بهامة من متتبعاتها مركزية العلم والفكر و الفكر الهندسي الحتمي قضى عليه آينشتاين من هاك العام... تي أحرف بش تكون "حديث" لازمك تمن بربي (ديكارت قلك أثبت وجود الله -قلتلكم عندو برشة بهامات- خاصةً هذي كعبة لوجيك ضحكة عملها ) وحسب منعرف كلمه الحداثة في تونس عندها معنى خاص مازال مستعصي علي

8- مربط البغلة: توا يا مثقفين يا نخبة يا واعيين يلي فايقين على رواحكم يا ناس يا عالم يا مجتمع ... براس إلي يعز عليك بجاه سيدي محرز بجاه سيدي بلحسن (مش طرابلسي) توا تونس فرغت ملمشاكل بش نولو كي فرنسا نخلقو مشاكل غالطة أنا مانرى كان إنو إلي لازمو يتغير وإلي الأطراف الزوز متحبوش هو السبب وهو إلي لازمو يتبدل إحشم على روحك كان شهي تبدل تصورتك أهوكة الفاهم بوكدس أهوكة بن علي وعليه قاطع ومقطوع قالوا بسيكو م قالوا سوسن معالج... ختاماً صدق من قال فرق تسد وفلم من قال إن الشعب عندو وعي: تي شعب ومعارضة ساعات أتفه ملحاكم ويستاهلوا ساعات نقول ! ملا مواقف وملة بطولات!! وكل عام وتونس بخير

صور للخاطفين

منتصر ضاع،لقاووه

الجمهورية ليها 36 سنة ضايعة، شكون يلقاها

صور للخاطفين

الرجاء من كل مازوشي لديه معلومات أن يبلغ مكاتب الأمن

مؤامرة خطيرة

ويكيلكس مؤامرة!

قطر تنظم كأس العالم مؤامرة للتطبيع!

ناس نسمة مؤامرة!

شلايك مسممة مؤامرة!

معمل ياجور في الحومة مؤامرة!

نشري كوكا مؤامرة!

تلعب كورة تشد صحيح كونتر جمعية مؤامرة!

تقول كلمتك عندك خلفية ومؤامرة!

تي فك على مذهبي أنامتأمر واعملي عملة
!

مرأة و مع ذلك عربية

-1-ماهو سمعتوا ب إجتماع عملوه نسا لعرب ... تي معناها نسا الرؤساء وال ملوك وسلاطين..ماهم عملوا قعدة في تونس بش يتناقشوا حول قضايا المرأة العربية. عاد أنا خممت -صحيح بهيم mé ça arriv- قلت كيفاش ينجمو ينفذوا القرارات إلي بش يعملوها...خممت لحظة فال croisement de jambes قلت ahhh عمك العربي يتأثر برشة بالحكايات هاذوما مبعد تذكرت بنات الليل "ونهار زادة" والجواري و ما ملكت ايمانهم بنسبة للملوك "المتدينين" (أمورهم ياسر واضحة هاذو مدام إدباق العبد [عبد يعصي سيدو] حرام) أكهو عاد مدام ماعندهمش سلطة كيفاش بش ينفذوا القرارات الثورية إلي بش يتخذوها!؟؟.....

2-واحد صاحبي قلي يخي وين عايش ماتعرفش إلي مرت المعلم عندها سلطة كبيرة في أي دولة عربية... قتلوا راني نفركس عل tthéorique معناها كيفاش عملوها هل منظمة autrement dit كيفاش نظموها إذا معطوهاش سلطة كيفاش يحبوها تخدم شنوا أصل سلطتهم(منين جابوها...théoriquement بطبيعة) و إذا معندهاش سلطة أحرف وأحرفين وقتها بالرسمي مرأة عربية -no offens- معناها لمة لتقطيع و ترييش أحوال المرأة العربية ....و زيد أهوكة يعبو أخبار الثمانية..خممت زادة قلت منظمة قايمة على نسا الرئساء إذا مثلاً واحد مطلق ولا مش معرس ولا مرتو ماتت -تصير راهي!!- يخي بسيف عليه يعرس نشوفو مرت لوزير ولا ريس مجلس النواب ولا ولا ...مثلاً كي يبدا المجتمع ياسر أفلاطوني و utopique برشة و يعيش فالمدينة إلفاضلة منغير مؤسسة الزواج...!ولا ماركسيين لين ثاروا عل عايلة ب وصفها مؤسسة رجعية!!!! وقتها منين ال مشاركة؟؟

-3-أكيد عضوة من مجلس النواب و هذي 100% موجودة في تونس مثلاً على خاطر لمرا عندها quota إي نعم لمرا عندها quota في مجلس النواب و في هاذي تلخيص لوضعية المرأة العربية :مرا قاصرة غير قادرة على تحمل مسؤلياتها وتفك بلاصتها يتمزى عليها الرجل ب quota (متستحقوش) pire متنجمش تورفظو يعني ماعندهاش الحق انو تقول انسا الكل ماناش مترشحات يخي هو لا إكراه فالدين w لا فزواج ملا فما إكراه في مجلس النواب يا سيدي معيناش!!! وقتها القايمة ملغاة!!! ملا حالة معناها اشعب مسكين ولا منخرط فال rcd لازمو بسيف عليه يختار عدد معين منسا و كالعادة ماعندك فالهم متختار أما لهنا هاذي قلتلهم اسكتوا و بلعوو زادة "دكتاتورية مقننة"اللهم إنا نسألك حسن العاقبة!! مدام هاذي نتفاخر بها عام وثناش ونزيدو نقلوها للبراينية بفخر..تي شبيك يا رجل مكاسب التحول راهي !!!! لمرا عندها quota في مجلس النواب يا بو قلب!!!!!!!

-4-تي ماهو "no, we can't" ملا كالعادة رضينا (déja معناش حل أخر) المهم خلي نستعرضو قضايا المرأة العربية: شنومة هما زعمة؟ ماهم ضهرلي تحقيق المساوة (معناها حتى الرجال ياخذ quota !) و زادة فما تعدد الزوجات والعنف ضد المرأة (ضرب, viole, سبان, استقواء..) والعنوسة -مفهمتش كيفاش مشكلة- و جرائم الشرف و الخروج ملقراية ولا pluto التخريج ملقراية والعرس بسيف (تي شبيك ما رضاء الله إلا ب رضاء الوالدين)و و ... و بالنسبة l برشة دول متقدمة نسبياً في تحرير المرأة (surtt من ملابسها,) فما كيف ما عنا نخبة نسوية "مثقفة و تفهملهى برشة" همها الوحيد هو الميراث والمساواة فالميراث والحمدلله يا ربي!! إلي عندنا نظام يعمل كان إلي في راسو !! car sinn راهو صارت كارثة عل مرأة التونسية و هاو علاش

-5-يا سيدك ماهو تحب مساواة فالميراث معناها تحب تتعدى النص الديني الواضح في سورة النساء إلي يقسم الإرث وقتها تتسمى حلت لمرا باب المساواة عليها، باب جهنم بالنسبة لبرشا نسا.. : على خاطر وقتها تتنحى كل اجراءت تفاضلية لصالح المرأة خذاتها مل قانون (مفخرة ال quota) ولا مالدين (النفقة) و هذي خاصةً تضر المرا برشة: تصوروا معايا مساواة يولي فيها الرجل مهوش مجبر على القيام بواجب الإعالة تصوروا معايا لمرا هي إلي تصرف عاراجل و ولادهم و كي طلق متخوذش نفقة بالعكس تدفع!!!تصوروا الراجل يحك راسو يطلق من غير crainte لا نفقة لا والو....سلملي وقتها على حرية المرأة surtt لمرا المسكينة إلي تعاني في راجلها و صغار مش بنت تنتخة كل همها ملحياة زيادة في الورثة و كأنو مصححة كنتراتو مع عزرائيل!!!يا بنية اهبطي مل برج العاجي متاعك و شوفي مشاكل النسا بالحق....واللهي نتمنى مل"إعلام التونسي" يفخر بهذي كي نجبدو علمرا خييير ب ياسر ملquota!

!-6-تي على كل حال الحمدلله حالنا خير ب ياسر من عربان متع الشرق العربي غادي عد قلتلهم اسكتوا : نقاش كبير حول هل يجوز للمرأة قيادة السيارة !!أو السفر من دون موافقة الوصي (الأب ثم ازوج)..!! ويوا اديلو..!. ولا خير مل كل نجبدو على تحرير لمرة كأنو كفر وقت إلي أحنا نشوفو فيهم عاملين الروتاناة على بعضهم و الزنأ على مستوى الملوك والأمراء أخر مرة سمعت بنومي كامبل و واحد اماراتي تي يا سيدي حكاية زادة على سرفان لفلوس في الوتلة إلي تبيع الشراب وال مرا معندهاش الحق تطلب capuccin في قهوة ( تي شبيك صوت المرأة عورة رهو) منغير منحكو 3la شريان مركض الخيل في l'angleterre و نزينو لحصنى (بالمعاني الزوز) و منزينوش نسانا (ماهو حرام!!!) تي bordel غادي نفاق منو فيه قال حفاض على مجتمع و هو حفاض عل كراسي هكا علاش تونس كان عندها شوية حق كي أجلت القمة هاك العام w حتى توا كان لزم تتأجل el قمة النسوية ولا كان لزم يلغوها إذا مازال عمك الشيخ فلان يرفض إنو يصلح ولا o- يشد ثنية وحدة و معادش ينافق

8

نرجعوا يا سيدي بن سيد للقمة ماهو جات و حضرت الشيخة وسيدة وللا والسلطانة والناس الكل وقتها مش بعيد برشة على بلاصة لاجتماع في تونس فم سي السيد يحكي

groupeل

بفخر و إعتزاز على مرتو"ماني أنا توا تقاعد

و هي تخدم عاد قامت الصباح تنغنغ عليا في اخدم لوج خدمة و حكايات هكا مفهمتش يخي ماتعرفش إلي نصرف أنا عالدار و زيد أنا قلتلها بطلي انت الخدمة تلهي بصغارك تو نخدم أنا فنوار (عندو الحق في حكاية اصغار) أكهو عاد هي ماهو شدت تنغنغ تسخايل روحها تخدم مع الحاكم معناها ما تتضربش, أنا عاد قمتلها و عطيتها كفوف باهين...."فالوقت هاذاكى عملت هكا عمتك الرئيسة و تلفتت إلأم مازن قالتلها فك علينا بلا مشاكل و تكسير راس أية تجي نمشرعو في تونس نعملوا

collège؛

ملاحظات :

college مش مدرسة دولية :p

لحكاية فالفقرة لاخرى حقيقية (متع الضرب بطبيعة)

ويوفى الحب مرة أخرى

.اليسار والإسلام

1-المرة هذي نحب نجبد موضوع عندي مدة نحب نحكي عليه و منعرفش علاش لتوى ساكت (بطبيعة بخل) أما فما حكاية غريبة في أغلب اليساريين التونسيين وهي إختلاط مفاهيم اليسار مع عداء الإسلام ، أولاً نحب نشوف الأسباب إلي خلت هل ضاهرة متفشية ، وبش نشوفو كيفاش تضر اليسار وكيفاش متناقضة مع الفكر اليساري (حسب رايي)، ورؤيتي لمشروع ولادة يسار "يساري" في أفكارو مش في ادعاءت الإنتماء..

2-باهي كان نحاول نخمم شوية في هالحالة التونسية نقول إلي ترجع لأسباب ثقافية، تاريخية، ونظرية، الأسباب النظرية تنجم تقول واضحة. اليسار فيه الشيوعية إلي تنفي ألدين إلى جانب أفكار علمانية قد تختلط عند البعض مع الإلحاد -والإلحاد طبعاً ليس محرماً في الفكر اليساري- .وأسباب جوهرية كليبرالية الإسلام الذي يدافع عن الملكية الخاصة بشدة والسوق والتجارة كما هو ضد نموذج تحرر المرأة...

باهي الجانب التاريخي حسب رايي يرجع لضهور اليسار الشيوعي في تونس منذ سنة 1920 وإلي شهد ولادة متوازنة نسبياً بمأن كان الهدف الأسمى تحرير تونس لكن مبعد ولى الحزب تتنسبلو أفكار غريبة علمجتمع كما إغتصاب الأم بحجة إنو العايلة مؤسسة رجعية، إنكار حق الملكية، الكفر علنية من رجل متثقف -الثقافة كانت ماركة مسجلة عند الزيتونة، كما الزيتونة توا ماركة مسجلة عند صخر- وإنكار وجود الله... مبعد جات بيرسبيكتيف -أفاق- وإلي كانت افكارها تقريباً تمشي مع مفاهيم اليسارية الأكثر "يساراً" في تاريخ اليسار التونسي حيث كانت تتبنى مفهوم الإنسان ونظرية البروليتاريا كانت مستعدة تقبل اليهودي كما هو خلي عاد المسلم -الموقف من القضية الفلسطينية نموذجاً - لكنها مخذتش صدى عند الشعب كما الصدى إلي غرسوا النظام وقتها من انو الماركسي واليساري والشيوعي والماوي -حاجة وحدة عند الشعب- كفارجي، منبت، يسكر وميصيمش، ويمارس الجنس مع أمو!!

من وقتها بدت تتغرس هالعقلية هاذية وزادت شعلت منين ولى اليسار خطر على الدولة منين ولى يلقى صدى عند الأجيال الأولى من الجامعيين التونسيين -عادي جداً لجيل عصر سارتر وكامو وتعلم في فرنسا وعاصر ثورة 68- وبما انو التونسي بطبعوا علماني -نظرية ربي يهدي- كان لا بدا لنظام من تنفير الشعب من اليسار وبطبيعة أسهل حاجة هي ركوب مطية ألدين والخوف عليه وهاذو خطر علبلاد وعلى هويتها و بالتالي وقع غرس أفكار عداء اليسار للإسلام بش يولي التونسي المسلم "ثقافياً" يكرهوم ويخاف منهم وصارت النقاشات الجوفاء من وقتها مع اليساريين تاخذ مجرى جديد. معادش تسال اليساري فاش يخمم وكيفاش يصلح ولا كيفاش ينفع البلاد، وحقوق العملة، و المكاسب الإجتماعية، بل صار النقاش ما ورائي، ميتافيزيقي، والسؤال الأهم والفيصل تمن بربي ولا ؟ معناها تغرس في فكر الشعب إلي اليسارين أعداء الإسلام، ومن هنا إنجموا نبداو الأسباب الثقافية

3- لهنا نجوا للأسباب الثقافية ، وإلي تتقسم لثقافة الشعب وثقافة اليسار، الشعب واضح مسلم في أغلبيتو، والدليل عدد الجوامع!! أما اش يخلي واحد من عامة الشعب يتناقش مع واحد يساري وهو ميحبش يفهمو وماخو موقف بالمسبق، لهنا عاد تشنع سبان بيا كافر يا زنديق يا بهيم يا إلي متفهش، أما ثقافة اليسار ف لهنا المشكلة شكون إلي عندو ألحق يمثل

اليسار وشنوا اليسار وشنوا إلي يخليني مبكري نحكي عل يسار واليسار الأكثر يسارية... كأني نعرف؟! مشكلة اليسار في تونس هو ف إلي إقتنعو هما زادة بوجوب مقاطعة الاسلام وسبانو -ولو انو فما صحبة بن حزب الله والحزب الشيوعي، الجبهة الشعبية وحماس،وتيار اليسار الاسلامي جملة وحدة في مصر!!- خاصةً بعد أحدث باب سويقة، الثورة في إيران،.. ولا السبان لازم والعرك بن الإسلامين و- و الشرب من مقومات اليسار (قريتها عن مدون "يساري!") والكفر عماد اليسار وولى التخلويذ يكثر وإلي يحكوا بسم اليسارمش الكل- ولات لغتهم سبان وكفر وتمقعير علي يصلو وعلي يعبد وتمقعير على ربي و تعبو بعدم قبول الأخر خلت اليسار متعصب ويبعد عليسار ملخر يسارنا يمين متطرف مسكر كيف الخوانجي إلي يسبو فيه... معادش يسار متحرر من العقد بل يسار ركب لنفسو عقدت ألدين والتعامل معه

4- من جملة من يحكوا بسم اليسار شكون ميفهمش إلي اليسار مجموعة أفكار تقدمية تولدت مع الثورة الفرنسية وجماعة ملجمعية العمومية راكشين عل لسارو مبعد ولى اليسار يطلق على مجموعة أفكار تقدمية لين تقسم وولى فيه الفوضية والشيوعية والإشتراكية ومن مبادئ زادة حماية حقوق الأقليات مش كما قريت في مدونة اليسار صيرورة اقليات -على فكرة مالكولم اكس في أمريكا والحركة المسلمة متاعو تتنسب لليسار و تمثل أقلية - في تونس، اليساري نسا مبادئ كما قبول الأخر. اليساري التونسي ولى ضد الحجاب واليساري الفرنسي يدافع عليه!! اليساري التونسي في عوض يقول أنا منلبسش حجاب ويفسر روحو ويحول يجلب ليه بنات تولي متلبسش حجاب، هو ميقبلش لاخر المسلم، إلي يصلي، يدخلها بعضها علمانية وإلحاد و كفر مع شوية كلام حفضهولو كما المتطرف التكفيري المتعصب والظلامي و... و ولى سلاحو سبان -مش اليساريين الكل- ، نساو إلي فاليسار قبول الأخر والمبدأ ألهام وهو الحرية

5- توا نحب نحكي عل يساريين كان جو يحكموا في تونس شنوا يصير، بش نبدا لهنا ننقل ونعلق على محادثات ونقاشات مع يساريين عل انترنت والفيسبوك

فما شكون قلك يطيح الجوامع أول مايبدى يحكم!!!

فما شكون كان أكثر عقلانية وإيمان بالحرية وقلك نعلن علمانية الدولة ، معناها فصل ألدين ع الدولة لهنا كانت أسئلتي لهم أقرب للواقع وفي نطاق تطبيقي معناها ملخر العيد لكبير عطلة رسمية ولا؟ رمضان سيونس يونيك ولا ؟ ولهنا تصدمت باللي كل إلي حكيت معاهم يقولو لا، مع إنو نويل في فرنسا عطلة -الدولة العلمانية إلي نعرفها وإلي قريبة منا -، أنا نقول إلي اليسار التونسي بأفكار هذي عمرو مايصل لسلطة وكان وصل بش يكون جسر لثورة إسلامية على الطريقة الإيرانية خاطر التونسي يسب ربي ويكره إلي يعمل كاريكاتور عل رسول -برشة عباد-، يفطر رمضان ويحب حماس ونصرالله ويسب إلي يحب يحرق القرأن ...

6- أنا نرى إلي اليسار بش يحول يطبق على أرض الواقع لازمو يبعد علشيوعية وعلى موضوع ألدين وتكون أفكار الإشتراكية تتمش مع طبيعة المجتمع وتخلي مسألة ألدين مسألة فردية ثم كان الفرد وتحاول تبعد على لغة السبان خاطر ماهيش وسيلة تعبير بقدر ماهو انغلاق فكري، بلغة أخرى تتصالح مع ألدين -مش على طريقة الشابي- أما كيما بعض الديكورات الحالية -فما احزاب وحدوية تتبنى الاشتراكية ، حدش كيفكيف- معناها حول تكون يساري تقبل لاخر وتمن بالأغلبية معناها كان تنجم توصل كل اسلحتك إلي مسألة العلمانية إتبع سياسات المراحل أما السبان والإنغلاق والنموذج الشيوعي في الدكتاتورية الدينية -إلي اليسار يتبرى منها متحولش تستخدمها ولو في تفكيرك :كما إلي قال نهدم الجوامع وإلي يقول إلي يصلو بهايم وماعندهمش مخ لازم نقودوهم لجنة الحياة بالسلاسل. ملخر لزام على بعض "اليساريين" أن يراجعو أفكارهم والمبادئ إلي يدافعوا عليها ويبعد عل تناقضات إلي ينشرو فيها

8- على أمل إنو يكون إلي حكيت فيه مايضر حد نحب نقول إنو إلي يحس روحو معني بكلامي ويحب توضيح يقلي -يخلي ميساج فايسبوك ولا كومانتير فيه ايميل- وكان يحب ليان لبعض تدويناتو إلي تسيء -حسب رايي- لليسار وفيها تناقضات من عندو نبعثلو ونفسرلو رايي ومستعد نتناقش بعيد على لغة السبان والتشهير خطرني لهنا منحبش نسب ولا حتى ننقد عباد قد يكون ميحملوش النقد على الملأ وياخذها بعنف وحساسية ويولي السبان خير وسائل الجواب...

شمسنا نحيبوها يجيش نهار ونبيعوها

خاطر فما برشة عباد تسخيل المدونين من واجبهم إيجاد الحولل وإصلاح الأوضاع... كأنو المدون ذو جاه، ولا عندو سلطة ، ولي يقدر يعمل

أما أنا قلت ميسيليش خلي نحاول نشوف حاجة تنجم تنفع لبلاد ،
أنا بحكم دراستي (هندسة) لاحظت إلي لقورة لاهين برشة بالطاقات المتجددة وخاصةً الشمسية وفما مشاريع عملاقة كما

DESERTEC http://www.desertec.org/

ولاغيرها بصدى الإنجاز أو

conception

أما احنا في تونس مازلنا بعاد

المشكلة في الطاقات المتجددة إنو انتاجيتها طايحة مقارنةً بالكلفة، كيفاش? معناها بش تدخل ف الربح لازمك تصبر برشة، الحاجة هذي متسعدش رؤوس الأموال الكبيرة هذاك علاش أغلب النشاطات لكبيرة ممولة من الدول وإلا فيها حوافز كبيرة من الدول للخواص وإلا في نطاق مجموعات محلية (ألمانيا)...

في تونس احنا ونظراً لمحدودية موارد الدولة - والنظرة المحدودة للمسيرين ونظرية رؤساء الجمعيات: نحب نربح تو حتى ولو كوب د موند مبعد- صعيب إنو يصير تطور كبير من غير استثمارات خارجية وقروض ... ومع ذلك إنجموا نبيعو نور شمسنا (طاقة كهربائية ونصدروها خاصةً وإنو التكنولجيا تطور وواللت أرخص وأكثر إنتاجية أضعاف قبل،
أنا، ومنمثل كان روحي، نقترح تشجيعاً ل"مجهودات" ال

-STEG

!! نقترح نحطو معلوم فالفاتورة الموقرة بعنوان مقتطع لمشاريع الطاقات المتجددة -الشمسية في تونس - لكن بالطبيعة المواطن مش ناقص تزيد على ما بيه تريشو. لذلك تكون في بلاصة معاليم التلفزة إلي معندها حتى معنى في عهد البارابول
بحكم منمثل كان روحي نحب نعرف تجاوبكم مع الموضوع هذاك علاش عملت

SONDAGE

باش نشوف التجاوب مع الفكرة الرمزية

-خاطر معاليم التلفزة متعملش برشة حاجات قد ماتعمل ضغط عل حكومة باش تواريلنا اش تعمل بهم لفلوس ووقتها تو تتحل العينين -
كان فما شكون

INTERRESÉ

يقلي نبعثلو ليان وحتى كان لزم كيفاش تركب معمل

PANNEAUX SOLAIRES

و زادة

SCHÉMA

متع سنترال

BASÉE

علبلار

-مش من راسي LIENS-

معلومة أخرى قد تكون مفيدة لمن يريد

PANNEAUX SOLAIR

ينجم عبد يركبوا في دارو ويبقى مربوط ب

-STEG

ومرة ياخو من عندها ومرة يبعثلهة فاتورة واحنا في بلد الشمس الدائمة ديمة نبعثولها -الفكرة هذي للي مفضل فلوس ولي يحب إستثمار بعيد المدى خاطر كلفة التركيب مش رخيصة برشة وفيها تشجيعات

Ø Une subvention du Fonds National de la Maîtrise de l’Energie (FNME) représentant 30% du coût de l’investissement, plafonnée à 3 000 dinars par kW ;

Ø Une surprime de 10% du coût de l’investissement accordée par le Ministère Italien de l’Environnement et du Territoire (MIET) ;

Ø Une participation en nature de la STEG qui consiste à la fourniture à titre gratuit d’un onduleur ;

Ø Un crédit d’une durée de 5 ans qui sera remboursé sur la facture STEG sans intérêts grâce à la bonification accordée par le MIET.

-

يتبع ملف الطاقة الشمسية

plus, liens si vous voulez

http://www.webmanagercenter.com/management/article-96298-75-du-plan-solaire-tunisien-sera-realise-par-le-secteur-prive
http://www.eco-solaire-zarzis-djerba.com/
http://www.soften.com.tn/index.php?option=com_content&task=section&id=2&Itemid=2
http://www.made-in-tunisia.net/data/et_recherche.php?id_ps=205164&mode_recherche_et=ps
http://www.made-in-tunisia.net/data/et_recherche.php?id_ps=202662&mode_recherche_et=ps
http://www.made-in-tunisia.net/vitrine/3_catalogue.php?id_ps=257393&tc1=lKuWm6qa

http://www.csner-tn.com/fr/lien1.php?ID=2

طريق العودة

يومٌ رمضاني، طقس صيفي مشمس، أجواء ترقب في العشية، إذا بسيارة ياسمين أمام الباب، ياسمين فتاةٌ ضاحكة بشوشة، تجمع بين الجد والهزل والعقل: معادلة ندر وجودها في فتاة، وأي فتاة، فتاةأصيلة جهتي، ذات حسب ونسب تقطن فرنسا، ولها من الأصول ما يكفيها شر الانبتات، ومن التلقائية ما يقيها شر النفاق ومن الجمال ما يبعدها عن العقد، أتت و ليتها ما فعلت، سألت عني أمي فإذا بي أمامها، أرقب تأنقاً غير مألوف منها وجمالاً طبيعيا أئلفه جيداً، قالت بصوتٍ هادئ هل لديك من الوقت ما يسمح لك بركوب السيارة؟

إلى أين نمضي؟-

إلى العدم .. droit au néant-

!!!-

عبرت عن استغرابي بكلماتي سخرية عن محاولتهااكتناف الغموض وأنا اركب السيارة ثقة في ما يمكن أن يكون سبب طلبها وتلهفاً لإنهاء ما تريد فعله فموعد الافطار قريب (فما عله يكون سوى طلب مساعدة
انطلقت بسرعة إلى طريق حومة السوق كنت تتجاهل أسئلتي وأنا أعاكسها بادعاءت عن افطارها الذي جعله تهمل موعد الإفطار !!! كانت تتجاهل أسئلتي وتزيد في سرعتها وصلنا مرتفعاً في منطقة القرع، خذت الجنبا الأيسر من الطريق!!، مرتفعا ً ومنعطف والجناب الأيسر من الطريق!! وزادت في السرعة !!!!

شبيك هبلت تحب تقتلنا ؟؟؟-
فكرت في مسك المقود لكني عدلت عن ذلك ففيه خطر شديد، خاصة في ضل وجود المنحدر المحدد لكياني، مضت صور من حياتي في تلك اللحظة الطويلة لحظات اوردت أحداثاً فيها من التفاهة ما يجعلها جديرة بالمحو من ذاكرة أيامي وأخر اعدها ملخصاً لقصة وجودي، هل هي النهاية؟. قطعاً لا.
في ثانية مضى كل ذلك وهي تسرع مصممة، مرتفعا ً ومنعطف والجناب الأيسر من الطريق وزادت في السرعة في الأعلى وأمام المنحدر كبحت دقات قلبي. توقفت أمام منظر الغروب شمسٌ تسقط في بحر وراء الواحة مشهدٌ لا تراه إلي في جربة، أجابت عن سؤالي ببرود من أين تأتي سيارةٌ أخرى في مثلي هذا التوقيت؟ نسبة ضئيلة؟ كيف تكون الحياة بلا مخاطرة تمتع بلحظات النجاة لتعرف معنى الحياة إن الحياة وجدت لتعاش لا لنمل أو نموت (قلت لها سابقاً اتمنى الموت لو مات كل من قد يحزنون عني فلا فائدة من العيش!!) الم تحس بمعنى الحياة هناك الكثير لكي يعاش وقصصاً كثيرة لم تبدأ، ا تسمع الأذان؟ الناس يفرحون ويأكلون لأنهم أجلوا متعة أكلهم ليتمتعوا بلذة الشبع الأن. العمال يبغون النوم ولكنهم يؤمون المقاهي لإحساس أعمق ليلاً.. الدنيا لا يمكن الإحساس بقيمتها إلا إذا فقدتها ولكن إن فقدتها إنتهى الأمر فلا مجال للعود ... إن كنت مازلت لا تبغي العيش فعش لأجلي

!

اقتربت شفتاها من فمي صائم مد عنقه إلى إلهٍ جديد، وعندما فكر في غضب إلهه الحقيقي

إلهاً لا يبغي يوماً أن يكفر به؛ الصديقة والحبيبة والزوجة والخليلة، الفتاة الذي جعلت له في حياته معنى، الفتاة التي أحب وصار معها شابا أخر، شاباً يعيش لأجلها و يقيم كل عباداتها كل شيء سوى معصيةٍ واحدة، خطأ وحيد كما فعل محمد مع إلهه في صورة عبس فعل هو معها، لكنه يحبها حد الجنون حب أكبرر من أمل فتى مراهق وأنقى من الصفاء وأعمق من الألم

وشوش للكائن الجميل الذي أمامه أنه يعيش من أجل حبيبة مجهولة وأنأى بوجهه إلى السيارة معلناً فهمه وانتهاءه من الموضوع
لحظات دهشة وصمت و إنكسار لإلهٍ خسر معركة مع رسول ينشر رسالته، إلهي متعلقٍ بجبرتوه حداً جعله لا يقيم وزناً لعبدٍ يمكنه الكفر بنعمة اصطفائه رسولاً، ولو فعل لا جنبه ذلك ربع ساعة من الصمت خلال طريق العودة......

ملاحظة؛ تمكنت اليوم من إخبار إلهي بكفري وغفر لي ذنوبي..