Le politique et le religieux!

Et nous pâtissons tous de cet état de fait depuis trois décennies. En ce sens que les fondamentalistes radicaux tiennent, à tout prix, à teinter de confessionnalité tous les compartiments de la vie. En effet, il ne saurait y avoir, pour ces doctrinaires de la vision globalisante religieuse, de politique ou de droit ou de philosophie ou même d'économie, voire de science, qu'islamiques. N'a-t-on pas entendu - à titre d'exemple - un " éminentissime " mathématicien, à l'entendement altéré par les thèses distordues islamistes, soutenir, le plus sérieusement du monde, devant ses étudiants sidérés, que dans la géométrie euclidienne, certes, deux droites parallèles ne se rencontrent jamais, sauf si Dieu Tout-Puissant et Sage décide de les faire se croiser ? ! ! Lorsqu'on lui objecta, tout de même, qu'en épistémologie, l'axiomatique mathématique ne consiste qu'à établir des systèmes formels complètement autonomes, ne représentant aucune réalité extérieure où seule compte la logique interne dans une autovalidation, même si par ailleurs chaque système est isomorphe à un pan de la réalité qu'il est censé modéliser, il rétorqua en balayant d'un revers de main ce qui pour lui n'était qu'une vaine ratiocination, que tous les domaines de l'activité humaine, et ce qu'elle produit, appartiennent à Dieu.

Et, voilà que nous retrouvons toujours le même argument qui met fin à tout débat, avant même qu'il soit instauré.
C'est le même fil conducteur qui mène les idéologues de l'islamisme politique à rejeter la dissociation du politique d'avec le religieux, dès lors qu'ils considèrent que c'est là un mode de pensée qui heurte l'essence même de la religion islamique. Lors donc qu'elle érige Dieu en principe absolu de cet univers, hommes, vie et mondes sont la propriété incontestée de Dieu qui détient la Puissance suprême. Certes, la souveraineté cosmique divine est incontestable pour les croyants monothéistes et son omnipotence est attestée. Dieu nous est Proche. Il nous est même plus Proche que notre veine jugulaire, mais rendre sa souveraineté et son omnipotence coextensives jusqu'à la moindre petite circulaire ministérielle reviendrait à la ridiculiser. Vouloir trouver dans le Coran de quoi étayer le moindre petit arrêté municipal n'est pas sérieux. Cela consisterait, surtout, à usurper le rôle de porte-parole de la Providence à laquelle incombent in fine la rétribution et la guidance. Le contact fulgurant et impérieux de la transcendance avec la réalité contingente n'implique, en aucun cas, un protocole opératoire. Ce n'est pas du tout un recueil de règles et de formules pour les actes publics.

En tout cas, ni la Providence ni ses directives ne sauraient être confisquées par qui que ce soit.
Didi!

رد على تدوينة : نقد النهضة

هذي بش تكون لي سابقة بش نكتب تدوينة كرد على تدوينة أخرى ممكن متشجع خاطر المدون المعني بالأمر صديق إفتراضي ليا و نتوقع إنو باب النقاش معاه مفتوح أكثر من برشة دوغمائين (أهوكة ضربتلو اللغة بش ما يدخلش فيا) ، وزادة لأني حسيت إنو لازم تقديم الصورة للعموم و نظراً لطول الطرح خيرت مش بش يكون تعليق بل تدوينةلهنا بش نحكي على هذه التدوينة للمدون بنفسجيت حر كاليميرو ، أملاً في انو يفهمني ويتناقش معايا
حسب ملاحظتي الأولية : كتب الخبر في سياق يطغى عليه إتجاه واحد ومنظور واحد، معناها -مش كيما قال ولا يظهر من كلامو إن نقد النهضة مافيهيش جانب صحيح ما عن حتى علاقة بمفهوم هجمة- نقد النهضة فيه الغث والسمين وأهم حاجة المغالطات من الجانبين، فما أغلاط وفما تمسكين زادة من النهضة و احنا نتعرضو لحملة و احنا يا حليلنا نسخفو و احناحقوقنا مهضومة و نعانو من الإسلاموفوبيا!! توا بلكشي عايش في اللامريك بش تقلي إسلاموفوبيا ؟ تونس أغلبية ساحقة مسلمة وتقلي إسلاموفوبيا؟ توا أنا نعرف حتى السكارجي ماخذ فكرة بهية علي يصلو والملتزمين هاو هذاك ناس طيبة يصلي ويعرف ربي. تي مرة في تكويرة الراجل يحب توش قتلو ما مستنيش الكرة، جاني صاحبي فرد ايكيب وقلي الراجل يصلي مش بش يكذب عليك!!! وإنت تقلي إسلاموفوبيا؟ تعرف شنوا معناها يخي ولا تتهيبل؟ معناها إنت مسلم دنك تخوف، إذا فما خوف من التطرف ما يتسماش اسلاموفوبيا وإلي يمن إلي فما إسلاموفوبيا في تونس يا إما بهيم حشاكم ويا إما لغاية في نفس يعقوب كما لحبيب إلي عامل الصفحة هذي

باهي توا نرجعو للرد على التدوينة، فما إشاعات وإشاعات مضادة، حسب ما قلت إنت إشاعة حكاية الأستاذة والنقاب، أناحسب ماعرفت لحكاية هذي خرجوها برشة ناس متعاطفين مع النقاب على الأقل اصدقائي منهم خرجوها كيما خرجو
هاك الطفلة في صفاقس إلي باعترافها تقبحت على الأستاذ خاطر ما قبلهاش بالنقاب وجابت خوها عطاه طريحة، والجماعة تتبكى والله ما حقوش الأستاذ، نورمال ياكل طريحة وتتقبح عليه تلميذة!، قال شنوا حرية ! والله نتمنى من هذو الجماعة كانهم جماعة حرية, ينادو بالحرية حتى للعرايا معناها كيف يجيك أستاذ قلم ما يقلقكش، ولا وقتها الحرية تولي عندها ضوابط؟ وكيفكيف على المثلية الجنسية.... إلخ إذا إنت تعتبر انها حرية شخصية، ووقتها نفهمك إلي إنت وصلت لدرجة في منظور الحرية متاعك فاتتني وفاتت مخيالبسيط أما ضربان اللغة مش لازم منو.

سامحوني طولت في التعريج، جيست حبيت نقول إلي الدعاية والدعاية المضادة موجودة.

باهي بالنسبة للحرية الدينية مسمعتش أنا فما شكون مش بش يضمنها؟ واللهي توا حتى هذا كلام!
بالنسبة لإستعمال المساجد صار, والناس الكل لازمها تحكي فيه وسامحني حطان النقطة هذي في سياق التدوينة اسمها مغالطة كبيرة، كأنها مش نقد هادف وعندو معنى، أنا نحكي مثلاً على بلادي جربة صارت مشاكل على الحكاية هذي متع تغير الأيمة، معناها النهضة قاعدة تتدخل ومش من حقها،وبالنسبة لإستعمال المساجد (خاصةً بالطريقة إلي حكى بها صديقنا كالميرو ، كأنو يقول يا مصلين كان مش بش تصوتو نهضة راهو الجامع بش يسكر ويردوه بار! قلو ضمان الحرية الدينية

يخي فما شكون
مشبش يضمنها؟ تي الوطد قالك عنا رفقاء حجاج بيت ربي وإنت تقلي ضمان درة شنوا! حتى هذا كلام! حملة التسييس في المساجد مع الوعي المحدود والجانب التقديسي تخلي العملية مربحة ونفهم علاش النهضة تنحي إمام من البي دي بي بش تحط إمام نهضوي كما صار في صفاقس. الوقاحة والإستهتار بالمعتقدات المذهبية وصل بيهم بش ينحو إمام اباضي في اجيم جربة (نأكد إنو كان صباب كبير) وتعويضه بإمام مالكي ولا سلفي ولا شنوا المهم عرفوه مش اباضي من تكبيرة الإحرام ، قال شنوا الكلنا مسلمين وكيفكيف، قالولهم أهوكة فما جامع المالكية قلك الناس الكل تصلي معانا، كان هكا وما وصلوش للسلطة وما يحترموش الأقليات ، ملا كان جات بيدهم كيفاش؟




وهكا بش نتعدى لحكاية إيران، لهنا نحب نقول التاريخ لا يرحم إلي ما يتعلمش منو، معناها كيف نقول منحبش مثلاً ثورة مذهبية ولا دينية معناها كيف تاخذ مسافة من النهضة وما تكونش منساق أعمى وراء قيادتها حتى ولو بش تصوتلهم، هذا ما يعنيش انك تلوث في صورتها، أما لزمنا نتعلمو من تجارب الدول الأخرى وكيفية إنهاء ثورة، ماهيش بالسهولة إلي نتوقعوها كيف نشوفو اش صار بعد ثورة روسيا وثورة إيران، معناها التعلم من التاريخ مهوش هجوم غير مبرر ضد النهضة بل إنارة لكي لا نسقط في أخطاء سقط فيها غيرنا، والمقصود هنا اليقظة من أي إنحرافات عن مسار ثورة الحرية لا من النهضة فقط بل من جميع الأطراف؛ النهضة والشيوعيون وبقايا

الدكتاتورية والدكتاتوريين الجدد، وما يمكنني ملاحظته هو إنتشار ضاهرة مسكنة النهضة والنهضة فوق النقد الشيء إلي يسهل دكتاتورية جديدة خاصةً مع بروز هذا
الكام الهائل من البرهان بسيس المنتشرين هنا وهناك.

باهي بالنسبة لكتب راشد الغنوشي وبالرغم من إنو تكويني علمي بالأساس، إلى إن معرفتي بكتابة فرويد تخليني نهستر بالضحك من الفقرة المذكورة، خاصةً وإنو المرأة ومهما كان السياق، لا تتمحور حياتها حول وضيفتها الجنسية بل إن المرأة والرجل وحسب علم النفس، تتداخل أفعالهم وميولهمو التطور النفسي والتكيف الجنسي الاجتماعي يرتبطان بالسن وبتطور الفرد جسدياً واجتماعياً بصورة وثيقة، أما لا علينا ممكن أنا ضيع فيها وكتاباتو كمفكر لا تعنيني قدر مواقفو كسياسي،

لا علينا نمشو توا للمغالطة الكبرى والمحرمة وإلي من كثر ما سمعتها ولت تسببلي توتر في أعصابي
كيف نقول أنا مسلم وما تمثلنيش النهضة والنهضة لا تمثل الإسلام بجاه ربي وينو الإقصاء؟ توا مؤخراً أي واحد ينقد النهضة يجيه كيل من السباب المجاني، هاو تلميذ بن علي ويدعو للإقصاء! براس أمك كيف انتي ما تمثلنيش وينو الإقصاء؟ توا هبال هذاية ولا تهيبيل؟ (سامحني أما النقطة هذي بالذات من كثر ما سمعتها خايف كان يحكيهالي خالي (النهضوي) ندغرو بسكينة و نباسي في جرتها*)
هذا رويق حزب فوق النقد ونظرية الهولوكست كما إلي حكى عليها يوسف لهنا، ما يلزموش يتسخر، كأنو احنا ناقصين تقديس وتكفير

خلي نزيدو إقصاء، تي هما

قال شنوا إلي ما يحبش النهضة

كافر وكما قبل إلي يدعو للعلمانية كافر، وهما لعباد إلي تكفر ماهيش في ثقافة الطالبي ولا

جعيط

...إلخ خلي نزيدلهم حجة الإقصاء ملحيط، يخي يا أخي نرى انك متصلحليش وما تصلحش لتونس إقصاء هذا؟

باهي بالنسبة للي صار في قليبية توا نمشي معاك إنو فيه استفزاز (غير مرغوب فيه حالياً لحساسية الضرف لكنه ضاهرة صحية لنشاط المجتمع المدني ويصير في كل الدول الديمقراطية وين تلقى تظاهرات مناوئة) ، أما ماكانش التجاوب معاه بالطريقة الوديعة إلي تحكي بها فما كاميرا تخطفت، وفما تكفير وسبان من الجهتين أما جيست حاجة التشبيه بمنع البي دي بي والتجديد مجانب للصحة، كيف تلقى عباد تحب تدخلباش تناقش ماهيش كيف عباد تمنع تجمع، وبالمناسبة صفحة الحقائق الخفية إلي نشرت هذه التدوينة، كانت تبارك

هجمات عنيفة على البي دي بي والتجديد

لكن هذا منتظر من مثل هذه الصفحات المنافقة بالرغم اني سمعت إنو صديقنا المدون محمد تيتو متع المتنوشة معاهم، أما يا خويا مش معقول هذا الإنفصام


بالنسبة لمجموعة الفدلكة (إلي مانيش داخل في حتى وحدة فيهم إلى متع الطماطم خاطر بالرسمي نحب الطماطم أكثر من راشد الغنوشي و ضهرلي أنا حر في ميولاتي، يوليش زادة كره الطماطم وعشق الشيخ راشد واجب ديني أو أخلاقي؟) أما بش نعطو صورة كاملة، المجموعات هذي ما تعني كان المتطرفين وفي سياق رد على الصفحات والمبيدات القامعة لحق التعبير والأراء مثل هذي، إلي تطالب فيا بالهجرة نحو لامبيدوسا

بالنسبة لإحتقار المرأة، مثلاً حسب منفهم من كلامك نتعرفو عليه من خلال تصرفات عائلة الغنوشي وهذا إنجمو نعرفو من خلالو إلي النهضة بش تسمح بتعدد الزوجات بما إنو الشيخ راشد متزوج زوز نساء

بخلاف كلامهم على حقوق المرأة عند الطلاق.. إلى غير ذلك، معناها المنطق متاعك نفهم منو إذا ولد راشد الغنوشي معلم في الكورة، تونس بش تهز الكوب دي موند إذا شد الذيخ راشد، هل متشابهات الشعبوية ما عندها حتى معنى كان عند أصحاب العقول البسيطة

بالنسبة للعباد المتطرفين وإلي يسيئو لقضيتهم قبل النهضة نقلك إي نعم موجودين وحكيت عليهم قبل مثال لهنا ولهنا أما هذا ما يعنيش إنو يبرر الكم متع المغالطات المنتشرة.
ملخر بالنسبة ليا كنت نستنى في برامج قبل ما نعطي صوتي أما بتصرفات النهضة مانيش باش نعطيها صوتي مش دخولاً في النوايا أما كي نسمع أفكار من قبيل المنع التدريجي للخمور نعتبرو إعتداء على الحرية وما صارش في أوج الحضارة الإسلامية وللي ما يعرفش نورمالمون يتذكر شوية أبو نواس إلي يتغنى بالخمر والخمارات.
النهضة ما تستحقش الحديث عليها هذا الكل خاطر في كلمتين تنجم توصل إلى فشلهم السياسي ورغبتهم الوصولية، كيف تسمع أفكار خلاقة مبدعة كيف هذي تقول يرحم الأم إلي جابت:

(المكتوب غادي:

من النقاط الهامة التي طرحها الدكتور عبد اللطيف المكي هو تردي قطاع الخدمات في بلادنا و قال أنه نشهد يوميا إزدحام كثيف في قطاع النقل و المستشفيات(تأجيل المواعيد علاج المرض بأسبوع وأشهر في بعض الأحيان) وعديد الخدمات فيحين أن لدينا عديد العاطلين عن العمل من أصحاب الشهادات العليا و غير حاملي الشهادات و قد طرح أن من واجبنا أن نقوم بإنجاز مستشفيات جامعية أخرى و مشاريع نقل أخرى وتحسين البنية التحتية وتطويرها بما يفتح باب التشغيل أمام غير حاملي الشهادات وبما يفتح أيضا فرص هامة لإنتداب إطارات من حاملي شهادات العليا وبذلك نكون قد حسنا مستوى الخدمات المقدمة للمواطن و فتح باب تشغيل هام
admin 2

Par : شباب حركة النهضة الاسلامية على الفيس بوك)

ولا تسألهم على تهربهم من إمكانية عقد ميثاق جمهوري (مهوش كما قيل انها مبادرة المواطنة بل يقع عقده داخل الهيئة وتنجم تلقاها بكل وضوح لهنا وتهرب واضح، توا يخي أنا باش نعمل إلتزام أخلاقي نشور الشعب؟ ولا الأحزاب الأخرى؟ شاورت الشعب باش تعمل القانون الأساسي؟ يخي الشعب باش يصوت للمبادئ متاعك ولا هات يصوتلك وأنا نعملو اش يحب،كأنك تقول لحزب بيئي
(فش قام تكون بيئي ستنا موافقة الشعب

ولا السطو على المنصب الجهوية كما المجلس البلدي إلي عينو فيه خالي في
إجتماع حزبي داخلي لتكريم مساجينهم
!!!

ولا يجيبلك في اجتماعاتو بسيكو م بش يسيب إرهابو الفكري تحت تفاعل الجمهور : "

"كان جات عندي القدرة نعطيهم بالكلاشينكوف كما صحيبنا أذاكا الي عمل مايكينغ أوف"

الحاجة الوحيدة إلي نراها ممكن تخلي النهضة تربح هي نظرية الحكم بحق إلهي بما إنو سي اللوز يقول إن الله قد باراك مشروعهم وزكاه (الفيديو بدايةً من الدقيقة 9 و-15 ثانية) ومن السذاجة تاعو قال والدليل هذا النصر العظيم، على حسابو ربي يبارك مشروع إسرائيل والدليل الانتصارات (الحقيقية مش الوهمية ) متاعها المتاتلية على أمة خلت أمثالو يصبحو خطباء فيهم

أية افرق الحضبة من غادي

العلمانية مرة أخرى: دور بعض دعاتها في الخلط في مفهومها

توا العبد كي طار عليه النوم، قلت برى ميسيليش نكتبو تدوينة نوضحو فيها بعض الأمور إلي نورمالمون تكون واضحة ديجا، أما العبد اش عندو يعمل؟
حكيت على الخلط في موضوع العلمانية لهنا، واكتشفت بعض الردود العنيفة من ناس عندها فكر مسبق في الموضوع وتخمم بمنطق بوش وما تقرا كان بشطر عين، أنا -وعلى حسب ذاكرتي- الموضوع الكلو إستغراب وتعجب من بعض التصرفات. أما يضهرلي إلي فما شكون لم ترق لهم تبهيمتي، واعتبروها في سياق المؤامراتي والحرب على الإسلام، قلت هاو مجال

بش نوضح إلي هذا الخلط يتحملو جزء كبير من أسبابو بعض دعاة العلمانية، بالرغم إلي أنا حكيت ديجا على مواضيع مشابهة وعلاقة النسويين واليسار بالإسلام والنص الديني،

2- أما في الزيادة إفادة، وخلي نوضحو لومور ونبينو فشل دعاة العلمانية في الدعوة للقضية متاعهم والسبب فيه برشة أطراف، نبدا مثلاً بسفيان دافيد، الشخص هذا مثلاً أكثر منو يفيد القضية بتصرفاتو هو يسيء لها، أولاً على خاطرو ناشط فايسبوكياً، ومواقفو تتراوح بين الحرية والإساءة للدين، لهنا مانيش بش نحكي على هامش الحرية وأماهو حرية نحبو ناخذو -بين حرية كاملة وحرية دون الإساءة للحساسيات الدينية- أما مثل هذه التصرفات تخلي نفور من الأغلبية المسلمة الشيء إلي يخلي عوض مناقشة الأفكار ، اناقشو الأشخاص، هذا بالطبيعة ناتج عن سطحية أمثال هؤلاء الناقدين، أما زادة ناتج وبصفة كبيرة لاستفزاز المشاعر الدينية متاعهم (صحيح هما زادة ساعة ساعة يستفزو المشاعر الدينية لليهود والنصارى والملحدين -إذا جاز إعتبار الإلحاد شعور ديني- أما مهوش موضوعنا توا)

3- فما زادة الحركة النسوية في تونس ممثلة في جمعية النساء الديمقراطيات وإلي تعاني من إنفصام بين الحرية إلي اطالب بها وبين إعتبار حرية المرأة في إختيار ما تلبسه مثل الحجاب رمز للخضوع، وأهم غلطة هو تفجير موضوع الميراث في الوقت هذا، بالرغم إلي هما لهم مدة يحكوا عليه ديجا وحكيت عليه أنا سابقاً لهنا في الفقرة 5 ، إلي كان نستعرضها بعجالة، هي تجاوز النص الديني وإمكانية خسارة المرأة لمكتسباتها، صحيح هما يقولك هذاك ونزيدو عليه في نطاق ما يسمونه التمييز الإيجابي، أما فش قام تمييز؟ علاش الراجل يتضرر أكثر ملي متضرر هو توا؟ المهم نرجع للفكرة هذي وعدم علاقتها المباشرة بموضوع العلمانية، خاطر الإنسان حر في أملاكو وين تمشي وبماهو دين تتوزع، ملخر صحيح بعد العلمانية ينجم يتحل مثل هذا النقاش، أما زادة العلمانية براء منو ومن إعتماد أي ناس قانوني في حكاية الميراث، ديجا فما برشة تو يكتبو بسم بنتهم إذا ماعندهمش ولاد بش ما تمشيش الورثة لولاد خوهم، معناها القانون مش ديما يطبق، ومينجمش يدخل في قرارات صاحب الملك وضهرلي حق الملكية مقدس، -مع الإعتذار للإخوة الشيوعيين-

4- بطريقة أخرى، الموضوع هذا برشة ربطوه بالعلمانية زوراً وبهتاناً عن طريق تفجيرو من قبل النساء الديمقراطيات، بالرغم إلي هما عندهم مدة طارحينو أما ما كانوش متابعين وهذا خلاهم يقولو إلي العلمانية تدعو للمساواة في الإرث وتجاوز واضح لخصوصيات الناس العقائدية بالرغم إلي هي نورمالمون تضمنها، وبالرغم زادة إلي برشة دعاة للعلمانية مهمش موافقين على هذا الطرح على خاطر وبكل بساطة معندوش ربط مباشر بالموضوع

5- فما زادة بعض التعاملات وخاصةً من اليسار التونسي إلي ديما نقول مازال موصلش لنضج كبير خاصةً على مستوى القاعدة الشبابية، وحتى بعض الليبراليين اللادينيين، كنت تعرضتلها سابقاً لهنا، وإلي تخلي فما نفور من الأشخاص قبل الأفكار وكالعادة لصق في العلمانية، كأنو العلمانية تجمع نقاط ضعف المنادين بها من الشيوعيين إلى الليبراليين والخلط هذا نتوقع إنو ساهمت فيه بعض الأطراف المنادية بالعلمانية،

6- ختاماً أهوكة حاولت نوضح أخطاء المنادين بالعلمانية وسبب من أسباب الخلط في نظري، صحيح يقول القايل المشكلة في تقبل المتلقي، يخي منين نقول بن لادن يمثل الإسلام صحيح؟ ولا البهائية تمثل الإسلام؟ ولا الصوفية..؟ أما هذا واضح بالنسبة لشعب عندو حد أدنى من الثقافة الدينية أما الثقافة السياسية الوليدة ضهرلي لزم نسايسوها،

تكريز بين الثورية والشيطنة

مقال من صفحة الحقائق الغبية مع تأكيد إنو تكريز هي وراء صفحة نداء الماءة ألف تونسي ضد التمديد

حبيت نحكيلكم على تكريز على خاطر برشة يحطوهم فرد حكة مع صفحات الفايسبوك لخرى، أما مش صحيح وعيب: تكريز عقلية ومن منظري وأقطاب الثورة في نظري، هذا طبعاً وحتماً ما يعنيش انهم معصومين عن الخطأ، أما فقط لكي نعطي لقيصر ما لقيصر
حسيت - وأنا بش نحكي إنطلاقاً من شخصي - إنو تكريز تعد عند برشة ناس من المتأمرين على الثورة، أما مهوش صحيح، أنا نختلف معاهم في برشة أطروحات، أما فما حقيقة ولازمها تتقال ومايجيش نحطو تكريز مع الصفحات إلي ركبت على الثورة ملي بن علي قال غلطوني، وقتها حتى إلي كان يعمل في عروض في لجان التنسيق ولا يحكي، تي حتى إلي كان يرعش قبل بمدة في نسمة جاء وقال في تونس 7، بن علي مات! تي حتى نحطوها مع الصفحات إلي نقلت أحداث الثورة -ولي كانت أغلبها بتجرد ونقد سطحي- زادة نتسمو نظلمو فيها، تكريز أقدم وهي تنظر للثورة، تكريز قبل الفايسبوك والمدونات الكل (نحكي تاريخ ولادة الفايسبوك والمدونات)، حاجة ممكن ما تعرفوهاش إلي تكريز نداد مع الجوجل، تكزير من عام 1998 ومن وقتها ما وخروش وما فدوش ملشعب إلي ما يتجاوبش، من وقتها و هما يحاولو يعبرو ويوصلو أفكارهم بغض النظر على الطريقة ومدى وجاهتها، أما كانو يقولو وينظرو للثورة.
باهي قلت أنا بش نحكي من منطلق شخصي، خلي نحكيلكم على معرفتي بتكريز، أنا وقتها حتى لبداية الألفية معنديش لا انترنت ولا أرديناتور نتذكر حتى معرفتي كانت سطحية بكل ماهو إعلامية، لين سنة دراسية 2003/2004 حسب ما نتذكر وقتها سمعت شدو شبان في جرجيس لدخولهم لمواقع محظورة، حاولت نفركس على المعلومة وما لقيتها كان في موقع تونسي زادة قديم ورائد إلي هو
tunezine.com
تغرمت به وقتها ووين نمشي للبوبلنت -مازال معنديش انترنت- يطلعلي الأدرينالين وأنا نسرق في السطور.. وبغرامي هذاك اكتشفت تكريز

عقلية تكريز:
علاش قلت عقلية خاطر مختلفين، موقعهم
takriz.com
تلقاه الوحيد إلي لغتو مباشرة ويستخدم كلمات بذيئة، عقلية -كما حاطين تو في شعارهم-
A.C.A.B
إلي معناها بالعربي كل الشرطة أوغاد،
takriz زادة كان عندهم مراول خاصة بهم، مراول takriz
إلي وزعوها على برشة عباد -خاصةً اجانب وفيهم مشهورين- وعملوا تصاور في برشة بلايص في الدنيا، تبقى زادة

في الفترة هذيك من عمري، وبعد فترة الصدمة من لهجة الخطاب، ونظراً لمراهقتي، تغرمت بهم، أما زادة كان يضهرلي إلي كان ينظفو كلامهم، كانو ينجمو يدورو بهم أكثر عباد، حقا لعباد إلي تقول كانو البرة وما يعملو في شي على الأرض مش صحيح، والدليل تصاورهم بالمراول، وخاصةً عمليتهم عمناول وين كتبو
tags
على حيت وزارة الإتصال الخارجي، صحيح فازات شباب ومراهقين أما لازم نفهمو زادة إلي هذا دليل على شجاعة وعقلية ثورية ولو نظرة هوليغانزية للسياسة.. تي بالمناسبة هاو رابط يوتيوب فيه كليب على ايقاعات الفيراج لتكريز

http://www.youtube.com/watch?v=Gd2xCaxjCds&feature=related


الثورة:
الشباب كبرو وزادو برشة معاهم وزادة تكريز كبرت معاهم، -على فكرة حدة الخطاب قاعدة تنقص كان ما فبلكمش- أما الحاجة إلي يتميزو بها على المدونين الكل وأنا منهم هي طول النفس والإيمان بالنجاح، فما برشة مدونين كتبو عامين ومبعد فدو إلي خايفين و عندهم الحق، خاطر شدو ناس كما فاطمة الرياحي وماتو ناس جرت التعذيب كما زهير اليحياوي، ولا زادة خاطر عدم الإيمان بهذا الشعب -كيفي أنا الحق إلي كنت نكتب مرة في الفال أخر سنة- أما تكزير كانو ديما يمنو بالقضية كانو يحاولو يدغدغو الشباب بنعتهم بالجبناءو مش رجال إلى غير ذلك.. (على فكرة تكريز بالرغم إلي في ثورتهم زادة ثورة على المجتمع -كما الكلام الزايد- هما في كلامهم وكتاباتهم يظهرو
sexites)
وكانوا ديما يدعو للثورة، ويمنو باللي ممكرن فما في الشعب شكون يتحرك، أخر حاجة نتذكرها هي في نطاق حملة المناشدة، صفحة نداء المائة ألف تونسي ضد التمديد، (وإلي على فكرة ما وصلت كان 10 الاف قبل ما يبدو يجونا كي الفقاقيع المنضالين الافتراضين) //على فكرة غير متأكد 100% إلي تكزير وراء هذه الصفحة أما أغلب المؤشرات تقول هكاكة// المهم كانت حاجة خاصة ويونيك مش كما الباقيين إلي يكذبو على عمار قالو بيراتانا وطلع خاطيه، على الأقل هاذو فكر ثوري متفجر من قبل وأهم حاجة تتحسبلهوم التنظير للثورة والإيمان بها والحركة في جميع الإتجاهات وعلى الميدان أيضاً

الشرعية:
هذا المقال/التدوينة ما يعطي حتى شرعية لتصرفات تكريز توا، فالشرعية الثورية كذبة سوقها الووصوليين الدكتاتوريون للوصول للسلطة (لينين، الخميني..) هذا فقط محاولة للتعرف بتكريز إنطلاقاً من معرفتي بيها، خلاصةً وبش ما تفهمونش بالغالط الثوريون ليسو معصومين عن الخطأ لكن وجب ذكر أدوارهم

Par : الحقـــــــــــــــائق الغبيــــــــــــــــــــة

العلمانية، النهضة وبرهان بسيس، تبهيمة ميتافيزيقية

إلى

الذين عوض أن يحاججو ويقنعو، يشتمون ويسبون

ويدعون ويفبركون،

أتعجب من البعض،

الذين،و بعد ثورة الحرية يهاجم من يطرح أو يعبر عن فكرة لا تعجبه

أتعجب من الذين

يدعون الإسلام ولم يقرأو لكم دينكم ولي دين

أتعجب من الذين يدعون إن دعاة العلمانيية لم يشاركو في الثورة

ويتناسون الدور القيادي - أقول القيادي- لعمروسية والشورابي وغيرهم

أتعجب من الذين يعتبرون النهضة هي الإسلام

والعلمانية إبتدعها الشيطان

أتعجب من الذين يطالبون بإحترام الأقليات المسلمة في الغرب

ولا يروق لهم نجم نبي يؤمنون به إن كانوا يفقهون

أتعجب من اللذين يعتقدون إن العلمانية إلحاد

وكلام القرضاوي قرأن

أتعجب من الذين تجمعهم كلمة الله أكبر من أجل الشتيمة والتنابز بالألقاب

والسباب والتهجم ولا تجمعهم و هي في بداية الأذان

أتعجب من الذين يدعون أن اللائكية تتنازل عن فلسطين،

ويتناسون ليلى خالد الشيوعية حتى لا نقول العلمانيون فقط

أتعجب من الذين يعتبرون العلمانية هي التي تبيح المثلية الجنسية،

وكأن مبدأ سياسي كالفصل بين السلط هو الذي يبيح النوم في الحدائق العمومية من عدمها

أتعجب من الذين يركبون الدين للوصول إلى منصب سياسي،

كأنهم يحكمون بتفويض إلهي

أتعجب من الذين يعتبرون الدعوة إلى اللائكية تهجماً على الإسلام

أتعجب من الذين لا يعيرون إهتماماً للأخرين

في حين كان الاخرون يناضلون من أجلهم

واحزن حد الألم حين أرى دعوات للتهجم على من يعبرون عن رأيهم

تقابل بسيل من التهليل،

.

راجعوا أنفسكم هل نحن جاهزون فعلاً للحرية؟

بالفلاقي الصريح متشمتوش بنا برهان بسيس إلي قال تونس في طريق لبناء ديمقراطية مع بن علي، خاطر ماهيش مستعدة لذلك الأن

قالها ثوري ذات يوم

حتى إن كنت لا أوافقك الرأي ، و لكني سأقف حتى الموت مدافعاً عن حقك في أن تقول ما تريد

قالها ثوري ذات يوم، فأين نحن من هذا

ملاحظة؛ هذه التدوينة لا تمت للشعر بصلة فقط تبهيمة ميتافيزيقية

souvenirs...

2 كلمتي ونقولها

توا وقيت ملي صادرولي حقي في التعبير، عباد عمرها ما كانت تعبر ، توا واحنا نتنفسو إلحرية ونعيشو الحرية وتخلصنا ملقمع، ولينا نعيشو قمع أشد ، وعباد ولات هي إلي تملك الثورة وهي إلي أججت الثورة وهي الشعب، عباد ناضلت وماتت بش نضمنو التعددية بش نبعد علكونفورميسم....باش نترشقو وباش وبش نبنو وباش وباش .... أما اش عندك تعمل يحبونا تصاور من بعضنا نسخ منهم ، يحبونا الناس الكل تخمم كيفهم، قال شنوا الشعب قال كلمتو، لا ياخويا الشعب بالكشي إنت وإلا 5 ألاف وإلا 100 ألف ولا حتى مليون الشعب خويا أنا وانت راهو، الشعب معندوش راي واحد بابا ، الشعب إلي ناضل والدماء إلي مشت مش بش تجي سيادتك تمارس علي إرهابك الفكري ودكتاتوريتك الشعبوية وتسيب علي نقمتك وغلك خاطر تفتحلك باب حرية التعبير،

الشهداء مهمش ماركة مسجلة بسمك بش تعلمنا كيفاش يمشوا حرام، وكيفاش يمشو في بلاصتهم الدماء والشهداء بلكشي متع جد بوك؟ الناس إلي ماتت بش تعطيك وتعطيني حق التعبير ، تبكي وهي تشوف في القمع إلي تمارس فيه

أنا حر وعشت حياتي حر وقبل بن علي حر وبعد بن علي حر : كلمتي ونقولها كما قالت أمال المثلوثي أنا حر وكلمتي حرة، كان توجعك كان متعجبكش كان تدمغك بواقعيتها متسبش ومتبداش تعتقد انك إنت الذكي إلي فاهم اللعبة واحنا بهايم ضايعين فيها ، أنا كلمتي حرة وواضحة: محاولات إحتكار الثورة هي بداية غير مطمئنة لحالة نريدها أن تكون ديمقراطية، خاصةً وإن من بين الملتحقين وركب هذه الحركة أناس لم يشاركوا في بداية الثورة والأن يريدون أن ينسب اليهم الثورة هؤلاء مناضلو الأمتار الأخيرة أو حتى الأوفياء لعقلية الثورة لا يحق لهم إحتكار ثورة 14 جانفي ولا الإتجار السياسي الرخيص ب بدماء الشهداء و- مشاكل الفقراء

نرى إلي من الواجب أن تكون شرعياً مفوض من الشعب أو من الدستور -حتى ون كان بالي - لكي تعين ناطقاً بسم الشعب لا أن تفرض نفسك وتعين نفسك ولا تدعي أنك الشعب خاطر الفترة الأخيرة

تونس تقول عليها 10 مناس مش عشرة ملاين أي واحد يلم صحابو و يحكي بسم الشعب و نساو إلي الشعب حب يخرج من النظام الواحد والفكر الواحد والتفكير الواحد والرأي الواحد

أما إلي يجي يقول الشعب قرر وميلزمكش تكون وراء الشعب ، نذكر إلي أنا كلمتي حرة وإلي الشعب عمرو ما كان إنت ولا عبد واحد وراي واحد وحزب واحد كما تدعون الشعب فيه تعددية والشعب فيه أفكار ، تقلي أغلبية ، نقلك ممكن أما نمشي معاك إي ومبعد ؟ تحبو الأغلبية تحرم الأقلية من حقها في التعبير إلي ماتوا عليه رجال ، أنا كلمتي ونقولها، تقلي الشعب يحد مصيرو وما علينا كان الإستجابة ، نمشي معاك -بالرغم إلي مش موافق في انو الشعب هو سيد قرارو فما وسائل إعلام تصنع الرأي العام والرأي العام العربي زادة ، اش خلا بعض المحللين يغدق علينا بتنطيرهم وهم أبعد ما يكون عن فهم الواقع التونسي - نمشي معك أما هذا ما يعنيش إلي نسكر جلغتي ، ميعنيش إنو لازمني نسكت ، مدام انجم نوصل صوتي نواصل وإلي يقتنع وإلا قابل إنو يقتنع مرحبا وإلي مختلف فالإختلاف لا يفسد للود قضية وزيد كيفاش ماعلينا كان الإستجابة ؟ زعمة بالحق الشعب يعرف كيفاش يكمل ثورة منغير ماتكون عندو نخب حكيمة ولا ادعي اني انتمي إلى النخبة لكن ، فقط مثال ثورة إيران ألم تكن ثورة حرية؟ أين هي الأن إيران من الحرية ؟ الثورة البلشفية في روسيا ألم تكون ثورة الجياع والمستضعفين أنظر في التاريخ ما فعل لينين وستالين... أنا كلمتي ونقلها كما كنت نقولها وقت إلي بن علي موجود وبين اديه السلطة نقولها، توا وبكل حرية وفخر الشهداء جابولي الحرية بش نقولها بصوت عالي ماتجيش سيادتك وتصادرهالي لأني اختلفت معك في الرأي بحجة الخوف على دماهم وثورتنا... إذا مكاش مستعد للحرية فكرياً فأبدأ بإصلاح ذاتك لأنك ستعيش في بلد الحريات -كان كتب

الثورة التونسية : نفرح ولكن مازلنا نتوجس الغد وجرح الأمس لا زال ينزف

بين ذهول وفرحة وإعجاب وإستغراب، مازلت لا استطيع كتابة تدوينة تحليلية متكاملة عن هذه الأحداث ، لكن وجب الإشارة إلى أن الشعب مازال ينزف دماً وأوهام ذات سابع من نوفمبر ولذلك فهو يتوجس ويشك فلا تخذلوه يا من أوصلكم غداً إلى إجتماع مع السلطة، و الغنوشي الذي ولفناه ذا دور تقني أكثر منه سياسي (وزير تنمية، تخطيط فوزير أول ) فهذا الشعب لن يمهلك 23 سنة لتسلمها لزوجك، بل على الأقصى بضعة شهور ولذلك فلا تخطئ... فإنه شعب لا ينسى قد يمهل ولن يهمل

وكما يقال وإن عدتم عدنا ، تقولون ليس سهلاً؟ ، أقول الأن أسهل ...

دعوة أخيرة للبناء وتجاوز مافات فهنالك من الماضي مايجب المحافضة عليه والبناء عليه وهنالك مايجب إصلاحه، دون شخصنة الأمور وترك فراغ رهيب قد يصعب ملئه في هذه الظروف

تحية أخيرة لابناء وطني إنه: انتصاركم وثمن اشتريتموه بدمائكم ونتيجة سنوات من السخط فلا تجعلوه يضيع منكم دعوة للبناء بدايةً من الغد... فالوطن لنا ونحن نبنيه .... يتبع

أين أنتم يا قادة الحرية

ليلة هامة في تاريخ لبلاد ، أحاسيس مختلفة ومشاعر متداخلة ومخ توقف لحظة عن التفكير التشاؤمي ليجعل الأمل يتدفق من عروق شاب حرم عليه اندفاعه وأحلامه في مهد المراهقة..

ومع تدفق الأمل ، مازالت أثار الخوف تسكنه وغول غياب البديل تؤرقه، هل بن علي فعلاً خيارنا الأوحد؟ لماذا لا نجد حتى من يستطيع ركوب الأحداث كما يدعون؟

ها إن الشعب قد مهد الطريق فأين أنتم يا قادة الحرية

توا بدات الثورة : الجنرال ، كالوتشا وحرية التعبير

توا بدات الثورة : الجنرال ، كالوتشا وحرية التعبير

شفت هنا إنو مغني الراب الجنرال ، والمدون كالوتشا وقع إلقاء القبض عليهم، يا شعب تونس ويا رجال تونس حقنا فالتعبير ميلزمش يتمس ولازمنا نحسنو اوضاعنا الحقوقية بعد تحرك الشعب مش تدهورها، الناس الكل تتحرك ،

mobilisation

الناس الكل من أجل حقنا في الحياة الكريمة والكلمة الحرة... ويا نظام تونس أو على الأقل رأس النظام ها أنت تبني نهايتك بأيديك والأيام بيناتنا... ونصيحة وسع رد بالك ملإنقلابات..