lundi 18 février 2013

احنا علاش هكا؟ وشبينا متخلفين؟

احنا علاش هكا؟ وشبينا متخلفين؟  وعلاش القصاص وسنية تومية  في المجلس التأسيسي ؟ وكيفاش بوشلاكة وزير ؟ وكيفاش واحد متله  من حزب متلهين فاقيدي الكفاءة  كما المرزوقي يشد رئيس رئيس يا بو قلب !؟ علاش ناس مازلت تصفق للي ضربها بالرش وقطعلها خبزتها ؟ لهلدرجة متخلفين ؟
كلام كما هكا قاعد ينتشر و يطرح اشكالية وضع يائس حقيقي  تخلي الواحد يستعين بسمير لوصيف ويبدا يشلط   منين يغوص فيه

. ومثل هذه الأسئلة تلقى عادةً إجابات مختلفة ومتضاربة -إلا السؤال على المرزوقي ، لا إجابة له... أذكياء العالم خممو في أسباب للحكاية قالو ممكن  بهامة الشعب ، ياخي  البهامة شخصياً  تبرأت مل حكاية  وقالت ألف أعوذ بالله ،  خاطيني حدني حد البحري الجلاصي ولا الحامدي نحطو رئيس .......، المرزوقي فوق طاقتي الحق - أما تراوح الاجوبة هذي بين ثلاث وجهات نظر  ناتجة على ثلاث مناهج تفكير مختلفة.

إي نعم سيدي خويا التفكير 3 أنواع كما قال هاك السيد الفاضل.
فما النوع الأول هو التفكير السلبي أو اللاهوتي إلي يطعن في سببية معقولية للأشياء ، النوع هذا تلقاه يجاوبك قضاء وقدر على سؤالنا وإلا يقلك  خاطر  " الدنيا عاهرة"  كيف ما يجاوبك على التسونامي بإنه ناتج عن غضب الله... كما زادة الإغريقي إلي   كان يقولك النار  جات للإنسان عبر بروميثوس إلي جابها من عند الالهة ..  وطاح الكف على ضله ... النوع هذا متع التفكير قديم وكان ديمة عندو مشكلة مع اعمال  العقل وديما مذابيه يقتل الحيرة المعرفية ويحصر مجال العقل  مدام عندو أجوبتو الجاهزة.. التيار هذا يمثلو تاريخياً الغزالي إلي قال للفلاسفة يزيكم بلا تخذريط ما تخمموش علاش وجع الراس؟ هو كان تجي تشوف عنده الحق علاش لمشاكل والتخمام ؟ مش كان عملو قعدة مزيانة ولا طرح شكبة خير ؟ أما الحق مش مقنع برشة وياسر سلبي السيستام هذا وما يقنعش العبد لله.
ملا، مدام لول طلع مذرح أيا سيدي بن سيدي نشوفو النوع الثاني .. النوع هذا يظهر شباب وملي ضهر نفع الإنسانية برشة النوع هذا هو التفكير السببي أو الحديث، هذا أصوله قديمة من أول الدنيا بدا يتوجد في مجالات معينة كما الزراعة إلي طلعت هي سبب الحصاد لكنه بقى محصور في مجالات معينة  والنوع الأول يحاصر فيه ، لين جاء عمكم ديكارت ووفي لحظة إنكسار فلسفي جاوب على اشكالية الوجود وربطها بالتفكير والعقل  وكانت أول بذرة لعقلنة العالم وكانت بداية الحداثة علمياً وفلسفياً وإنسانياً ، النوع هذا مثلاً هو إلي  منين تسألو  علاش التفاحة تطيح والقمر لا  ، يلقى جواب كما هل راجل الفاضل، دايور هذاك علاش بعد ديكارت تسمى أيضاً سببي ميكانيكي أو هندسي، النوع  هذا  ينجم يجاوبك يجاوبك علاش تشوف روحك في المرأة ويقلك راو الضو ذبذبة يصيرلها إنكسار مع المرايا وإنتشار مع الحيط ...إلخ    و يفسرلك لحكاية  لكنه مبعد يوحل منين يجي بش يفسرمنين بش يفسرلك  تجربة افشار مثلاً ؟ وهذا إلي بش يوصلنا لجوابو على سؤالنا وإلي بش يوصلنا للنمط الثالث...

خاطر النوع هذا على قد ما يظهر عقلاني وعلمي وصحيح  تنجم تلقى على  سؤالنا برشة إجابات يعتمدو نفس النوع هذا. بحيث فما شكون يقلك السبب غلق باب الإجتهاد هاك العام ، فما شكون يقلك الفقر ، وفما شكون يقولك خاطر العالم في حاجة لتجمعات كبيرة واحنا دولة صغيرة وإلا يقلك خاطركم ما تخدموش وما تنجوش  ... إلخ


هذاك علاش بش نوصلو للنوع الثالث وهو نوع التفكير الما بعد حداثي أو النسبي أو كما اسميه بالفلاقي الصريح التفكير  المتجعبن ، هذا إلي ينسبلك السببية تلقاه ديما يرجع للتعريفات والمنطلقات وينسب "الحقائق".  هذا إلي بالنسبة ليه التجربة ليست إثبات ... وبالتالي الحقيقة متغيرة حسب  النموذج المعتمد مثلاً في حكاية الضو يفسرلك كما في الأول الإنكسار ويزيد يفسرلك إنتاج وإمتصاص الضو بالفيزياء الكمية ( من غير ضحك ترجمات الجوجل ) هذا زادة إلي تلقاه ديما ينسب المفهاهيم, و بالتالي  الحقائق الناتجة عليه....يبقى في السببية مفهومياً لكنه ينسبها .
  مثلاً كان تسألو هل الإنسان حيوان ؟ يحلك فترية في اش معناها حيوان؟ ويقلك كان الحيوان هو كل كائن حي يتغذى من مواد عضوية إي نعم هو حيوان وكان الحيوان هو مجموعات الكائنات التي لا عقل لها راو (ويحلك فترية أخرى في حكاية العقل) راهو مش حيوان ، النوع هذا ديما يتبع الغرزة ! ............ما يجاوبكش...... أما يعطيك مجموعة إجابات تنسب حسب المفاهيم لكنه إذا تتفاهم معه على المنطلقات والنموذج المعتمد ما تلقى كان حقيقة واحدة.

النوع هذا بش يرد على اشكاليتنا أول حاجة  ينسب التخلف  ينسب النحن في السؤال ويقلك شنوا معناها ؟ وممكن يناقشك فيها زادة... مبعد إذا حكيتلو على قصدك وفسرتهولو بالقدا أكيد بعد ما يتجعبن عليك بش يجاوبك  بالظبط   كما يجاوبك راجل دين فاهم "لا يغير الله ما بقوم حتى يغيرو ما بأنفسهم" ويجب إعتماد الأخذ بالأسباب
و بالظبط  كما يجاوبك الثاني خاطركم عملتو ما من شأنه إنو يوصلكم لهذا الحال كيف كيف الثالث حتى ولو ما عندوش إجابات جاهزة يخمم وفي حكايتنا بالذات يتكتل معاهم عليكم ويحملكم المسؤلية. لذا إذا مقتنع انك متخلف فأعمل من أجل تغيير هذا التخلف وإلا تحمل مسؤوليتك خاطر  سيدي كل أنماط التفكير توصل لنفس الفكرة ...


نوت بوزيتيف : إذا مازلت تحكي بأحنا ...... راك ماكش بعيد :))