mardi 13 décembre 2011

يا أم يا أخت يا حبيبة







فوق شوك الثلج هي الدفاء، في دمعة القهر هي الأمل، مع لقمة المزرية ونوم الكرش الجيعانة هي الهناء، منين تخمم في الجوع الركوع والخنوع تلقاها عنوان الفداء. ساحة محمد علي تشهد عليها.. و حكايتها من قديم الزمن بدات.. منين جات.. على مراكب ما وفات.. جات وبجلد ثور صنعت الأسطورة.. و جابت و كبرت إلي هز الفيل للألب وجعلت من باجة مطمورة.. وصنعت شموس قرطاج وسهرت في بلاريجيا اتيك ودقة وصنعت الفرجة فوق كوليزي الجم، هي إلي نحات إلهمو الغم .. و لإرادة الحياة تعطي وعطات الدم..
هي إلي خذات الحرية وفكتها لا عروبة ولا حروب منعتها .. منين جاو الغزاة شكون عرضلهم ؟ مش داهية بنت ماتيا الزناتية ومنين قاتلوها خاطر مش مسلمة مش عربية .. مش رجعتلهم الجازية الهلالية؟

الطاهر الحداد عطاها الحرية؟ ملة اش تعمل عزيزة عثمانة والسيدة المنوبية ؟ شكون غنى ياما لسمر دوني يخي تحررت.. وتنحات العبودية؟

صليحة رخصلها بورقيبة بش تغني ؟

أم الفلاقة إلي تهز وتطلع الجبل وافقلها مونداس فرانس ؟

إلي تخدم في باب الخضراء،تحت القايد التركي، تبيع في بدنها.. ولي ولية صالحة فوق المدينة قبل ما يجي القاوري بقدرها... و تقلي تحرير المرأة تغريب ؟! هذي
تونس وهذيك التونسية حرة متحررة بنت الأرض والفلاحة والدشرة..، بنت العلم والقيادة وهي إلي عطاتك كفوف... بنت التركية العربية والامازغية: بنت حلاوة البشرة.. بنت الربوخ والفزاني والمالوف.

بنت تاريخ العظيم..هي إلي كانت جارية فحررت الرجال مل عبودية .. التونسية إلي منين تتكلم يخاف إلغازي من ملح بدنها التونسية إلي بنات وعمرت السبطارات ، التونسية إلي كي تحن عليك، تنسى كل إلي بيك وبضحكة منها تفرح وما تعرفش شبيك .. هي الدفاء هي الوفاء هي النغمة هي النسمة هي البسمة هي الهناء هي الحب هي السماء هي الخضراء هي .......الحياة



lundi 12 décembre 2011

السيرة الذاتية المنسية لفخامة رئيس الجم-مسرحية

g رئيسنا منبت .. يكره لهجة بلاده ويمقتها
 رئيسنا وصف صمود الجيش العراقي في حرب الخليج عام تسعين بأم الهزائم

 رئيسنا ترجى بن علي أن يجعل من نوابه دعم لترشح المرزوقي (للترشح للرئاسة في القانون عام 94 يجب مباركة 30 عضو برلمان

 رئيسنا قلب الفيستا من "لا ليس الإسلام هو الحل " إلى غلام خوانجية رئيسنا عاد إلى تونس في العشرية الأخيرة وعندما لم يحتمل 
المعصار -رغم حمايته الدولية مقارنةً بأخرين - خير العودة إلى نضال البرابول والصالونات المريح

 رئيسنا متزوج من فرنسية، عاش في احضان فرنسا وقنواتها ويقول إنه يمتقت الفرانكفونيين

 رئيسنا كذاب بدليل الصحفي اللبناني
 رئيسنا قضى حياته النضالية يطالب بحقوق الإنسان في كونيتها وشموليتها متجاوزاً الخوصصة الثقافية لكنه رفض - وحزبه- المصادقة على بيان منظمة العفو الدولية
 رئيسنا كتب في السابق مقالاً يطالب فيه بالمساواة في الميراث بين الرجل والمرأة لكنه بعدما أصبح مرشحاً تنكر لذلك وقال ذلك كلام المفكر لا كلام السياسي .. فكيف نستشعر نحن كلام السياسي من كلام المناضل ؟

 الخلاصة : رئيسنا غلام شئتم أم أبيتم يا صحافة المجاري

samedi 3 décembre 2011

أنقذو الشباب... تحليل وإقتراح


اليوم حدث غير عادي في تونس ، حدث لازم نتوقفو عندو ولازم قبل ما يتفاقم الوضع الناس الكل تحاول تفهم شوية

فما إعتصام في باردو قدام مجلس النواب إلي يحتضن المجلس التأسيسي حالياً .. الإعتصام هذا اهدافه تتلخص في النقاط التالية


- الفصل بين السلطات الثلاث

- عدم تجميع السلط في يد رئيس الحكومة


- عرض الدستور على استفتاء شعبي


- البث المباشر لمداولات المجلس التأسيسي واللجان المنبثقة عنه


-لا مجال لإستمرار عمل حكومة أغلبية المجلس رافضة لها


- الإهتمام بمطالب الثورة الأساسية : شغل _ حرية_ كرامة وطنية


- استقلالية القوات المسلحة


- جامعة شعبية _ تعليم ديمقراطي_ ثقافة وطنية


- عدم أدلجة التعليم

بالنسبة ليا المطالب في معظمها معقولة أما اختلف معاهم في طريقة التعبير والضغط ونرى إلي من المحبذ بما إنه صارت إنتخابات يكون الضغط على الأحزاب إلي صوتلها كل مواطن ويكون ضغط من القواعد (خصوصاً وإنه الحل والعقد بيدي المؤتمر والتكتل) ... على العموم هناك من إختار الإعتصام واختلف معهم في الطريقة لكن مدام الإعتصام لا يسكر المنافذ ولا حركة المرور دبرو روسكم ... الجديد إليوم هو بروز مظاهرة مناوئة ومطالبها حقيقةً هلامية من ناحية يقلك هذو يعطلو في حركة المرور وهما إنظمولهم .. من ناحية أخرى فما برشة كلام ما عندوش معنى وشعارات تنم عن حقد وجهل من قبيل

"يا بوبلوطة هز سروالك طاح اللوطى"


" وأمك سكرانة.. واجب "


أ"ختك عريانة.. واجب "

هل شعارات العبقرية التي تفنن الشاعر في اخراجها تخليك تخمم في من المسؤول عن هذه المظاهرة... ؟ الواضح والجلي إنه نور الدين البحيري وعلي العريض من حركة النهضة كانا على عين المكان لكن الحركة تقول أنا لم ادعو إلى هذه المظاهرة .. المهم لا علينا الحاجة إلي نعرفوها إلي المنظمين كانو على الفيسبوك .. المنظمين هذو حاولو طوال الأيام الفارطة تشويه المعتصمين بأقصى ما ينجمو .. وغض الطرف عن أسباب الإعتصام ومطالبه .. الشي إلي خلانا نشوفو ف مظاهرة اليوم شعارات كما هذه




كأنه الفصل بين السلط يقول إلي الهندوسية هي دين الشعب ولا مفهمتش شنوا يقصدو وتلقى زادة مواطن يهدد في مواطنين كيفو بالذبح !! إي نعم بالذبح !! على خاطر يطالبو ببث مباشر لمداولات التأسيسي وعدم رجوع الدكتاتورية !! شنوا الحقد هذا الكل يا أخ ؟







وتلقى ناس تعتبر الديمقراطية كفر وتجي تساند في المجلس التأسيسي في تشقليبة فكرية لا يفهمها عاقل ... ملخر ندفع شطر عمري ونفهم وين الإختلاف الفكري في الموضوع.


طبعاً هذا دليل على حقد كبير ومنين تبحث في الأسباب مش بش تحير برشة ..الأسباب واضحة وصريحة وهي الكم متع الحقد إلي تزرع فيهم وشكون زرعو ؟ المسؤول الأساسي هي صفحات الفيسبوك المتخنوجة إلي في عوض تناقش مطالب الإعتصام قعدت تحاول تشوه المعتصمين وتصوريهم كأعداء الدين أو أعداء الديمقراطية (عدم الرضا بنتائج الإنتخابات ) - ولهنا الحق شوية مل حنا شوية من رطابة اليدين - وهذا ما يخليني نكتفي بالمقولة هذي

السطحيون يناقشون الأشخاص

المتابعون يناقشون الأحداث

والعاقلون يناقشون الأفكار

وربي يهدي من كان سبب بش نشوفو شعب بعد أبهر العالم بوحدته ضد المخلوع مقسوم - مش حول أفكار- بل مقسوم بحقد وغل ضد بعضو و يوصل بطريقة سريالية تتخطى مفاهيم الرياضيات لنفي الأخر ونعته بالصفر
متناسياً اللي التوانسة إلي خرجوا نهار 14 جانفي قدام الداخلية صفر فاصل وإلي خرجو في ساحة محمد علي صفر فاصل صفر ..

وحتى 300 شهيد يجيو صفر فاصل صفر صفر ...


برف ربي يهدي المسؤول على تصوير من هذا النوع (مش في مناخ ديمقراطي بل في مناخ حقد وكراهية)





ونقترح مسيرة للوحدة الوطنية نهار 17 ديسمبر .. مسيرة تجمع التونسيين الفخورين بثورتهم وبالإنتخابات وبالديمقراطية

مسيرة لكل التونسيين وللاعلام الوطنية ولنرمي الياسمين على قبور الشهداء

lundi 31 octobre 2011

للأسوأ

نحلف

بطرح نوفي في العيد

وبملح السبخة بالقديد

بالقصبة، بالمدينة... بياب الجديد

بالثورة بديقاج، بالشعب يريد

نحلف

بتمييلة، بالنوبة، بأم العوينة الزرقة

بالدمار، بالشباب، بالقهاوي وبالحرقة

بالكريدي قريب مليار مرشوم عل ورقة

بالمدب بالقرأن و ...بالفلقة


نحلف

بسيدي بو...زيد و ريح الفل والياسمين

وبرشمة كبوط ليلة سبعة وعشرين

بذهب البركة ، بالسرقة وبخفة اليدين

بالصباب بالعمدة بالبوليس وبالطحين

نحلف

بأول بوسة مل خوف مسروقة

بلكبار و بورقة الملسوقة

بالطهور في الحارة وبخانوقة (1)

بكورة يرجعها الجار للصغار مفلوقة


نحلف

بحياة رجال وبحياة الدغباجي

بالحية، بالبرميلة وبالديناري باجي

بالمسعدي بالشابي وبالدوعاجي

بالحضرة بالجاوي بالبخور عجعاجي


نحلف

بحياة نساك بالسيدة المنوبية

بالطبعة بالعجاج بالسلاطة المشوية

بالرديف، بالمظيلة وبالمطوية

باللاغمي الميت، بالكمية، بالكاكوية


نحلف

بتكويرة في القايلة بالسخانة وبالغبرة

بالرشوة بالقلبة.. وبالنطرة

بالله أكبر، بالأذان، ...و بالكفرة

بالقمم الفايضة من أول مطرة

نحلف

بتاي الرجال إلي بنوك

بالزيتون بالنخل وبالشوك

بالفحل بالباندي وبالسكسوك (2)

تونسنا مش بش يبدلوك..مش بش يبدلوك




1 : الحارة حي في جربة يسكنه اليهود والمسلمون خانوقة عيد يهودي

2 سكسوك: مرخوف،ملحوس

ملاحظة : الكلام أعلاه لا يمت للشعر بصلة

dimanche 23 octobre 2011

فرحان ؟


بجاه ربي وسع بالك وإرتاح من ريق الإنتخابات... وايجا خمم معايا .. إليوم صوتت ؟ فرحان ؟ ميسالش تخمم في الناس إلي خلاتك فرحان ؟
في الأجيال المتعاقبة وخاصةً الشهداء
في المناضلين من كل الحساسيات والأطياف السياسية
في الجرحى إلي حد ماهو لهي بيهم

باهي توا رحم يهديك على الشهداء وكان تعرف جريح من جرحى الثورة حاول تحط لي كوردوني متع البطل هذا .. عندي إتصال بجمعية قد تتكلف بهذا الملف ونشالله نكونو ربحنا ثواب في جرت جست بسيط ورتحنا ضمير عشرة ملاين تونسي
ونشالله كل عام وأنتم احرار ومتكاتفين



email:extrablog@hotmail.com

mardi 18 octobre 2011

فزاعة


إليوم فما تونسي مات شهيد السطو المسلح الإرهابي .. نهضاوي، مؤتمري، تقدمي ميهمنيش هو تونسي عياش مات ونشالله جماعة "الفزاعة" يفيقو شوية ويحسو بقيمة الدم التونسي .. بدوها بالجيش وتوا مدنيين وربي يستر .. زيدو غطو عين الشمس بالغربال وسوف تندمون يوم لا ينفع الندم

روابط ذات صلة: رابط 1 ، رابط 2

mercredi 12 octobre 2011

أخر الحديث


بسم الله الرحمن الرحيم والصلاة والسلام على اكرم المرسلين أما بعد، فإنه لا يجوز لنا الحديث إلا بعد البسملة ولا الموت إلا بعد الشهاداتان وإلا كنا لا قدر الله من الخاسرين والله أعلم (ومن قال الله أعلم علمه الله ما لم يعلم)

يا أحبائي ويا اخوتي في الدين أردت أن أحدثكم عن حادثة الفيلم الإيراني الذي وقع بثه على قناة نسمة الفضائية يوم الجمعة الفارط وعن الهبة الشعبية الإسلامية المدافعة عن قيام الدين وليس عن الله عز وجل فكيف ندافع عنه وهو القوي ونحن عباده الضعفاء..

إن في هذه الهبة لا دلالات عميقة لتجذر الإسلام في هذه الأرض المباركة وفي هذه النفوس والقلوب العامرة بالإيمان رغم كل محاولات التغريب الفكري. والأن يجب العمل على غلق هذه القناة وكر الإلحاد والعهر الإعلامي.. باللين أو بالقوة ويجب على العاملين فيها الإستقالة إن كانو من غير اللواط والعاهرات ونحن نعلم أنهم كذلك

في طريق العودة

- شيخ سعيد ! شيخ سعيد !!
- أهلا بجارنا العزيز
يتمتم شبيه ولا يحكي بنحن هذا ؟

- وبيك أكثر يا شيخ

- يخي مش كأنها لغتك تبدلت شوية في الدرس متع إليوم تتذكر منين اخترناك إمام للجميع بالرغم إلي عندنا مدة ما نعرفو شي عليك أما وقتها قلتلن تونس بلاد الناس الكل حتى الشيوعي مرحبا به أما احنا ندفعو على مشروعنا والشعب هو الفيصل. إليوم مش كأنك كثرتلهة من الشتائم هاو متفرنسن هاو كفار هاو عاهرات و مثلين يخدمو فيها .. ماك تعرف توا واحد يسمع هل كلام وبنت أخته تخدم فيها بش يتقلص شوية من برشة
- اسمعني ولدي
(شبيه يحكي بولدي هذا)
-أنا راني في الأمور الدينية ما نيش ربي بش نبدل في رسالته هذاك هو الدين وكانك على بنت أختك قلها تخرج من قناة الفضايح هذي
- ماهو .. الخبزة..
- لا ماهو لا شي اسمعني مانيش بياع في السوق بش تبيع ويشري معايا في الدين
-ما نحكوش على الدين لهنا أما الخبزة فش جات
-قلي ملا المرة الجاية تخدم راقصة ولا في بار واش علينا

- سيدي ( يتمتم ازاح أول مرة نقولو سيدي علاش كأني حاجتي بشهادة منو) ماهو (بالحرام لاني بش نحكي معه بالدين اخرتها نقولو سيدي ..واحد أجهل من سباتي أصغر منو بعامين وخذيت السزيام وهو لا ) الحرية

- لا، الحرية احنا معاها وماك تعرف حركتنا كانت تناضل من أجل الحرية أما الحرية عندها حدود .. نجيشي نسبلك الوالدة بسم الحرية ؟
- ماو (يتمتم أما إلي سبتهم توا ميسالش ) زادة كل واحد فهمو للحرية مش لازم نتفاهمو على الحدود قبل..

-إذا نحكمو بغير ما أمرنا به الله فذلك الخسران المبين .. حاجة حرام يعني حرام !
- وشكون يحدد ما أمرنا به الله يا شيخ ماك تعرف احنا ديجا في جمع صغير فما صراع على الإمامة

- طبعاً أهل الذكر من العلماء
- ماهو هكاكة يجيش واحد مسيحي يقولك معادش تشهدو ولا تأذنو خاطر حرام عندنا

- أنا مانيش نصراني وأنا إمام وحسيبي ربي -بإنفعال- تجسيد الله حرام يعني حرام ومنعملوهش في أرض الإسلام

- ملا هكاك حتى الشراب حرام وصوت المرأة حرام والإختلاط حرام وعند البعض الجلوس على الكراسي حرام والقنوات الكل تعدي في غناء حرام جات على هذي ؟ بش نولو من المنافقين يا شيخ؟




- كان جات الدنيا دنيا منخلو شي حرام يتعمل في هل بلاد المسلمة .. وزيد كان لاحظت أنا قلت مبكري لازم نفهمو الدلالات متع الهبة .. توا جزء من الشعب جاء معنا ومبعد مش بش ينجم يوخر ويبدل رايو.. شعب راسو كاسح ... أما توا مش وقتها الحكايات هذي .. الحرب سجال كر وفر ... منين يصير إلي نحبو تو تزيد تفهم

-واضح، يا شيخ واضح، ...واضح عل لخر..


lundi 25 juillet 2011

برى قيد

فما ناس عطات من دمها للبلاد

فما ناس عطات من فلوسها للبلاد

فما ناس عطات من بدنها.. من لحمها.. من عرقها.. من صوتها.. من قرايتها.. من مستقبلها ومن عايلاتها





هذا الكل بش يعطوك فرصة بش تنتخب إلي تحب عليه.. ما تخونش دمهم برى إنتخب وبش يكون عندك أكثر حظ (فما إمكانية تنتخب من غير ما تقيد) بش تنتخب: برا قيييييد


"يا من لم تسجلوا ، شكراً على وفائكم" (زين العابدين بن علي ، جدة، في 25/7/2011)

mardi 7 juin 2011

قصة كسر يد سناء حوى





بسم الله الرحمن الرحيم


إليوم وأنا في سلام في محلي، سمعت شوية حس البرة، خرجت قلت نشوف اش فما، شفيها هذي؟ أكهو عاد أنا خرجت نلقى جماعة متع عباد يدعو لحزب معين أما مهوش حزبي أباً عن جد "إلي ما ننتميلوش"، عادة أنا ما حملتش خرجت قلتلهم اش تعملو قدام محلي؟ قالولي احنا ندعو للحزب الفلاني.. قلتلهم أية إمشو من قدام محلي طيرو من باحذية؛ نورمال قاعدين في الملك العمومي؟ ومبعد لمحت واحد كأنو خذا رخصة متع تاكسي (الحق مش متأكد) بعد ما عمل بطاقة إنخرط في التجمع، أكهو عاد طلعتلي الكلبة بنت الكلب.. أنا انسان مبدئي نرى واحد مشي مع واحد تجمعي (وما أكثرهم إلهم: زوز ملاين) نطرد جد والديه! نورمال نطردوهم من المجلس التأسيسي ونخلوهم في الكياس "العمومي" إلي قدام داري، كان جات الدنيا الدنيا رانا قتلناهم وخلينا 5 ملاين يتيم ميسالش.. أما احنا دللناهم لين ولو يمشو في الكياس جملة.. شنوا هل استفزاز الذي ما بعض استفزاز!!!!

أكهو عاد قلتلهم شقلبو بعيد من الكياس، قالولي إنت شكونك من أي حزب، قلتلهم أنا من حزب النقلة أب عن جد، (أما راني مانيش من حزب النقلة؛ جيست نفدلك) وبديت نبعد فيهم، أنا هكاكة ونشوف في بنية جبدت مصورة وتصور في الأحداث.. اش مازال بعد هذا الإستفزاز، أنا نطرد فيهم وهما يصورو كيفاش هذا؟! تخيل إنت بوليسي يطرد ولا يضرب في واحد ويجي صحافي ولا مواطن ما يحشمش يصور فيه أكيد بش يفكلو الكاميرا ويضربو.. وبالطبيعة الحق مع البوليس، وأنا كيف ما قلت انسان مبدئي: نهار في شارع بورقيبة مشي على روحي ونشوف في كاميرا تصور في المشي والجاي من غير ما تشاور الناس.. أكهو عاد دغرت مذهبو بسكينة.. نورمال شنوا هل استفزاز!! طالع فوق عمارة يصور في العباد من غير ما يشاور!! ملا مصورين أخر زمان
أكهو مشيت فكيت المصورة، اش عند نعمل؟ وهي الحق ما سلمتش بسهولة في مصورتها، واحنا هكاكة هي تجبد وأنا نجبد تقويت عليها شوية وفكيت المصورة، هي عيطت شوية ومبعد مشات على روحها.. وفجأةً تبخرو جماعة التجمع وشفت جماعة التقدمي، منهم واحد نعرفو مليح دافع علي قبل.. سلمت عليه وحكيت معاه ورجعتلو المصورة


ما راعني كان مبعد الطفلة إلي طلع اسمها سناء حوة، خرجت فيديو حكات إلي صار وقالت إلي رجعت تخدم أما بعد مدة حست بوجايع ومشات للسبيطار وطلعت يدها مكسر.. أما الحق حزبي إلي ما ننتميلوش ما قصرش خرج بيان (بعد ما إتصل بيا ماهو حزبي: عطيتو روايتي )و تكفل حزبي العتيد باصدار بيان في الغرض يدين الاستفزاز المجاني ويندد بممارسات النظام البائد الرامية الى تشويه نضالاتي ومواقفي الرائدة في مجال حرية التعبير وحقوق الانسان.

والحق متع ربي حتى صفحات الفيسبوك ب
رشة جو معنا وطلعوها الطفلة تجمعية و شوهوها هي و العائلة (و لو فما شوية زلع
كما تجمعي معرس بمناضلة نسوية، أما نورمال الشعب كلا الحربشة)

، بالرغم إلي كانت مناضلة وتتحرك وقت إلي برشة ساكتين

ملخر عملو معايا المليح أدانو كل شي، وزادة جابو طبيب ما يعرفش يكتب كلمة
poignet


بالرغم إلي هي عندها شهادة طبية بالطابع، أما بون شكون سماع بها لحكاية؟ عندها ألف صديق على الفيسبوك اش يجيو مقارنةً بالصفحات متع حزبي العتيد إلي ماننتميلوش


وفي الختام نحب نشكر كل من وقف معايا وما ننساش بش نذكر بمبادئي ما فيها باس
بوليس ينحي مصورة واحد، تو تتكفل بالدفاع على البوليس المظلوم خاطر ما شاوروهش قبل التصوير ولا اي مواطن يستفزني بمحاولة تصويري مستعد نعتدي عليه ونكسرو وسيتكفل حزبي العتيد باصدار بيان في الغرض يدين الاستفزاز المجاني ويندد بممارسات النظام البائد الرامية الى تشويه نضالاتي ومواقفي الرائدة في مجال حرية التعبير وحقوق الانسان. والويل كل الويل للجزيرة إلي تصور شارع الحبيب بورقيبة دون إستشارة المارين!!

وأي واحد يمشي مع واحد خذا بطاقة إنخرط في التجمع (لمدة 23 سنة، أنا من أنصار 23, بزيد واحد ينظم لحزبي الذي لا انتمي له) راني نطرد جد والديه مل كياسات، هذا إلي مازال واحد تجمعي سابق يعطوه في بطاقة إنخرط بالسيف يسركل في الكياس!! (على فكرة أنا قبلت شوية بطاقات إنخراط منين كانت سناء حوى تناضل أما ما تشلقوش) و
وختاماً نحب نعتذر الشباب حركتي حركة النقلة على الفيسبوك على الزلعة إلي زلعتهالهم منين اعترفت إني قلتلهم أنا نقلة أب عن جد، بعد ما هما كذبو و قالو منين عرفو اني نقلة، واشكر فيهم حنكتهم في غير هذه الجزئية

وفي الأخير ادين الحملة المغرضة الموجهة ضد حزبي العتيد إلي ما ننتميلوش


السلام عليكم ورحمة الله وبركاته

أي تشابه في الأحداث أو الأسماء فهو من قبيل الصدفة
الصور غير ملازمة للقصة، فالقصة خيالية

تسلفت سطرين من فاطمة ارابيكا، نشالله تسامحني على السرقة الأدبية

lundi 30 mai 2011

اليوم الإنتخابي


صحافي: شكراً أخت ريم نحن الأن أمام المدرسة الإبتدائية بالمنطقة الفلانية، فما مواطنين ما يقولوش لشكون صوتو يتمسكو بسرية صوتهم و فما شكون داخلين بالشعارات الحزبية.. هاو فما مواطن خارج توا ناخذوه على المباشر

صحافي: مرحبا بيك خويا إنجموش نعرفو لشكون صوتت؟

مواطن 1 : وبيك اكثر صوتت لصوت الحق حزب النهضة وافتخر بذلك علاااانيييةً

صحافي :علاش؟ لماذا؟ اه مش الإفتخار، أما لماذا صوتت للنهضة؟

مواطن1: خاطر خير وأحسن من العلمانيين إلي يحاربو في الإسلام ويحبو يجيبولنا حاجات مش متاعنا، فهمتني؟ و..و..و ينحو الحجاب هذا لا قال به لا ربي لا النبي، أما النهضة ناس شيوخ علم حافظين كلام ربي، يخافو منو ومناضلين زادة مناضلين اه! تعذبو مساكن منين كنا وأنت ساكتين، نشالله وبحول الله تعالى، رب السماوات والأرض سينصر هذا المشروع.

صحافي (يطفي الضو على منين أنا و إنت ساكتين و يتمتم بينو و بن روحو كان جاء يعرف اش كليت مترك سنين رهو متكلمش): شكراً ليك (من فوق قلبو ما عجبوش السيد إلي يحسب فيه كان ساكت وعلى خاطرو صوت للنهضة زادة و الصحافي ميتيقهاش لله في سبيل الله) ناخذو مواطن أخر، إنت خويا لشكون صوتت؟

مواطن2: لحزب المجد

صحافي: علاش شنوا إلي عجبك بالضبط في برامجو؟

مواطن 2: خاطرو ضد الماسونية

صحافي (يبتسم): شنية الماسونية؟

مواطن 2: هاذوما الجماعة إلي الناس إلي مش مثقفة متعرفهمش،(بكل فخر و إبتسامة متع واحد حاس رحو هنتلو تهنتيلة ستبقى في تاريخ التلفزة التونسية أكثر من كوميك سرقة البنك في القصرين) هذوما الناس إلي يخدمو لليهود في السر، ريت إنت اوباما؟ مش هو إلي يحكم في أمريكا هذي الصهيونية العالمية عملتها هي والشيطان بش تتأمر على الدين، وتخدم مع إسرائيل هي إلي تحكم في أمريكا تحب زادة في تونس أما سي عبد الوهاب نشالله ديمة فايق بالملعوب الكلو والمؤامرات الكبيرة هذي، تعرف كان نبقى نقكلك من إليوم لغدوة ما توفاش حكاية الماسونية راهو ملعوب كبير ويخوف

صحافي: شكراً لك (تنرفز المرة هذي قال بينو وبن روحو نعنبو لبهامة) سامحني حاج سامحني حاج

رجل كبير في العمر: السماح اه صحافة هذي؟

الصحافي: إي إي صحافة،... تلفزة تلفزة

الراجل:تلفزة ولا صحافة؟

الصحفي (يطفي الضو ما فسرلوش إلي التلفزة صحافة) تلفزة

الراجل: اه تلفزة ملة ستنا شوية نقعد الضلالة ومبعد صور

-خوذ راحتك حاج أما رانا على المباشر

-أيواه أية تفضل اسئل

-حاج شنوا رايك في هلعرس والأجواء الإنتخابية؟

-واللهي شي يعمل الكيف نشالله بركة يصير إلي قالولنا عليه،

-شنوا إلي قالولكم عليه حاج

-والله قالولنا برشة حاجات، أنا وصاني ولدي من تونس يقرا في الجامعة هو..الناجح و الكبير، قلي برى هز ورقة الشيوعي، يخي عاد أنا قتلو بالك نرضع في صبعي، نصوت للي نحب ونتومة بارك الله فيكم في التلفزة توسو فينا إلي يلزم حد ما يأثر فينا والناس ماشية جاية علينا تحب تأثر علينا

الصحفي يضحك:هه هاو معانا مواطن مثالي، فاهم اللعبة رفض إنو يصوت تحت تأثير إبنو، شي يعمل الكيف حقيقةً

إي بابا لشكون صوتت؟

-للشيوعي،

-ههههههه شنوا توا بابا الحاج مش قلت لولدك لا

- تي لا عاد هو جايك لحديث ماك قصيت علي، يا سيدي أنا قتلى منصوتش هكاك قلي علاش؟ عاد هو فسر ليا، وقلي إلي الحزب هذا يدافع على الزواولة إلي زي حالنا، و بش يكبرلنا في وطاتنا وينحي في أرض "فلان بن فلان" إلي ماكل الدني ال...

الصحفي (يقص): نعتذر للإسم الذي ورد تعرفو الناس الكل ضروف المباشر نعودو للأستديوهات المركزية في إنتظار جولة أخرى إليك الخط ريم

(ينفخ ويقول ملا حالة حتى واحد ما صوت لبرنامج ) شد ورقة حزب الوطن، عاود قراها قال هو تصويت سري تصويت سري، حد ماهو بش يعرف، أما مستقبلي لهنا يضهرلي أضمن، يشنع شوية بالحرام كان مانحط الوطن، تي سي فريعة

جارنا في البلاد ومش خايب

.. نشالله بركة مازال هكاكة ولا بش نقعدو...

شكراً ريم، نواصلو الاستجوابات معانا أخ، خويا.. قلي اش رايك في هل عرس الإنتخابي
أجواء رائعة حقيقةً ومنتجة-

نعرفو إلي التصويت سري .. وهذا حقك بطبيعة الحال أما تنجمشي تقولي لشكون صوتت؟-
(شابين يتعدو في الخلفية يعيطو فورزا النهضة)

صوتت وبكل فخر لحركة الشعب الوحدوية التقدمية ..الحركة العروبية المناضلة.. ،إلي انتم ضالمينها في الإعلام على فكرة، هذه الحركة ذات برنامج واضح وأهداف واضحة، إعادة العمق العربي لتونس والعمل على تحرير فلسطين من البحر إلى النهر وتحقيق الإشتراكية الناصرية الحقيقية..


شكراً ليك سيدي الكريم.. نستمسحك أخت ريم نمشي نمارس واجبي الإنتخابي ثم لنا عودة.. يمشي ويتمتم.. وطن؟ أفاق؟ بي دي بي ؟ شكون خير
زعمة؟ وينو الحزب الوسطي؟ تي هذا تجمع وهذا قالو فرنساوي ولاخر أمريكاني.. بفففف لخرين؟ زعمة هذو احزاب؟ نمشي نشوف واحد من الجدد وكهو زعمة...

mercredi 18 mai 2011

أحداث الروحية: لا للمتاجرة السياسية، وللمؤامرتين اغسل ساقيك وأرقد


كنت أشرت سابقاً (لهنا) إلى الخطر على تونس من الإرهاب وهذا يعني التعامل بحذر ووجوب الحيطة.. وتوا باهي التذكير ومذابيا جماعة المؤامرة يحشمو شوية راهم كثرولها بالبهامة، تبقى حاجة الأحداث الصايرة لا يجب استغلالها سياسياً كما تفعل الأحزاب والصفحات الدينية لأي تصريح أو حوار أو مقال لملحد ويحاولو إستغلالو، كيف كيف توا أنا ضد إستغلال سياسي لسحب ذلك على كل تيارات الإسلام السياسي.. ما تنسوش فما مدرسة قرأنية وفما إسلام لبرالي واليسار الإسلامي وفما إسلام كما ألفة يوسف (إلي برشة يكفرو فيها و الخطر عادةً من التكفيريين ) بخلاف حركة كيف الإسلاميين الديمقراطيين إلي شخصياً عندي ثيقة في جمهوريتها.. وفما زادة بيان مشجع من حركة النهضة يستحق الشكر ولو اني صراحةً معنديش ثقة فيها لما يقال في السر وما يقال في العلن كما قال السباعي لهنا وأنا نصدقو هو أكثر وما عندوش علاش يكذب (قلك الديمقراطية حرام) بدا يحكي من الدقيقة 39 وخاصةً في الدقيقة 41 قال يمارسو في تقية سياسية ويقولون في السر أشياء أخرى (على فكرة حلقة مفيدة جداً تخرج باستنتاج وحيد هو البلعوط سيئ الذكر بسيس أهون و أصدق من العريضي -قضية باب سويقة،تقية إلخ..) .. أما البيان يبقى خطوة إيجابية تشكر وما يلزمش إستغلال القضية سياسياً ولو فما مطالب مشروعة كما شفافية مداخيل الأحزاب..إلخ أما نفضل تكون دون إستغلال القضية والمتاجرة بدماء شهيدنا
المختصر المفيد لا يمكن أن يكون حرب على الإسلام في تونس إذا واحد يحل مخو مثلاً في التصويرة هذي..

أما يجب الحذر واليقظة والحرب ضد المتطرفين مدعي الإنتماء للإسلام... وعملان مولى الدار مش هوني وجبدان اش عمل بن علي بشماعة التطرف يذكرني بقصة الراعي إلي يعيط هجم الذيب بالفدلكة في لول ومنين جاه حد ما صدقو.. المختصر المفيد: الخطر موجود من الخارج، و أيضاً من الداخل من الذين يريدون إستغلال الإسلام والديمقراطية للفوز بلإنتخبات ثم الفرعنة عملاً بقاعدة يتمسكن حتى يتمكن، خاصةً وإنو دستور كامل في الميزان، لذلك أعتقد إنو عقد جمهوري توافقي في شوية ثوابت ما فيه باس وما يضر في شي.. واقترح بنود وثيقة 18 أكتوبر كوثيقة ترضي جميع الأطراف الفاعلة (أكبر احزاب في نظري هي البي دي بي والنهضة مصححة عليه فيا حبذا تلتزم بيه) ولازم وحدة وطنية حقيقية ومقاطعة صفحات الفتنة الداخلية إلي احترفت سب العلمانية ونشر المغالطات والحداد على بن لادن لأنها تعتبر ذبح السياح والصحفيين والهجوم على القرى المعزولة لإبادتها عملاً بفتاوي لندن، وتفجيرات انتحارية في أسواق العراق الجريح من الإسلام.. هذه الصفحات كما بعض الحركات تحب تنسب الإسلام ليها وتعين روحها ناطقة بسمو بش تستغل إيمان الشعب وغيرتو على دينو لبث سمومها في صفوف الشباب.. العباد هذو لازم نعتبرهم خطر يجب على كل تونسي مسلم عاقل أن يتصدى له كما الإرهاب الجسدي فالإرهاب الفكري أخطر لأنه يولد ويشرع العنف

الخلاصة: لا للإستغلال السياسي، نعم للحذر كما قلت سابقاً، نعم لميثاق وطني حول ثوابت نكونو متفاهمين عليها الناس الكل وإذا أنت ماكش موافق أعلن ذلك قول منمنش بالحرية مثلاً.. بش تبدا لومور واضحة عند الناخب
سلام
*********************************
ملاحظة أخرى فما برشة غباء قاعدين يسيبو فيه على الفيسبوك، حاولو تخممو شوية قبل ما تتبنو -منطقهم- إلي أبعد ما
يكون عن المنطق ، حفظ الله تونس وأهلها من كل مكروه، ونشالله سينتصر الشعب الموحد على أيمة الفتنة

jeudi 28 avril 2011

يوم التدوينة المدنية: الخطر موجود رغم سذاجتكم



بمناسبة يوم التدوينة المدنية، هاني قررت باش نشارك ونوري الناس إلي الخطر موجود على بلادنا. نعرف فما عباد مثلاً كيف تحكيلها على التطرف يقولك شبيك خايف اى ولدي ما فما شي، الإسلام باهي! إي شكون قلك الإسلام خايب ولا بيه ولا عليه؟ فما ناس عندها تفاسير متطرفة ومعادية للحريات، وهذا ما يعنيش تشويه للإسلام أما السكوت عنه هو عين السذاجة. توا حزب التحرير موجود ولا؟ مهوش خطر على الحرية؟
فما شكون في بالو كيف نقولو لازمنا التوانسة الكل نكونو ضد التطرف يمشي في بالو نهاجمو في الإسلام؟ ولهنا قمة العوج، توا احنا ألمان بش نهاجمو الإسلام؟ على كل حال إلي بكل سذاجة ماشي في بالو مفماش خطر على تونس، هاني باش نفسرلو إلي فما ناس فهمها للإسلام يسمح بأنو إذا فما سلطان حسب رأيهم فاسد فيجب الجهاد ضده والذي لا يجاهد فهو راضٍ بحكمه وهو فاسد بالتالي ويحل دمه ونساءه وابنائه، وهذا هي في العموم ما اصطلح على تسميته فتاوي لندن، إلي سمحت للحركة التي تسمي نفسها إسلامية في الجزائر بالهجوم على قرى معزولة وذبح من فيها وبالمناسبة الجزائر جارتنا والحركة هذي انضمت للقاعدة ومعادش خدمتها كان الجزائر أما خذات سكتور المغرب العربي كامل. معناها كان فما شكون خطرلو إلي يحكم في تونس فاسد متستغربش نهار تولي كافر وما فيبالكش
هذا الجانب المخطر وهاو رابط صفحة تنشر فيديوات القاعدة وتهتم بالوضع التونسي وفيها 17 ألف عضو (اللهم أنعمت فزد). و فما جانب أقل خطورة من الإعتداء الجسدي لكنو خطير بعد ثورة الحرية، كيما لعباد إلي تحب تسكر القهاوي والمطاعم في رمضان بالقوة، ولا الناس إلي سكرت المواخير بالقوة الجسدية لا القانونية ( والله أعلم قداش من ماخور غير مراقب تحل) وكيفكيف الناس إلي تحب تفرض أي أجندة بالسيف كما إلي يحب بنات الناس ينحو الحجاب، كما إلي يحب ينحي الشراب الكلهم فرد ساك يقضيو على مدنية الدولة بصفتها إطار تنظيمي لكل الناس و تسمحلهم باش يعيشو بحرية مقيدة بالقانون إلي لازمو يراعي الناس الكل، مش طرف بركة حتى وإن كانو أغلبية .


إلي بالرسمي مش حاسس فما خطر على تونس وقاعد لاهي يفركس على اش قال واحد ملحد، ويقول فما خطر على الإسلام فهو سامحوني في الكلمة ضايع فيها وما يعرفش إلي الإسلام متجذر في الشعب وإلي ما فماش حتى خطر عليه إلا من المنتسبين إليه مثل التكفريين أو حزب التحرير الذي لا يؤمن بالحرية وإلي منعرفش علاش يقع الحديث عن وجوده كأمر عادي.. وهاي غناية فرحانين ونشالله كل ثورة واحنا فرحانين، أما إلي حبيت نوريهولكوم في الفيديو هو المحجبات إلي داخل هيئة تنظيم إجتماع حزب العمال الشيوعي بقفصة إلي يعتبر أقصى اليسار، معناها إلي مازال خايف على الإسلام من الأحزاب المدنية مذابيه يمشي يرتاح خيرلو وياخذ راحة يحسب فيها عدد المسلمين في تونس باش يعرف إلي الإسلام جبل ما يهزو ريح ف هالبلاد، أما الأحزاب الإسلامية تحب تنصب روحها حامية حمى الدين باش تكسب أصوات وتنفذ فهم معين واحد ووحيد للدين الحنيف... وبكلام وسذاجة كيف المنتشرة هليامات برشة ناس تعاون فيها وتسيب في التطرف متاعها كما بسيكو م ، إلي يقول بكل وقاحة "كان جا بيدي نعطيهم بالكلاشنكوف كما هذاك إلي عمل ماكينغ أوف" الناتج عن الخلط المتفشي بين الإسلام والإرهاب في عقله كما برشة عقول أخرى، تحب تتجاهل تفجيرات مراكش اليوم، وقتل متضامن إيطالي أيامات التالي في غزة.

ختاماً إلي مازال في بالو مفماش خطر على الدولة المدنية لازمو يحاول يفيق ويشوف شنوا صاير توا ويخمم بشمول أكثر، ويبعد على كل سذاجة في التحليل ومراهقة تنجم تخليه يجهل المعنى العميق للحرية، وتخليه معادش يفرق بين التهجم والنقد، و تخليه ما ينجمش يستوعب حق الأخرين في الوجود والتعبير الحر والنابع عن قناعاتهم،

المفيد، احنا نحبو أي مواطن تونسي عندو الحق في الوجود والعيش والحرية، نحبو المتدين عندو الحق يمارس شعائرو إلي ما تضر حد بكل حرية، واحد ملحد عندو الحق يكون ملحد ويعبر عن الحادو دون خوف من باقي المجتمع الذي سيحترمه كما يحترم المتدين.
هذي هي تدوينتي المدنية ونتمنى كل عبد يفهم معنى الحرية إلي ثارت على خاطرو الناس، وإلي تكلمو فيه وقادوه شباب تقدميون ومازلت أذكر فيديو كلمة أحد شباب الوطد أمام محكمة سوسة بعد أيام من إنطلاق الثورة. ذاك الشاب لا أعتقد إنه خاطر بمستقبله من أجل أن تغتصب منه حريته تحت أي مسمى كان.



dimanche 24 avril 2011

Le politique et le religieux!



Et nous pâtissons tous de cet état de fait depuis trois décennies. En ce sens que les fondamentalistes radicaux tiennent, à tout prix, à teinter de confessionnalité tous les compartiments de la vie. En effet, il ne saurait y avoir, pour ces doctrinaires de la vision globalisante religieuse, de politique ou de droit ou de philosophie ou même d'économie, voire de science, qu'islamiques. N'a-t-on pas entendu - à titre d'exemple - un " éminentissime " mathématicien, à l'entendement altéré par les thèses distordues islamistes, soutenir, le plus sérieusement du monde, devant ses étudiants sidérés, que dans la géométrie euclidienne, certes, deux droites parallèles ne se rencontrent jamais, sauf si Dieu Tout-Puissant et Sage décide de les faire se croiser ? ! ! Lorsqu'on lui objecta, tout de même, qu'en épistémologie, l'axiomatique mathématique ne consiste qu'à établir des systèmes formels complètement autonomes, ne représentant aucune réalité extérieure où seule compte la logique interne dans une autovalidation, même si par ailleurs chaque système est isomorphe à un pan de la réalité qu'il est censé modéliser, il rétorqua en balayant d'un revers de main ce qui pour lui n'était qu'une vaine ratiocination, que tous les domaines de l'activité humaine, et ce qu'elle produit, appartiennent à Dieu.

Et, voilà que nous retrouvons toujours le même argument qui met fin à tout débat, avant même qu'il soit instauré.
C'est le même fil conducteur qui mène les idéologues de l'islamisme politique à rejeter la dissociation du politique d'avec le religieux, dès lors qu'ils considèrent que c'est là un mode de pensée qui heurte l'essence même de la religion islamique. Lors donc qu'elle érige Dieu en principe absolu de cet univers, hommes, vie et mondes sont la propriété incontestée de Dieu qui détient la Puissance suprême. Certes, la souveraineté cosmique divine est incontestable pour les croyants monothéistes et son omnipotence est attestée. Dieu nous est Proche. Il nous est même plus Proche que notre veine jugulaire, mais rendre sa souveraineté et son omnipotence coextensives jusqu'à la moindre petite circulaire ministérielle reviendrait à la ridiculiser. Vouloir trouver dans le Coran de quoi étayer le moindre petit arrêté municipal n'est pas sérieux. Cela consisterait, surtout, à usurper le rôle de porte-parole de la Providence à laquelle incombent in fine la rétribution et la guidance. Le contact fulgurant et impérieux de la transcendance avec la réalité contingente n'implique, en aucun cas, un protocole opératoire. Ce n'est pas du tout un recueil de règles et de formules pour les actes publics.

En tout cas, ni la Providence ni ses directives ne sauraient être confisquées par qui que ce soit.
Didi!

lundi 18 avril 2011

رد على تدوينة : نقد النهضة




هذي بش تكون لي سابقة بش نكتب تدوينة كرد على تدوينة أخرى ممكن متشجع خاطر المدون المعني بالأمر صديق إفتراضي ليا و نتوقع إنو باب النقاش معاه مفتوح أكثر من برشة دوغمائين (أهوكة ضربتلو اللغة بش ما يدخلش فيا) ، وزادة لأني حسيت إنو لازم تقديم الصورة للعموم و نظراً لطول الطرح خيرت مش بش يكون تعليق بل تدوينةلهنا بش نحكي على هذه التدوينة للمدون بنفسجيت حر كاليميرو ، أملاً في انو يفهمني ويتناقش معايا
حسب ملاحظتي الأولية : كتب الخبر في سياق يطغى عليه إتجاه واحد ومنظور واحد، معناها -مش كيما قال ولا يظهر من كلامو إن نقد النهضة مافيهيش جانب صحيح ما عن حتى علاقة بمفهوم هجمة- نقد النهضة فيه الغث والسمين وأهم حاجة المغالطات من الجانبين، فما أغلاط وفما تمسكين زادة من النهضة و احنا نتعرضو لحملة و احنا يا حليلنا نسخفو و احناحقوقنا مهضومة و نعانو من الإسلاموفوبيا!! توا بلكشي عايش في اللامريك بش تقلي إسلاموفوبيا ؟ تونس أغلبية ساحقة مسلمة وتقلي إسلاموفوبيا؟ توا أنا نعرف حتى السكارجي ماخذ فكرة بهية علي يصلو والملتزمين هاو هذاك ناس طيبة يصلي ويعرف ربي. تي مرة في تكويرة الراجل يحب توش قتلو ما مستنيش الكرة، جاني صاحبي فرد ايكيب وقلي الراجل يصلي مش بش يكذب عليك!!! وإنت تقلي إسلاموفوبيا؟ تعرف شنوا معناها يخي ولا تتهيبل؟ معناها إنت مسلم دنك تخوف، إذا فما خوف من التطرف ما يتسماش اسلاموفوبيا وإلي يمن إلي فما إسلاموفوبيا في تونس يا إما بهيم حشاكم ويا إما لغاية في نفس يعقوب كما لحبيب إلي عامل الصفحة هذي


باهي توا نرجعو للرد على التدوينة، فما إشاعات وإشاعات مضادة، حسب ما قلت إنت إشاعة حكاية الأستاذة والنقاب، أناحسب ماعرفت لحكاية هذي خرجوها برشة ناس متعاطفين مع النقاب على الأقل اصدقائي منهم خرجوها كيما خرجو
هاك الطفلة في صفاقس إلي باعترافها تقبحت على الأستاذ خاطر ما قبلهاش بالنقاب وجابت خوها عطاه طريحة، والجماعة تتبكى والله ما حقوش الأستاذ، نورمال ياكل طريحة وتتقبح عليه تلميذة!، قال شنوا حرية ! والله نتمنى من هذو الجماعة كانهم جماعة حرية, ينادو بالحرية حتى للعرايا معناها كيف يجيك أستاذ قلم ما يقلقكش، ولا وقتها الحرية تولي عندها ضوابط؟ وكيفكيف على المثلية الجنسية.... إلخ إذا إنت تعتبر انها حرية شخصية، ووقتها نفهمك إلي إنت وصلت لدرجة في منظور الحرية متاعك فاتتني وفاتت مخي
البسيط أما ضربان اللغة مش لازم منو.


سامحوني طولت في التعريج، جيست حبيت نقول إلي الدعاية والدعاية المضادة موجودة.

باهي بالنسبة للحرية الدينية مسمعتش أنا فما شكون مش بش يضمنها؟ واللهي توا حتى هذا كلام!
بالنسبة لإستعمال المساجد صار, والناس الكل لازمها تحكي فيه وسامحني حطان النقطة هذي في سياق التدوينة اسمها مغالطة كبيرة، كأنها مش نقد هادف وعندو معنى، أنا نحكي مثلاً على بلادي جربة صارت مشاكل على الحكاية هذي متع تغير الأيمة، معناها النهضة قاعدة تتدخل ومش من حقها،وبالنسبة لإستعمال المساجد (خاصةً بالطريقة إلي حكى بها صديقنا كالميرو ، كأنو يقول يا مصلين كان مش بش تصوتو نهضة راهو الجامع بش يسكر ويردوه بار! قلو ضمان الحرية الدينية


يخي فما شكون
مش
بش يضمنها؟ تي الوطد قالك عنا رفقاء حجاج بيت ربي وإنت تقلي ضمان درة شنوا! حتى هذا كلام! حملة التسييس في المساجد مع الوعي المحدود والجانب التقديسي تخلي العملية مربحة ونفهم علاش النهضة تنحي إمام من البي دي بي بش تحط إمام نهضوي كما صار في صفاقس. الوقاحة والإستهتار بالمعتقدات المذهبية وصل بيهم بش ينحو إمام اباضي في اجيم جربة (نأكد إنو كان صباب كبير) وتعويضه بإمام مالكي ولا سلفي ولا شنوا المهم عرفوه مش اباضي من تكبيرة الإحرام ، قال شنوا الكلنا مسلمين وكيفكيف، قالولهم أهوكة فما جامع المالكية قلك الناس الكل تصلي معانا، كان هكا وما وصلوش للسلطة وما يحترموش الأقليات ، ملا كان جات بيدهم كيفاش؟




وهكا بش نتعدى لحكاية إيران، لهنا نحب نقول التاريخ لا يرحم إلي ما يتعلمش منو، معناها كيف نقول منحبش مثلاً ثورة مذهبية ولا دينية معناها كيف تاخذ مسافة من النهضة وما تكونش منساق أعمى وراء قيادتها حتى ولو بش تصوتلهم، هذا ما يعنيش انك تلوث في صورتها، أما لزمنا نتعلمو من تجارب الدول الأخرى وكيفية إنهاء ثورة، ماهيش بالسهولة إلي نتوقعوها كيف نشوفو اش صار بعد ثورة روسيا وثورة إيران، معناها التعلم من التاريخ مهوش هجوم غير مبرر ضد النهضة بل إنارة لكي لا نسقط في أخطاء سقط فيها غيرنا، والمقصود هنا اليقظة من أي إنحرافات عن مسار ثورة الحرية لا من النهضة فقط بل من جميع الأطراف؛ النهضة والشيوعيون وبقايا

الدكتاتورية والدكتاتوريين الجدد، وما يمكنني ملاحظته هو إنتشار ضاهرة مسكنة النهضة والنهضة فوق النقد الشيء إلي يسهل دكتاتورية جديدة خاصةً مع بروز هذا
الكام الهائل من البرهان بسيس المنتشرين هنا وهناك.

باهي بالنسبة لكتب راشد الغنوشي وبالرغم من إنو تكويني علمي بالأساس، إلى إن معرفتي بكتابة فرويد تخليني نهستر بالضحك من الفقرة المذكورة، خاصةً وإنو المرأة ومهما كان السياق، لا تتمحور حياتها حول وضيفتها الجنسية بل إن المرأة والرجل وحسب علم النفس، تتداخل أفعالهم وميولهمو التطور النفسي والتكيف الجنسي الاجتماعي يرتبطان بالسن وبتطور الفرد جسدياً واجتماعياً بصورة وثيقة، أما لا علينا ممكن أنا ضيع فيها وكتاباتو كمفكر لا تعنيني قدر مواقفو كسياسي،




لا علينا نمشو توا للمغالطة الكبرى والمحرمة وإلي من كثر ما سمعتها ولت تسببلي
توتر في أعصابي
كيف نقول أنا مسلم وما تمثلنيش النهضة والنهضة لا تمثل الإسلام بجاه ربي وينو الإقصاء؟ توا مؤخراً أي واحد ينقد النهضة يجيه كيل من السباب المجاني، هاو تلميذ بن علي ويدعو للإقصاء! براس أمك كيف انتي ما تمثلنيش وينو الإقصاء؟ توا هبال هذاية ولا تهيبيل؟ (سامحني أما النقطة هذي بالذات من كثر ما سمعتها خايف كان يحكيهالي خالي (النهضوي) ندغرو بسكينة و نباسي في جرتها*)
هذا رويق حزب فوق النقد ونظرية الهولوكست كما إلي حكى عليها يوسف لهنا، ما يلزموش يتسخر، كأنو احنا ناقصين تقديس وتكفير

خلي نزيدو إقصاء، تي هما

قال شنوا إلي ما يحبش النهضة
كافر وكما قبل إلي يدعو للعلمانية كافر، وهما لعباد إلي تكفر ماهيش في ثقافة الطالبي ولا
جعيط

...إلخ خلي نزيدلهم حجة الإقصاء ملحيط، يخي يا أخي نرى انك متصلحليش وما تصلحش لتونس إقصاء هذا؟



باهي بالنسبة للي صار في قليبية توا نمشي معاك إنو فيه استفزاز (غير مرغوب فيه حالياً لحساسية الضرف لكنه ضاهرة صحية لنشاط المجتمع المدني ويصير في كل الدول الديمقراطية وين تلقى تظاهرات مناوئة) ، أما ماكانش التجاوب معاه بالطريقة الوديعة إلي تحكي بها فما كاميرا تخطفت، وفما تكفير وسبان من الجهتين أما جيست حاجة التشبيه بمنع البي دي بي والتجديد مجانب للصحة، كيف تلقى عباد تحب تدخلباش تناقش ماهيش كيف عباد تمنع تجمع، وبالمناسبة صفحة الحقائق الخفية إلي نشرت هذه التدوينة، كانت تبارك

هجمات عنيفة على البي دي بي والتجديد

لكن هذا منتظر من مثل هذه الصفحات المنافقة بالرغم اني سمعت إنو صديقنا المدون محمد تيتو متع المتنوشة معاهم، أما يا خويا مش معقول هذا الإنفصام


بالنسبة لمجموعة الفدلكة (إلي مانيش داخل في حتى وحدة فيهم إلى متع الطماطم خاطر بالرسمي نحب الطماطم أكثر من راشد الغنوشي و ضهرلي أنا حر في ميولاتي، يوليش زادة كره الطماطم وعشق الشيخ راشد واجب ديني أو أخلاقي؟) أما بش نعطو صورة كاملة، المجموعات هذي ما تعني كان المتطرفين وفي سياق رد على الصفحات والمبيدات القامعة لحق التعبير والأراء مثل هذي، إلي تطالب فيا بالهجرة نحو لامبيدوسا



بالنسبة لإحتقار المرأة، مثلاً حسب منفهم من كلامك نتعرفو عليه من خلال تصرفات عائلة الغنوشي وهذا إنجمو نعرفو من خلالو إلي النهضة بش تسمح بتعدد الزوجات بما إنو الشيخ راشد متزوج زوز نساء


بخلاف
كلامهم على حقوق المرأة عند الطلاق.. إلى غير ذلك، معناها المنطق متاعك نفهم منو إذا ولد راشد الغنوشي معلم في الكورة، تونس بش تهز الكوب دي موند إذا شد الذيخ راشد، هل متشابهات الشعبوية ما عندها حتى معنى كان عند أصحاب العقول البسيطة


بالنسبة للعباد المتطرفين وإلي يسيئو لقضيتهم قبل النهضة نقلك إي نعم موجودين وحكيت عليهم قبل مثال لهنا ولهنا أما هذا ما يعنيش إنو يبرر الكم متع المغالطات المنتشرة.
ملخر بالنسبة ليا كنت نستنى في برامج قبل ما نعطي صوتي أما بتصرفات النهضة مانيش باش نعطيها صوتي مش دخولاً في النوايا أما كي نسمع أفكار من قبيل المنع التدريجي للخمور نعتبرو إعتداء على الحرية وما صارش في أوج الحضارة الإسلامية وللي ما يعرفش نورمالمون يتذكر شوية أبو نواس إلي يتغنى بالخمر والخمارات.
النهضة ما تستحقش الحديث عليها هذا الكل خاطر في كلمتين تنجم توصل إلى فشلهم السياسي ورغبتهم الوصولية، كيف تسمع أفكار خلاقة مبدعة كيف
هذي تقول يرحم الأم إلي جابت:



(المكتوب غادي:
من النقاط الهامة التي طرحها الدكتور عبد اللطيف المكي هو تردي قطاع الخدمات في بلادنا و قال أنه نشهد يوميا إزدحام كثيف في قطاع النقل و المستشفيات(تأجيل المواعيد علاج المرض بأسبوع وأشهر في بعض الأحيان) وعديد الخدمات فيحين أن لدينا عديد العاطلين عن العمل من أصحاب الشهادات العليا و غير حاملي الشهادات و قد طرح أن من واجبنا أن نقوم بإنجاز مستشفيات جامعية أخرى و مشاريع نقل أخرى وتحسين البنية التحتية وتطويرها بما يفتح باب التشغيل أمام غير حاملي الشهادات وبما يفتح أيضا فرص هامة لإنتداب إطارات من حاملي شهادات العليا وبذلك نكون قد حسنا مستوى الخدمات المقدمة للمواطن و فتح باب تشغيل هام
admin 2
ولا تسألهم على تهربهم من إمكانية عقد ميثاق جمهوري (مهوش كما قيل انها مبادرة المواطنة بل يقع عقده داخل الهيئة وتنجم تلقاها بكل وضوح لهنا وتهرب واضح، توا يخي أنا باش نعمل إلتزام أخلاقي نشور الشعب؟ ولا الأحزاب الأخرى؟ شاورت الشعب باش تعمل القانون الأساسي؟ يخي الشعب باش يصوت للمبادئ متاعك ولا هات يصوتلك وأنا نعملو اش يحب،كأنك تقول لحزب بيئي
(فش قام تكون بيئي ستنا موافقة الشعب

ولا السطو على المنصب الجهوية كما المجلس البلدي إلي عينو فيه خالي في
إجتماع حزبي داخلي لتكريم مساجينهم
!!!

ولا يجيبلك في اجتماعاتو بسيكو م بش يسيب إرهابو الفكري تحت تفاعل الجمهور : "

"كان جات عندي القدرة نعطيهم بالكلاشينكوف كما صحيبنا أذاكا الي عمل مايكينغ أوف"

الحاجة الوحيدة إلي نراها ممكن تخلي النهضة تربح هي نظرية الحكم بحق إلهي بما إنو سي اللوز يقول إن الله قد باراك مشروعهم وزكاه (الفيديو بدايةً من الدقيقة 9 و-15 ثانية) ومن السذاجة تاعو قال والدليل هذا النصر العظيم، على حسابو ربي يبارك مشروع إسرائيل والدليل الانتصارات (الحقيقية مش الوهمية ) متاعها المتاتلية على أمة خلت أمثالو يصبحو خطباء فيهم






أية افرق الحضبة من غادي