lundi 18 avril 2011

رد على تدوينة : نقد النهضة




هذي بش تكون لي سابقة بش نكتب تدوينة كرد على تدوينة أخرى ممكن متشجع خاطر المدون المعني بالأمر صديق إفتراضي ليا و نتوقع إنو باب النقاش معاه مفتوح أكثر من برشة دوغمائين (أهوكة ضربتلو اللغة بش ما يدخلش فيا) ، وزادة لأني حسيت إنو لازم تقديم الصورة للعموم و نظراً لطول الطرح خيرت مش بش يكون تعليق بل تدوينةلهنا بش نحكي على هذه التدوينة للمدون بنفسجيت حر كاليميرو ، أملاً في انو يفهمني ويتناقش معايا
حسب ملاحظتي الأولية : كتب الخبر في سياق يطغى عليه إتجاه واحد ومنظور واحد، معناها -مش كيما قال ولا يظهر من كلامو إن نقد النهضة مافيهيش جانب صحيح ما عن حتى علاقة بمفهوم هجمة- نقد النهضة فيه الغث والسمين وأهم حاجة المغالطات من الجانبين، فما أغلاط وفما تمسكين زادة من النهضة و احنا نتعرضو لحملة و احنا يا حليلنا نسخفو و احناحقوقنا مهضومة و نعانو من الإسلاموفوبيا!! توا بلكشي عايش في اللامريك بش تقلي إسلاموفوبيا ؟ تونس أغلبية ساحقة مسلمة وتقلي إسلاموفوبيا؟ توا أنا نعرف حتى السكارجي ماخذ فكرة بهية علي يصلو والملتزمين هاو هذاك ناس طيبة يصلي ويعرف ربي. تي مرة في تكويرة الراجل يحب توش قتلو ما مستنيش الكرة، جاني صاحبي فرد ايكيب وقلي الراجل يصلي مش بش يكذب عليك!!! وإنت تقلي إسلاموفوبيا؟ تعرف شنوا معناها يخي ولا تتهيبل؟ معناها إنت مسلم دنك تخوف، إذا فما خوف من التطرف ما يتسماش اسلاموفوبيا وإلي يمن إلي فما إسلاموفوبيا في تونس يا إما بهيم حشاكم ويا إما لغاية في نفس يعقوب كما لحبيب إلي عامل الصفحة هذي


باهي توا نرجعو للرد على التدوينة، فما إشاعات وإشاعات مضادة، حسب ما قلت إنت إشاعة حكاية الأستاذة والنقاب، أناحسب ماعرفت لحكاية هذي خرجوها برشة ناس متعاطفين مع النقاب على الأقل اصدقائي منهم خرجوها كيما خرجو
هاك الطفلة في صفاقس إلي باعترافها تقبحت على الأستاذ خاطر ما قبلهاش بالنقاب وجابت خوها عطاه طريحة، والجماعة تتبكى والله ما حقوش الأستاذ، نورمال ياكل طريحة وتتقبح عليه تلميذة!، قال شنوا حرية ! والله نتمنى من هذو الجماعة كانهم جماعة حرية, ينادو بالحرية حتى للعرايا معناها كيف يجيك أستاذ قلم ما يقلقكش، ولا وقتها الحرية تولي عندها ضوابط؟ وكيفكيف على المثلية الجنسية.... إلخ إذا إنت تعتبر انها حرية شخصية، ووقتها نفهمك إلي إنت وصلت لدرجة في منظور الحرية متاعك فاتتني وفاتت مخي
البسيط أما ضربان اللغة مش لازم منو.


سامحوني طولت في التعريج، جيست حبيت نقول إلي الدعاية والدعاية المضادة موجودة.

باهي بالنسبة للحرية الدينية مسمعتش أنا فما شكون مش بش يضمنها؟ واللهي توا حتى هذا كلام!
بالنسبة لإستعمال المساجد صار, والناس الكل لازمها تحكي فيه وسامحني حطان النقطة هذي في سياق التدوينة اسمها مغالطة كبيرة، كأنها مش نقد هادف وعندو معنى، أنا نحكي مثلاً على بلادي جربة صارت مشاكل على الحكاية هذي متع تغير الأيمة، معناها النهضة قاعدة تتدخل ومش من حقها،وبالنسبة لإستعمال المساجد (خاصةً بالطريقة إلي حكى بها صديقنا كالميرو ، كأنو يقول يا مصلين كان مش بش تصوتو نهضة راهو الجامع بش يسكر ويردوه بار! قلو ضمان الحرية الدينية


يخي فما شكون
مش
بش يضمنها؟ تي الوطد قالك عنا رفقاء حجاج بيت ربي وإنت تقلي ضمان درة شنوا! حتى هذا كلام! حملة التسييس في المساجد مع الوعي المحدود والجانب التقديسي تخلي العملية مربحة ونفهم علاش النهضة تنحي إمام من البي دي بي بش تحط إمام نهضوي كما صار في صفاقس. الوقاحة والإستهتار بالمعتقدات المذهبية وصل بيهم بش ينحو إمام اباضي في اجيم جربة (نأكد إنو كان صباب كبير) وتعويضه بإمام مالكي ولا سلفي ولا شنوا المهم عرفوه مش اباضي من تكبيرة الإحرام ، قال شنوا الكلنا مسلمين وكيفكيف، قالولهم أهوكة فما جامع المالكية قلك الناس الكل تصلي معانا، كان هكا وما وصلوش للسلطة وما يحترموش الأقليات ، ملا كان جات بيدهم كيفاش؟




وهكا بش نتعدى لحكاية إيران، لهنا نحب نقول التاريخ لا يرحم إلي ما يتعلمش منو، معناها كيف نقول منحبش مثلاً ثورة مذهبية ولا دينية معناها كيف تاخذ مسافة من النهضة وما تكونش منساق أعمى وراء قيادتها حتى ولو بش تصوتلهم، هذا ما يعنيش انك تلوث في صورتها، أما لزمنا نتعلمو من تجارب الدول الأخرى وكيفية إنهاء ثورة، ماهيش بالسهولة إلي نتوقعوها كيف نشوفو اش صار بعد ثورة روسيا وثورة إيران، معناها التعلم من التاريخ مهوش هجوم غير مبرر ضد النهضة بل إنارة لكي لا نسقط في أخطاء سقط فيها غيرنا، والمقصود هنا اليقظة من أي إنحرافات عن مسار ثورة الحرية لا من النهضة فقط بل من جميع الأطراف؛ النهضة والشيوعيون وبقايا

الدكتاتورية والدكتاتوريين الجدد، وما يمكنني ملاحظته هو إنتشار ضاهرة مسكنة النهضة والنهضة فوق النقد الشيء إلي يسهل دكتاتورية جديدة خاصةً مع بروز هذا
الكام الهائل من البرهان بسيس المنتشرين هنا وهناك.

باهي بالنسبة لكتب راشد الغنوشي وبالرغم من إنو تكويني علمي بالأساس، إلى إن معرفتي بكتابة فرويد تخليني نهستر بالضحك من الفقرة المذكورة، خاصةً وإنو المرأة ومهما كان السياق، لا تتمحور حياتها حول وضيفتها الجنسية بل إن المرأة والرجل وحسب علم النفس، تتداخل أفعالهم وميولهمو التطور النفسي والتكيف الجنسي الاجتماعي يرتبطان بالسن وبتطور الفرد جسدياً واجتماعياً بصورة وثيقة، أما لا علينا ممكن أنا ضيع فيها وكتاباتو كمفكر لا تعنيني قدر مواقفو كسياسي،




لا علينا نمشو توا للمغالطة الكبرى والمحرمة وإلي من كثر ما سمعتها ولت تسببلي
توتر في أعصابي
كيف نقول أنا مسلم وما تمثلنيش النهضة والنهضة لا تمثل الإسلام بجاه ربي وينو الإقصاء؟ توا مؤخراً أي واحد ينقد النهضة يجيه كيل من السباب المجاني، هاو تلميذ بن علي ويدعو للإقصاء! براس أمك كيف انتي ما تمثلنيش وينو الإقصاء؟ توا هبال هذاية ولا تهيبيل؟ (سامحني أما النقطة هذي بالذات من كثر ما سمعتها خايف كان يحكيهالي خالي (النهضوي) ندغرو بسكينة و نباسي في جرتها*)
هذا رويق حزب فوق النقد ونظرية الهولوكست كما إلي حكى عليها يوسف لهنا، ما يلزموش يتسخر، كأنو احنا ناقصين تقديس وتكفير

خلي نزيدو إقصاء، تي هما

قال شنوا إلي ما يحبش النهضة
كافر وكما قبل إلي يدعو للعلمانية كافر، وهما لعباد إلي تكفر ماهيش في ثقافة الطالبي ولا
جعيط

...إلخ خلي نزيدلهم حجة الإقصاء ملحيط، يخي يا أخي نرى انك متصلحليش وما تصلحش لتونس إقصاء هذا؟



باهي بالنسبة للي صار في قليبية توا نمشي معاك إنو فيه استفزاز (غير مرغوب فيه حالياً لحساسية الضرف لكنه ضاهرة صحية لنشاط المجتمع المدني ويصير في كل الدول الديمقراطية وين تلقى تظاهرات مناوئة) ، أما ماكانش التجاوب معاه بالطريقة الوديعة إلي تحكي بها فما كاميرا تخطفت، وفما تكفير وسبان من الجهتين أما جيست حاجة التشبيه بمنع البي دي بي والتجديد مجانب للصحة، كيف تلقى عباد تحب تدخلباش تناقش ماهيش كيف عباد تمنع تجمع، وبالمناسبة صفحة الحقائق الخفية إلي نشرت هذه التدوينة، كانت تبارك

هجمات عنيفة على البي دي بي والتجديد

لكن هذا منتظر من مثل هذه الصفحات المنافقة بالرغم اني سمعت إنو صديقنا المدون محمد تيتو متع المتنوشة معاهم، أما يا خويا مش معقول هذا الإنفصام


بالنسبة لمجموعة الفدلكة (إلي مانيش داخل في حتى وحدة فيهم إلى متع الطماطم خاطر بالرسمي نحب الطماطم أكثر من راشد الغنوشي و ضهرلي أنا حر في ميولاتي، يوليش زادة كره الطماطم وعشق الشيخ راشد واجب ديني أو أخلاقي؟) أما بش نعطو صورة كاملة، المجموعات هذي ما تعني كان المتطرفين وفي سياق رد على الصفحات والمبيدات القامعة لحق التعبير والأراء مثل هذي، إلي تطالب فيا بالهجرة نحو لامبيدوسا



بالنسبة لإحتقار المرأة، مثلاً حسب منفهم من كلامك نتعرفو عليه من خلال تصرفات عائلة الغنوشي وهذا إنجمو نعرفو من خلالو إلي النهضة بش تسمح بتعدد الزوجات بما إنو الشيخ راشد متزوج زوز نساء


بخلاف
كلامهم على حقوق المرأة عند الطلاق.. إلى غير ذلك، معناها المنطق متاعك نفهم منو إذا ولد راشد الغنوشي معلم في الكورة، تونس بش تهز الكوب دي موند إذا شد الذيخ راشد، هل متشابهات الشعبوية ما عندها حتى معنى كان عند أصحاب العقول البسيطة


بالنسبة للعباد المتطرفين وإلي يسيئو لقضيتهم قبل النهضة نقلك إي نعم موجودين وحكيت عليهم قبل مثال لهنا ولهنا أما هذا ما يعنيش إنو يبرر الكم متع المغالطات المنتشرة.
ملخر بالنسبة ليا كنت نستنى في برامج قبل ما نعطي صوتي أما بتصرفات النهضة مانيش باش نعطيها صوتي مش دخولاً في النوايا أما كي نسمع أفكار من قبيل المنع التدريجي للخمور نعتبرو إعتداء على الحرية وما صارش في أوج الحضارة الإسلامية وللي ما يعرفش نورمالمون يتذكر شوية أبو نواس إلي يتغنى بالخمر والخمارات.
النهضة ما تستحقش الحديث عليها هذا الكل خاطر في كلمتين تنجم توصل إلى فشلهم السياسي ورغبتهم الوصولية، كيف تسمع أفكار خلاقة مبدعة كيف
هذي تقول يرحم الأم إلي جابت:



(المكتوب غادي:
من النقاط الهامة التي طرحها الدكتور عبد اللطيف المكي هو تردي قطاع الخدمات في بلادنا و قال أنه نشهد يوميا إزدحام كثيف في قطاع النقل و المستشفيات(تأجيل المواعيد علاج المرض بأسبوع وأشهر في بعض الأحيان) وعديد الخدمات فيحين أن لدينا عديد العاطلين عن العمل من أصحاب الشهادات العليا و غير حاملي الشهادات و قد طرح أن من واجبنا أن نقوم بإنجاز مستشفيات جامعية أخرى و مشاريع نقل أخرى وتحسين البنية التحتية وتطويرها بما يفتح باب التشغيل أمام غير حاملي الشهادات وبما يفتح أيضا فرص هامة لإنتداب إطارات من حاملي شهادات العليا وبذلك نكون قد حسنا مستوى الخدمات المقدمة للمواطن و فتح باب تشغيل هام
admin 2
ولا تسألهم على تهربهم من إمكانية عقد ميثاق جمهوري (مهوش كما قيل انها مبادرة المواطنة بل يقع عقده داخل الهيئة وتنجم تلقاها بكل وضوح لهنا وتهرب واضح، توا يخي أنا باش نعمل إلتزام أخلاقي نشور الشعب؟ ولا الأحزاب الأخرى؟ شاورت الشعب باش تعمل القانون الأساسي؟ يخي الشعب باش يصوت للمبادئ متاعك ولا هات يصوتلك وأنا نعملو اش يحب،كأنك تقول لحزب بيئي
(فش قام تكون بيئي ستنا موافقة الشعب

ولا السطو على المنصب الجهوية كما المجلس البلدي إلي عينو فيه خالي في
إجتماع حزبي داخلي لتكريم مساجينهم
!!!

ولا يجيبلك في اجتماعاتو بسيكو م بش يسيب إرهابو الفكري تحت تفاعل الجمهور : "

"كان جات عندي القدرة نعطيهم بالكلاشينكوف كما صحيبنا أذاكا الي عمل مايكينغ أوف"

الحاجة الوحيدة إلي نراها ممكن تخلي النهضة تربح هي نظرية الحكم بحق إلهي بما إنو سي اللوز يقول إن الله قد باراك مشروعهم وزكاه (الفيديو بدايةً من الدقيقة 9 و-15 ثانية) ومن السذاجة تاعو قال والدليل هذا النصر العظيم، على حسابو ربي يبارك مشروع إسرائيل والدليل الانتصارات (الحقيقية مش الوهمية ) متاعها المتاتلية على أمة خلت أمثالو يصبحو خطباء فيهم






أية افرق الحضبة من غادي

13 commentaires:

Anonyme a dit…

Fuck you! alnahdha lelrjal mech lel pidiyat ili kifek, kan jit rajel rak matdafa3ch 3al les pd ya bhim belrasmi, jerbi 9arnat nta3 wedhni t7eb ta3mel elfetna 9allo ibadhiya, 5awarej nta3 wedhni malla 5alaye9 n3ano fiha, blastek mech lambadouza inti blastek fou9

ElGueuzifié a dit…

خويا تعمل مزية ما تجمعش ما بين حزب سياسي عندو مرجعية إسلامية كيما حزب العدالة و التنمية التركي و بين التيارات السلفية المتطرفة و حزب التحرير و الخلافة و ماشابه من التخلف ..

هيكل بن جعفر a dit…

L'islamophobie en Tunisie ? Page Tunisiens Irréligieux :)
les islamophobes existent un peu partout et j'en connais des dizaines...

Unknown a dit…

aircool tunisiens irréligieux détestent tout les religieux, on peut pas parler d'islamophobie en Tunisie, puisque le peuple est musulman, c'est aussi simple que ça.

Unknown a dit…

ElGueuzifié :

تعلق على التدوينة هذي؟ متأكد يا خويا؟

Unknown a dit…

anonyme
هاني بش نخليك بش إلي يجي يتفرج في بهامتك وأخلاقك "الإسلامية" منافقين متع وذني شوهتوه الإسلام

Youssef a dit…

@ElGueuzifié
Il n'y a aucune comparaison entre la nahdha et le parti turque éli ta7ki 3lih.
1) je te conseiller d'aller jeter un coup d’œil sur les principes des deux partis.

2) la constitution turque est laïque et c'est l'armé qui défend la laïcité dans le ce pays.

Anonyme a dit…

السلام.. بما انو حق الرد مضمون.. أنا من شباب حركة النهضة وباش نجاوب على شوية نقاط.. أولاً صحيح ثمة تمسكن من بعض أعضاء حماسيين (مش حركة حماس) من الحزب وهذا نراه خطأ إعلامي كبير وندعو ديما في الإجتماعات متاع الشباب باش يتصلح.. ثمة زادة من بعض الشباب عدم قبول للنقد وهذا نأكدلك موجود في الأحزاب لكل (إلي حضرت اجتماعات البيدبي والتجديد والمؤتمر من أجل الجمهورية) أما هذي ضاهرة برشة في حركة النهضة على خاطر إلي متحمسين لها برشة وبرشة منهم ما يعرفش حتى تاريخ الحركة ووين يحصل يولي يفلطي.. وإنت الأمثلة إلي جبتهم لكل من الفيسبوك يعني ناس من النوع إلي حكيتلك عليهم ولهنا نقول زادة إلي الإستراتيجية الإعلامية متاع النهضة يلزم تتحسن بش نوعوا ونفهمو وناطرو إلي في الحركة قبل ما نخرجو للعباد... لكن خلي نأكدلك حاجة.. في الإجتماعات متاعنا نركزو أكثر على البحث على حلول عملية لمشاكل لبلاد موش على المناوشات الفارغة إلي لا تقدم لا توخر وديجا ديما الإجتماعات متاع الحركة وشبابها يعلنوا عليهم في الفيسبوك تنجم تحضر وتشوف.. وهاو كومانتر متاع عضوة في شباب الحركة كي تناقشنا في الموضوع: "يتلاعبون بالألفاظ ينكرون عل الشيخ أنه هاجر و أنه لم يتحمل مسؤولية الذين سجنوا و نسوا أنهم من طأطأ الرؤوس لبن علي و ذلّوا له و هااااا حرية المرأة و مكتسباتها الي عبدونا بها و هم الي رجعوها إلى الجاهلية الأولى فنزعوا لها لباس الطهر و العفاف و الحياء و ينعقون في كل وقت و حين الإسلاميون كان شدوا الحكم يا نساء راكم باش تقعدوا في ديار ما ثماش خدمة و تلبسوا الكل الحجاب و باش يرجعوا تعدد الزوجات ديما تلقاهم مركزين كان على الحاجة هذي و كيف تناقشهم يردوا بالكلمات هذي ,لا يملكون الحجّة , أنا من رأيي ألا نضع أنفسنا أبدا في موضع المدافع و أن نشتغل على الأفعال فتأثيرها أقوى و إن كان أبطأ" كان ثمة نقاش جاد انجم نكمل نرد على النقاط الأخرى

Unknown a dit…

أنونيم من النهضة، تنجمش تفسرلي التهرب من عقد ميثاق جمهوري؟ ولا كلمات سي الحبيب اللوز حول تزكية ربانية لمشروع النهضة أ ليست كلمات وصولية تمتطي الدين ؟ على فكرة الأمثلة إلي حطيتها في سياق الدعاية والدعاية المضادة ولا تلزم الحركة في شيء، من جهة أخرى كلامي إلي فيه نقد على النهضة في الفقرة الأخيرة، والفيدوات فيها قادة من النهضة، و حكيت على تصرفات القيادة (تعيينات في المجالس البلدية، كلام زيتون عن السياحة الدينية، كلام شيخ راشد عن المانع التدريجي للخمور، والفيديوات ، وإنجمو نزيدو كلام الجبالي عن الحدود (في يوم ما)..)
أركول؛ حبيت نفسرلك إلي الإسلاموفوبيا هي إنت مسلم دنك تخوف، إذا فما خوف من التطرف هذيك حاجة أخرى، معناها إذا تلقى إنت أغلبية تخاف منك ولا مني خاطرنا مسلمين وقتها انجم نفهمك

Anonyme a dit…

باهي..هاو اش كتبت إنت: " والفيدوات فيها قادة من النهضة، و حكيت على تصرفات القيادة (تعيينات في المجالس البلدية، كلام زيتون عن السياحة الدينية، كلام شيخ راشد عن المانع التدريجي للخمور، والفيديوات ، وإنجمو نزيدو كلام الجبالي عن الحدود (في يوم ما)..)".. هذي مواقف واضحة ما فيهاش سبان عباد ولا تمسكين. هذيك مواقف عندهم ألحق يعبروا عليها و إنت نهارت إلي تنتخب ارفضوا.. هل المواقف متاعو تستحق باش تقوم وتصبح تسمع في سبان النهضة.. ماهو كل واحد حر في موقف ونتي نهارت الإنتخابات حر زادة.. وفي لخر النهضة ليست الإسلام و الإسلام ليس النهضة.
النهضة أشخاص يصيبون و يخطؤون، هم إختاروا أن يكون الإسلام منبع مبادئهم فلا يجب أن يجرّم الإسلام بأخطائهم ولا أن ينزّهوا لنزاهة الإسلام!!!
فبتصويتك للنهضة، فإنك لا تصوت للإسلام. فالإسلام لا يحتاج إلى صناديق إقتراع حتى نعرف قيمته و مكانته، بل ستكون قد صوتّ لحزب سياسي ذي مرجعية إسلامية .
و بمعارضتك للنهضة تأكد أنك لا تعارض الإسلام بل ستكون قد عارضت مجرد حزب سياسي ذي مرجعية إسلامية وهم كثيرون

Unknown a dit…

عليك نور، أما
أنا سبيت النهضة؟ ولا شرعت للتهجم على النهضة؟ أنا فقط نقدت النهضة، وضهرلي عندي الحق

Anonyme a dit…

la vraie tunisie pr les tunisiens nationalistes aimants lé1 lé autres et unis pour tjrs :voir http://www.facebook.com/No.Nahdha

tunisie http://www.facebook.com/video/video.php?v=192774820758121

Anonyme a dit…

أي صحيح عندك لحق.. لكن انا رديت عليك على خاطر إنت كتبت التدوينة هذي بش ترد على واحد نقد إلي يرقد ويقوم على سبان النهضة.. ضهر كونو تشريع لسبان هذاك أما النقد حق للناس لكل..